1 Rouaned 10 - Bibl Koad 21: Ar Bibl e Brezhoneg evit ar Vretoned

Pennad 10

¹ Rouanez Seba, o vezañ klevet brud Salomon abalamour da anv an AOTROU, a zeuas d'e amprouiñ dre luziadelloù.

² Dont a reas da Jeruzalem gant un heuliad bras, gant kañvaled o tougen louzoù-frondus, aour e-leizh ha mein prizius. Dont a reas da gavout Salomon, hag e komzas gantañ eus kement he doa en he c'halon.

³ Salomon a zisplegas dezhi diwar-benn he holl luziadelloù, ha ne voe netra na intentas ket ar roue ha na zisplegas ket dezhi.

⁴ Rouanez Seba, o welout holl furnez Salomon, an ti en doa savet,

⁵ meuzioù e daol, annezlec'hioù e servijerien, urzh ha gwiskamant a re a servije, e hanaferien, e loskaberzhoù a ginnige e ti an AOTROU, a voe holl er-maez anezhi hec'h-unan.

⁶ Hag e lavaras d'ar roue: Gwir eo ar pezh am eus klevet em bro diwar-benn da stad ha da furnez.

⁷ Ne greden ket ar pezh a lavared, betek ma'z on deuet ha ma o deus gwelet va daoulagad. Ha setu, ne oa lavaret din nemet an hanter. Da furnez ha da vadoù a dremen ar pezh am boa klevet eus da vrud.

⁸ Eürus eo da dud! Eürus da servijerien en em zalc'h bepred dirazout hag a selaou da furnez!

⁹ Ra vo benniget an AOTROU da Zoue, en deus kavet e blijadur ennout, evit da lakaat war dron Israel! Dre m'en deus karet an AOTROU Israel da viken, eo en deus da lakaet da roue, evit ober eeunder ha reizhder.

¹⁰ Hag e roas d'ar roue kant ugent talant aour, louzoù-frondus e-leizh, ha mein prizius. Ha ne zeuas biskoazh un niver ken bras a louzoù-frondus, evel ma roas rouanez Seba d'ar roue Salomon.

¹¹ Listri Hiram, o doa degaset aour eus Ofir, a zegasas ivez eus Ofir koad santal ha mein prizius e-leizh.

¹² Gant ar c'hoad santal-se e reas ar roue balustroù evit ti an AOTROU hag evit ti ar roue, ha telennoù ha lourennoù evit ar ganerien. Ha ne zeuas ken evel ar c'hoad santal-se, ha ne voe ken gwelet betek hiziv.

¹³ Ar roue Salomon a roas da rouanez Seba kement a c'hoantaas, ar pezh a c'houlennas, hag ouzhpenn-se e roas dezhi profoù evel ma c'helle reiñ ar roue Salomon. Hag e tistroas hag ez eas d'he bro, hi hag he servijerien.

¹⁴ Pouez an aour a zeue da Salomon bep bloaz a oa c'hwec'h kant c'hwec'h ha tri-ugent talant aour;

¹⁵ hag ouzhpenn-se e oa ar pezh a zegase ar werzherien hag ar c'henwerzh a-vunut, hag holl rouaned Arabia, ha gouarnourien ar broioù-se.

¹⁶ Ar roue Salomon a reas daou-c'hant skoed aour morzholiet, o lakaat da-se c'hwec'h kant sikl aour evit pep skoed,

¹⁷ ha tri c'hant skoed bihanoc'h en aour morzholiet, o lakaat teir minenn aour evit pep skoed. Ar roue a lakaas anezho e ti koad al Liban.

¹⁸ Ar roue a reas ivez un tron olifant bras, a c'holoas gant aour puraet.

¹⁹ An tron en doa c'hwec'h derez, krec'h an tron a oa ront en a-dreñv, brenkoù a oa a bep tu d'ar gador, ha daou leon en em zalc'he e-kichen ar brenkoù.

²⁰ Bez' e oa ivez eno daouzek leon war ar c'hwec'h derez, a bep tu. Netra heñvel ne oa bet graet e rouantelezh ebet.

²¹ Holl hanafoù ar roue Salomon a oa en aour, hag holl listri ti koad al Liban a oa en aour glan. Netra ne oa en arc'hant. Ne veze graet van ebet anezhañ en deizioù Salomon.

²² Rak ar roue en doa war vor listri Tarsiz gant listri Hiram, hag ur wech bep tri bloaz, e teue en-dro listri Tarsiz da zegas aour, arc'hant, olifant, marmouzien ha pauned.

²³ Evel-se ar roue Salomon a voe brasoc'h eget holl rouaned an douar, dre e binvidigezh hag e furnez.

²⁴ Holl rouaned an douar a glaske dremm Salomon, evit klevout ar furnez en doa lakaet Doue en e galon.

²⁵ Pep hini anezho a zegase e brof, listri arc'hant, listri aour, dilhad, armoù, louzoù-frondus, kezeg, muled, bloaz dre vloaz.

²⁶ Salomon a zastumas kirri ha marc'hegerien. Bez' en doa mil pevar c'hant karr ha daouzek mil marc'heger, hag e lakaas anezho er c'hêrioù ma veze lec'hiet e girri, hag e Jeruzalem e-kichen ar roue.

²⁷ Ar roue a reas d'an arc'hant bezañ ken boutin e Jeruzalem ha mein, ha d'ar sedrez ken boutin ha sikamor ar blaenenn.

²⁸ Eus an Ejipt hag eus Kue eo e teue ar c'hezeg evit Salomon. Ur strollad marc'hadourien ar roue a yae d'o c'herc'hat eus Kue dre lodenn evit ur priz merket.

²⁹ Lakaat a raed da zont eus an Ejipt ur c'harr evit c'hwec'h kant sikl arc'hant hag ur marc'h evit kant hag hanter-kant. Degaset e vezent ivez evit holl rouaned an Hitited hag evit rouaned Siria.