1 Rouaned 12 - Bibl Koad 21: Ar Bibl e Brezhoneg evit ar Vretoned

Pennad 12

¹ Roboam a yeas da Sichem, rak holl Israel a oa deuet da Sichem evit e lakaat da roue.

² Pa glevas Jeroboam mab Nebad kement-se, edo c'hoazh en Ejipt, e-lec'h ma oa tec'het a-zirak ar roue Salomon; en Ejipt e oa o chom.

³ Kaset e voe da c'hervel anezhañ. Jeroboam hag holl vodadeg Israel a zeuas hag a gomzas ouzh Roboam o lavarout:

⁴ Da dad en deus lakaet warnomp ur yev pounner. Skañva bremañ kargoù kalet da dad hag ar yev pounner en deus lakaet warnomp, hag e servijimp ac'hanout.

⁵ Hag e lavaras dezho: Kit, ha distroit da'm c'havout a-benn tri deiz; hag ar bobl a yeas kuit.

⁶ Ar roue Roboam a c'houlennas ali digant ar re gozh a oa bet e-kichen Salomon e dad pa oa bev, o lavarout: Peseurt respont am c'huzuilhit d'ober d'ar bobl-se?

⁷ Hag e respontjont dezhañ evel-henn: Mar bezez e servij ar bobl-se, mar o selaouez, mar respontez dezho komzoù madelezhus, e vint da servijerien da viken.

⁸ Met dilezel a reas an ali o doa roet dezhañ ar re gozh, hag e c'houlennas ali digant ar re yaouank o doa kresket gantañ hag en em zalc'he dirazañ.

⁹ Hag e lavaras dezho: Peseurt respont am c'huzuilhit d'ober d'ar bobl-se he deus komzet ouzhin o lavarout: Skañva ar yev en deus lakaet da dad warnomp?

¹⁰ Hag ar re yaouank o doa kresket gantañ a respontas o lavarout: Evel-henn e komzi ouzh ar bobl-se he deus komzet ouzhit o lavarout: Da dad en deus lakaet warnomp ur yev pounner, ha te, skañva hor yev! Respont a ri dezho: Va biz bihan a zo tevoc'h eget divgroazell va zad.

¹¹ Va zad en deus lakaet warnoc'h ur yev pounner, met me a lakaio ho yev pounneroc'h c'hoazh. Va zad en deus kastizet ac'hanoc'h gant skourjezoù, met me a raio gant skourjezoù-kruged.

¹² Tri deiz goude, Jeroboam hag an holl bobl a zeuas da gavout Roboam, evel m'en doa lavaret ar roue: Distroit da'm c'havout a-benn tri deiz.

¹³ Met ar roue a respontas garv d'ar bobl, o tilezel an ali o doa roet dezhañ ar re gozh.

¹⁴ Hag e komzas outo hervez ali ar re yaouank, o lavarout: Va zad en deus lakaet warnoc'h ur yev pounner, met me a lakaio ho yev pounneroc'h c'hoazh. Va zad en deus ho kastizet gant skourjezoù, met me ho kastizo gant skourjezoù-kruged.

¹⁵ Ar roue ne selaouas ket eta ouzh ar bobl, ha kement-se a zeue a-berzh an AOTROU, evit ma vefe sevenet ar gomz en doa lavaret an AOTROU da Jeroboam mab Nebad dre Akija eus Silo.

¹⁶ Pa welas holl Israel ne selaoue ket ar roue anezho, e respontjont d'ar roue o lavarout: Peseurt lodenn hon eus gant David? N'hon eus hêrezh ebet gant mab Jese! Pep hini d'e deltennoù, Israel! Ha bremañ, David, pourvez da'z ti! Evel-se, holl Israel a yeas d'e deltennoù.

¹⁷ Roboam a renas war ar re eus mibien Israel a oa o chom e kêrioù Juda.

¹⁸ Ar roue Roboam a gasas Adoram, karget eus an tailhoù, met holl Israel a labezas anezhañ gant mein, hag e varvas. Ar roue Roboam a hastas pignat war ur c'harr da dec'hout da Jeruzalem.

¹⁹ Evel-se e oa Israel en em savet a-enep ti David betek hiziv.

²⁰ Kerkent ha ma klevas holl Israel e oa distroet Jeroboam, e kasjont d'e c'hervel d'ar vodadenn, hag e lakajont anezhañ da roue war holl Israel. Meuriad ebet ne heulias ti David, nemet meuriad Juda hepken.

²¹ Roboam a erruas e Jeruzalem, hag e tastumas holl di Juda ha Benjamin, kant pevar-ugent mil den a vrezel dibabet, evit stourm a-enep ti Israel, hag evit degas ar rouantelezh en-dro dindan Roboam mab Salomon.

²² Met komz an AOTROU a voe disklêriet da Shemaja, den Doue, o lavarout:

²³ Komz ouzh Roboam mab Salomon roue Juda, hag ouzh holl di Juda ha Benjamin, hag ouzh nemorant ar bobl, ha lavar dezho:

²⁴ Evel-henn e komz an AOTROU: N'it ket d'ober brezel a-enep ho preudeur mibien Israel, distroit pep hini ac'hanoc'h d'e di, rak kement-se a zeu eus va ferzh. Hag e sentjont ouzh komz an AOTROU, hag e tistrojont hervez komz an AOTROU.

²⁵ Jeroboam a savas Sichem war venez Efraim, hag e chomas enni; goude ez eas ac'hane hag e savas Penuel.

²⁶ Jeroboam a lavaras en e galon: Ar rouantelezh a c'hellfe bremañ distreiñ da di David.

²⁷ Mar pign ar bobl-mañ evit ober aberzhoù da di an AOTROU e Jeruzalem, kalon ar bobl-mañ a droio etrezek o aotrou Roboam roue Juda, hag e lazhint ac'hanon, hag e tistroint da gavout Roboam roue Juda.

²⁸ Ar roue, o vezañ kemeret kuzul, a reas daou leue aour, hag a lavaras d'ar bobl: A-walc'h ez oc'h pignet da Jeruzalem, setu da zoueoù, o Israel, ar re o deus da lakaet da bignat eus bro Ejipt.

²⁹ Hag e tiazezas unan e Betel hag e lakaas egile e Dan.

³⁰ Hag an dra-se a zeuas da vezañ ur pec'hed, rak ar bobl a yeas zoken betek Dan dirak unan eus al leueoù.

³¹ Hag e reas ivez tiez en uhellec'hioù, hag e lakaas da aberzhourien tud a-douez an holl bobl ha na oant ket mibien Levi.

³² Jeroboam a reas ur gouel d'an eizhvet miz, d'ar pempzekvet deiz eus ar miz, evel ar gouel a veze graet e Juda, hag e kinnigas aberzhoù war an aoter. Ober a reas evel-se e Betel, oc'h aberzhiñ d'al leueoù en doa graet; hag e lakaas e Betel aberzhourien evit an uhellec'hioù en doa graet.

³³ D'ar pempzekvet deiz eus an eizhvet miz, ar miz en doa dibabet e-unan, e kinnigas war an aoter en doa graet e Betel, hag e reas ur gouel evit mibien Israel, hag e pignas ouzh an aoter evit lakaat da vogediñ.