1 Danevelloù 28 - Bibl Koad 21: Ar Bibl e Brezhoneg evit ar Vretoned

Pennad 28

¹ David a zastumas e Jeruzalem holl bennoù Israel, pennoù ar meuriadoù, pennoù ar c'hevrennoù a servije ar roue, ar pennoù a vilieroù, ar pennoù a gantoù, ar re a velestre holl vadoù hag holl dropelloù ar roue, e vibien, ar spazhidi, an dud kadarn hag ar vrezelourien galonek.

² Hag ar roue David a savas war e dreid hag a lavaras: Va breudeur ha va fobl, selaouit-me! C'hoant am boa da sevel un ti diskuizh da arc'h emglev an AOTROU , hag evit skabell treid hon Doue, ha prest e oan d'ober.

³ Met Doue en deus lavaret din: Ne savi ket un ti da'm anv, dre ma'z out un den a vrezel ha gwad ac'h eus skuilhet.

⁴ An AOTROU Doue Israel en deus va dibabet a-douez holl di va zad evit bezañ roue war Israel da viken. Rak dibabet en deus Juda evel rener, hag a-douez ti Juda, dibabet en deus ti va zad, hag a-douez mibien va zad, kemeret en deus plijadur ennon, evit va lakaat da ren war holl Israel.

⁵ Hag a-douez va holl vibien, rak an AOTROU en deus roet din kalz mibien, dibabet en deus va mab Salomon, evit e lakaat da azezañ war dron rouantelezh an AOTROU war Israel.

⁶ Hag en deus lavaret din: Salomon da vab eo a savo va zi ha va leurennoù, rak e zibabet em eus evidon evel mab, ha me a vo evitañ un tad.

⁷ Ha me a startaio e rouantelezh da viken, ma en em stag d'ober hervez va gourc'hemennoù ha va barnedigezhioù evel hiziv.

⁸ Bremañ eta, dirak daoulagad holl Israel, bodadeg an AOTROU , ha dirak hon Doue a glev, mirit ha klaskit holl c'hourc'hemennoù an AOTROU ho Toue, evit ma perc'hennot ar vro vat-mañ, ha ma roiot anezhi da hêrezh d'ho mibien war ho lerc'h da viken.

⁹ Ha te, Salomon va mab, anavez Doue da dad, servij-eñ gant ur galon eeun hag un ene youlus, rak an AOTROU a furch an holl galonoù hag a anavez pep mennad eus ar soñjoù. Mar klaskez anezhañ, e vo kavet ganit, met mar dilez anezhañ, ez taolo kuit da viken.

¹⁰ Taol evezh bremañ, an AOTROU en deus da zibabet evit sevel un ti evel santual. En em galoneka, ha dit da labourat.

¹¹ David a roas da Salomon e vab skouer ar porched, ar savadurioù, ar c'hambroù-teñzor, ar c'hambroù uhel, ar c'hambroù-diabarzh hag al lec'h-a-drugarez;

¹² reiñ a reas ar skouer eus an holl draoù en doa bet dre ar Spered, evit leurennoù ti an AOTROU , evit an holl gambroù tro-dro, evit teñzorioù ti an AOTROU , evit teñzorioù an traoù santel,

¹³ evit kevrennoù an aberzhourien hag al Levited, evit holl labour ar servij e ti an AOTROU , evit holl listri ar servij e ti an AOTROU ;

¹⁴ reiñ a reas an traoù-aour gant ar pouez a aour evit holl listri a bep servij, an traoù-arc'hant gant ar pouez evit holl listri a bep servij;

¹⁵ reiñ a reas ar pouez eus ar c'hantolorioù aour hag eus o lampoù aour gant pouez pep kantolor hag e lampoù, pouez ar c'hantolorioù arc'hant gant pouez pep kantolor hag e lampoù, hervez implij pep kantolor;

¹⁶ reiñ a reas an aour dre bouez evit taolioù baraoù a ginnig, evit pep taol, an arc'hant evit an taolioù arc'hant,

¹⁷ aour glan evit ar fourchetezioù, ar c'hirinoù, an hanafoù, hag evit al listri aour gant pouez pep lestr, ha gant pouez pep lestr arc'hant;

¹⁸ aour puraet dre bouez evit aoter an ezañs; reiñ a reas skouer ar c'harr hag ar cherubined aour a astenne o eskell hag a c'holoe arc'h emglev an AOTROU .

¹⁹ Kement-se holl a zo dre skrid eus dorn an AOTROU , ha roet en deus din da gompren holl labourioù ar skouer-se.

²⁰ David a lavaras eta da Salomon: En em galoneka ha bez kreñv, ha dit da labourat; na spont ket ha na'z pez ket aon, rak an AOTROU Doue, va Doue, a vo ganit, ne zilaosko ket ac'hanout, ne zilezo ket ac'hanout, ken na vo echuet ganit an holl labour evit servij ti an AOTROU .

²¹ Ha setu kevrennoù an aberzhourien hag al Levited a zo evit holl servij ti Doue. Ha bez' e vo ganit evit an holl labour-se an holl dud a-youl-vat, ampart evit servijoù a bep seurt, hag ar pennoù hag an holl bobl prest d'ober kement a lavari.