1 Korintiz 16 - Bibl Koad 21: Ar Bibl e Brezhoneg evit ar Vretoned

Pennad 16 Ar gest evit ar sent

¹ E keñver ar gest evit ar sent, grit evel ma em eus gourc’hemennet da Ilizoù Galatia.

² Pep deiz kentañ eus ar sizhun, ra lakaio a-du pep hini ac’hanoc’h en e di un dra bennak, o tastum ar pezh a c’hello hervez e c’hounid, evit na c’hortozor ket ken ma vin erru evit ober ar c’hestoù.

³ Ha pa vin erruet, e kasin gant lizheroù ar re ho po dibabet evit mont gant ho aluzenoù da Jeruzalem.

⁴ Mar d-eo dereat ez afen-me ivez va-unan, e teuint asambles ganin.

Alioù diwezhañ ha saludoù da glozañ

⁵ Mont a rin d’ho kavout goude ma em bo tremenet dre Vakedonia, rak tremen a rin dre Vakedonia.

⁶ Marteze e chomin un nebeud amzer ganeoc’h pe zoken e tremenin ar goañv, evit bezañ ambrouget ganeoc’h el lec’h bennak ma’z in.

⁷ Rak ne fell ket din ho kwelout ar wech-mañ en ur dremen, met ec’h esperan e chomin ganeoc’h un nebeud amzer, mar plij gant Doue.

⁸ Koulskoude e chomin en Efez betek ar Pantekost,

⁹ rak un nor vras a zo digor din gant esperañs a c’hounid, met kalz a enebourien a zo eno.

¹⁰ Mar deu Timote, lakait evezh ma vo hep aon en ho touez, rak labourat a ra da oberenn an Aotrou eveldon va-unan.

¹¹ Ra ne zisprizo den eta anezhañ, met ambrougit anezhañ e peoc’h evit ma teuio da’m c’havout, rak gortoz a ran anezhañ gant ar vreudeur.

¹² E-keñver ar breur Apolloz, e bedet em eus start da vont d’ho kavout gant ar vreudeur, met n’eo ket bet fellet dezhañ a-greñv mont bremañ. Koulskoude ez aio pa gavo tu.

¹³ Beilhit, chomit start er feiz, en em renit evel tud, en em greñvait.

¹⁴ Ra vo graet kement a rit gant karantez.

¹⁵ Ho pediñ a ran, breudeur, anavezout a rit tiegezh Stefanaz, gouzout a rit ez int ar c’hentañ frouezh eus Akaia hag ez int en em roet da servij ar sent,

¹⁶ bezit sentus ouzh ar seurt tud-se hag ouzh ar re holl a labour hag a gemer poan.

¹⁷ En em laouenaat a ran ma’z eo deuet Stefanaz, Fortunatuz hag Akaikuz, rak lec’hiet o deus en hoc’h ezvezañs,

¹⁸ kreñvaet o deus va spered hag hoc’h hini. Bezit eta leun a zoujañs evit ar seurt tud-se.

¹⁹ Ilizoù Azia a salud ac’hanoc’h. Akilaz ha Prisilha, gant an Iliz a zo en o zi, a salud kalz ac’hanoc’h en Aotrou.

²⁰ An holl vreudeur a salud ac’hanoc’h. En em saludit an eil egile dre ur pok santel.

²¹ Me Paol, a salud ac’hanoc’h eus va dorn va-unan.

²² Ma ez eus unan bennak na gar ket an Aotrou Jezuz-Krist, ra vo milliget! Maranata!

²³ Gras hon Aotrou Jezuz-Krist ra vo ganeoc’h!

²⁴ Va c’harantez a zo ganeoc’h holl e Jezuz-Krist! Amen.