1 Danevelloù 19 - Bibl Koad 21: Ar Bibl e Brezhoneg evit ar Vretoned

Pennad 19

¹ Goude-se e varvas Nakash roue mibien Ammon, hag e vab a renas war e lerc'h.

² David a lavaras: Madelezhus e vin e-keñver Hanun mab Nakash, rak e dad a zo bet madelezhus em c'heñver. David a gasas kannaded evit e frealziñ diwar-benn e dad. Servijerien David a zeuas da vro mibien Ammon da gavout Hanun, evit e frealziñ.

³ Met pennoù mibien Ammon a lavaras da Hanun: Ha soñjal a rez e vefe kaset frealzerien gant David evit enoriñ da dad? Ha n'eo ket evit imbourc'hiñ, distrujañ ha spiañ ar vro ez eo deuet e servijerien da'z kavout?

⁴ Hag Hanun a dapas servijerien David, a douzas anezho, a droc'has o dilhad dre ar c'hreiz betek krec'h an divorzhed, hag o c'hasas kuit.

⁵ Hag e teujod da lavarout da Zavid ar pezh a oa bet graet d'an den-se, hag e kasas tud en arbenn dezho, rak mezhek-tre e oa an dud-se. Ar roue a lavaras dezho: Chomit e Jeriko ken na vo bountet ho parv, ha neuze e tistroiot.

⁶ Mibien Ammon a welas e oant bet kasaus e-keñver David. Hanun ha mibien Ammon a gasas mil talant arc'hant evit goprañ kirri ha marc'hegerien e-kichen ar Siriz eus Mezopotamia hag ar Siriz eus Maaka ha Zoba.

⁷ Hag e c'hoprjont daou vil karr ha tregont, ha roue Maaka hag e bobl a zeuas hag a gampas dirak Medeba. Mibien Ammon en em zastumas eus o c'hêrioù hag a zeuas evit ober brezel.

⁸ David, o vezañ klevet kement-se, a gasas Joab hag e holl arme, tud kadarn.

⁹ Mibien Ammon a yeas er-maez hag en em renkas evit an emgann a-dal da zor kêr. Ar rouaned a oa deuet a oa a-du war ar maez.

¹⁰ Joab, o welout e oa an arme troet a-enep dezhañ a-dreñv hag a-raok, a zibabas soudarded a-douez holl re wellañ Israel, hag o renkas a-enep ar Siriz,

¹¹ hag e roas renerezh an nemorant eus ar bobl da Abishai e vreur, hag o renkas a-enep mibien Ammon.

¹² Hag e lavaras: Mar bez kreñvoc'h egedon ar Siriz, e teui da'm sikour, ha mar bez kreñvoc'h egedout mibien Ammon, me a zeuio da'z sikour.

¹³ Bez kreñv, diskouezomp kalon evit hor pobl hag evit kêrioù hon Doue. Ra vo graet gant an AOTROU evel ma kavo mat.

¹⁴ Neuze Joab hag ar bobl a oa gantañ a dostaas evit stourm a-enep ar Siriz, met ar re-mañ a dec'has kuit dirazañ.

¹⁵ Mibien Ammon, o welout e tec'he ar Siriz, a dec'has kuit int ivez dirak Abishai breur Joab, hag ez ejont e kêr. Joab a zistroas da Jeruzalem.

¹⁶ Ar Siriz, o welout e oant bet trec'het gant Israel, a gasas kannaded da lakaat da zont ar Siriz a oa en tu all d'ar stêr. Shofak penn arme Hadarezer a rene anezho.

¹⁷ Kement-se a voe lavaret da Zavid, a zastumas holl Israel, a dremenas ar Jordan, a yeas etrezek enno, hag en em renkas en o enep. David en em renkas a-enep ar Siriz, hag e stourmjont en e enep.

¹⁸ Hag ar Siriz a dec'has dirak Israel. David a zistrujas seizh mil karr siriat, daou-ugent mil troadeg a voe lazhet, ha Shofak penn an arme.

¹⁹ Servijerien Hadarezer, o welout e oant bet pilet gant Israel, a reas peoc'h gant David, hag e voent sujet dezhañ. Hag ar Siriz ne fellas ken dezho skoazellañ mibien Ammon.