1 Korintiz 10 - Bibl Koad 21: Ar Bibl e Brezhoneg evit ar Vretoned

Pennad 10 Skouerioù tennet eus istor Israel

¹ Breudeur, ne fell ket din e vefec’h hep gouzout eo bet hon tadoù holl dindan ar goabrenn, o deus tremenet holl a-dreuz ar mor,

² int bet holl badezet dindan Moizez er goabrenn hag er mor,

³ o deus debret holl eus an hevelep boued speredel,

⁴ hag o deus evet holl eus an hevelep evaj speredel, rak evañ a raent eus ar roc’h speredel a heulie anezho, hag ar roc’h-se a oa Krist.

⁵ Met Doue ne gavas ket e blijadur e darn vuiañ anezho rak kouezhañ a rejont el lec’h distro.

⁶ Hag an traoù-se a zo c’hoarvezet evit servijañ da skouer deomp, evit na c’hoantaimp ket traoù fall evel ma c’hoantajont-int.

⁷ Na zeuit ket da vezañ idolourien evel ma voe hiniennoù anezho, hervez ma’z eo skrivet: Ar bobl a azezas da zebriñ ha da evañ, ha goude e savjont d’en em laouenaat.

⁸ Na reomp ket a hudurniezh evel ma reas traoù hudur hiniennoù anezho, hag e kouezhas tri mil warn-ugent anezho en hevelep devezh.

⁹ Na demptomp ket Krist evel ma reas hiniennoù anezho hag a voe kaset da goll gant an naered.

¹⁰ Na c’hrozmolit ket evel ma c’hrozmolas hiniennoù anezho hag a voe lazhet gant an distrujer.

¹¹ An holl draoù-se a c’hoarvezas ganto evit servijañ da skouer, hag int bet skrivet evit hon deskadurezh, deomp-ni hag a zo deuet d’an amzerioù diwezhañ.

¹² Evel-se an hini a gred bezañ en e sav, ra ziwallo da gouezhañ

¹³ Temptadur ebet n’eo deuet deoc’h ha na vefe ket kumun d’an dud. Met Doue a zo feal ha ne lezo ket ho temptañ en tu all d’ho nerzh ha, gant an temptadur, e tiskouezo ivez an hent da zont er-maez evit ma c’hellot e c’houzañv.

Taol an Aotrou ha taol an diaouled

¹⁴ Dre-se, va re garet-mat, tec’hit diouzh an idolerezh.

¹⁵ Komz a ran deoc’h evel da dud a skiant. Barnit hoc’h-unan ar pezh a lavaran.

¹⁶ An hanaf a vennozh a vennigomp, ha n’eo ket ar genunvaniezh ouzh gwad Krist? Ar bara a dorromp, ha n’eo ket ar genunvaniezh ouzh korf Krist?

¹⁷ Evel ma ez eus ur bara hepken, ni evidomp da vezañ kalz n’omp nemet ur c’horf hepken, rak holl hon eus lod en hevelep bara.

¹⁸ Sellit ouzh Israel hervez ar c’hig. Ar re a zebr aberzhoù, ha n’o deus ket kenunvaniezh gant an aoter?

¹⁹ Petra a lavaran eta? Ez eo an idol un dra bennak? Pe ez eo ar pezh a zo aberzhet d’an idol un dra bennak.

²⁰ Met e lavaran penaos ar pezh a vez aberzhet gant ar baganed, en aberzhont d’an diaouled ha nann da Zoue. Ha ne fell ket din ho pefe kenunvaniezh gant an diaouled.

²¹ Ne c’hellit ket evañ hanaf an Aotrou hag hanaf an diaouled. Ne c’hellit ket kemer lod ouzh taol an Aotrou hag ouzh taol an diaouled.

²² Ha fellout a ra deomp hegasiñ gwarizi an Aotrou? Ha kreñvoc’h ez omp egetañ?

Frankiz ar gristenien

²³ Pep tra a zo aotreet din, met pep tra n’eo ket talvoudus. Pep tra a zo aotreet din, met pep tra ne genteilh ket.

²⁴ Ra ne glasko den e vad e-unan, met ra glasko pep hini mad ar re all.

²⁵ Debrit eus kement a werzher er gigerezh hep ober goulenn ebet en abeg d’ar goustiañs,

²⁶ rak: D’an Aotrou eo an douar ha kement a zo ennañ.

²⁷ Mar ped un den difeiz ac’hanoc’h, ha mar fell deoc’h mont gantañ, debrit eus ar pezh a vo lakaet dirazoc’h, hep goulenn netra en abeg d’ar goustiañs.

²⁸ Met mar lavar unan bennak deoc’h: An dra-mañ a zo bet aberzhet d’an idoloù, na zebrit ket abalamour d’an hini en deus roet deoc’h an ali-se hag en abeg d’ar goustiañs, rak: D’an Aotrou eo an douar ha kement a zo ennañ.

²⁹ Met ar goustiañs a lavaran n’eo ket da hini met koustiañs egile. Rak abalamour da betra e vefe barnet va frankiz gant koustiañs unan all?

³⁰ Mar debran en ur drugarekaat, perak e vefen tamallet evit un dra a drugarekaan evitañ?

³¹ Pe eta e tebrit, pe ec’h evit, pe e rit un dra bennak all, grit holl evit gloar Doue.

³² Na roit ket da gavout tamall, na d’ar Yuzevien, na d’ar C’hresianed, na da Iliz Doue,

³³ eveldon me ivez a fell din plijout d’an holl en holl draoù hep klask va mad va-unan, met o klask hini kalz evit ma vint salvet.