1 Danevelloù 27 - Bibl Koad 21: Ar Bibl e Brezhoneg evit ar Vretoned

Pennad 27

¹ Mibien Israel hervez o niveradur, pennoù-tadoù, pennoù a vilieroù hag a gantoù, hag o ofiserien a oa e servij ar roue evit kement a selle ouzh ar c'hevrennoù, ar re a zeue e-barzh hag ar re a yae kuit, miz goude miz e-pad holl mizioù ar bloaz, pep kevrenn o vezañ pevar mil den warn-ugent.

² War ar gevrenn gentañ, evit ar miz kentañ, e oa Jashobeam mab Zabdiel; hag e gevrenn he doa pevar mil den warn-ugent;

³ eus mibien Perez e oa, ha penn holl gabitened an arme er miz kentañ.

⁴ War gevrenn an eil miz e oa Dodai an Akokiad; Miklod a oa ivez ur rener eus e gevrenn; hag e gevrenn he doa pevar mil den warn-ugent.

⁵ Penn an deirvet arme, evit an trede miz, a oa Benaja mab ar penn-aberzhour Jehojada; hag e gevrenn he doa pevar mil den warn-ugent;

⁶ ar Benaja-mañ a oa kalonek e-touez an tregont, hag a-us d'an tregont; en e gevrenn e oa Amizadab e vab.

⁷ Ar pevare, evit ar pevare miz, a oa Asael breur Joab, ha Zebadia e vab war e lerc'h; hag e gevrenn he doa pevar mil den warn-ugent.

⁸ Ar pempvet, evit ar pempvet miz, a oa ar penn Shamhud eus Jizrak; hag e gevrenn he doa pevar mil den warn-ugent.

⁹ Ar c'hwec'hvet, evit ar c'hwec'hvet miz, a oa Ira mab Ikkesh; hag e gevrenn he doa pevar mil den warn-ugent.

¹⁰ Ar seizhvet, evit ar seizhvet miz, a oa Helez ar Peloniad, eus mibien Efraim; hag e gevrenn he doa pevar mil den warn-ugent.

¹¹ An eizhvet, evit an eizhvet miz, a oa Sibbekai an Hushaiad, eus tiegezh ar Zerakiz; hag e gevrenn he doa pevar mil den warn-ugent.

¹² An navet, evit an navet miz, a oa Abiezer eus Anatod, eus ar Venjaminiz; hag e gevrenn he doa pevar mil den warn-ugent.

¹³ An dekvet, evit an dekvet miz, a oa Maharai eus Netofa, eus tiegezh ar Zerakiz; hag e gevrenn he doa pevar mil den warn-ugent.

¹⁴ An unnekvet, evit an unnekvet miz, a oa Benaja ar Piratoniad, eus mibien Efraim; hag e gevrenn he doa pevar mil den warn-ugent.

¹⁵ An daouzekvet, evit an daouzekvet miz, a oa Heldai eus Netofa, eus tiegezh Otniel; hag e gevrenn he doa pevar mil den warn-ugent.

¹⁶ Ha setu amañ ar re a oa war veuriadoù Israel. Rener ar Rubeniz a oa Eliezer mab Zikri; eus ar Simeoniz, Shefatia mab Maaka;

¹⁷ eus al Levited, Hashabia mab Kemuel; eus re Aaron, Zadok;

¹⁸ eus Juda, Elihu eus breudeur David; eus Isakar, Omri mab Mikael;

¹⁹ eus Zabulon, Jishmaeja mab Abdia; eus Neftali, Jerimod mab Azriel;

²⁰ eus mibien Efraim, Hoshea mab Azazia; eus hanter-veuriad Manase, Joel mab Pedaja;

²¹ eus hanter-veuriad all Manase e Galaad, Jiddo mab Zakaria; eus Benjamin, Jaasiel mab Abner;

²² eus Dan, Azareel mab Jerokam. Ar re-se a voe renerien meuriadoù Israel.

²³ David ne reas ket niveradeg an Israeliz adalek an oad a ugent vloaz hag izeloc'h, rak an AOTROU en doa lavaret e kreskfe Israel evel stered an neñvoù.

²⁴ Joab mab Zeruja en doa staget gant o niveradeg, met n'echuas ket rak ar gounnar a zeuas war Israel en abeg da-se. Hag o niver ne oa ket kontet e niveradeg Danevelloù ar roue David.

²⁵ Azmaved mab Adiel a oa lakaet war deñzorioù ar roue; Jonatan mab Ozia war an tiez-dastum a oa war ar maez, er c'hêrioù, er c'hêriadennoù hag er c'hreñvlec'hioù;

²⁶ Ezri mab Kelub war oberourien ar parkeier o labourat an douar;

²⁷ Shimei eus Rama war ar gwini; Zabdi eus Shefam war broduerezh ar gwini evit an tiez-dastum a win;

²⁸ Baal-Hanan eus Geder war an olived hag ar sikamor a oa er blaenenn; Joaz war an tiez-dastum a eoul;

²⁹ Shitrai eus Saron war ar saout o peuriñ e Saron; Shafad mab Adlai war ar saout o peuriñ en traoniennoù;

³⁰ Obil an Ismaelad war ar c'hañvaled; Jekdia ar Meronotiad war an azenezed;

³¹ Jaziz an Hagareniad war an deñved. An holl re-se a oa melestrourien ar madoù a oa d'ar roue David.

³² Jonatan, eontr David, a oa kuzulier, den poellek ha skrib; Jehiel mab Hakmoni a oa tost da vibien ar roue;

³³ Akitofel a oa kuzulier ar roue; Hushai an Arkian a oa mignon ar roue;

³⁴ goude Akitofel e voe Jehojada mab Benaja, hag Abiatar; Joab a oa pennjeneral arme ar roue.