1 Danevelloù 17 - Bibl Koad 21: Ar Bibl e Brezhoneg evit ar Vretoned

Pennad 17

¹ Pa voe staliet David en e di, e lavaras da Natan ar profed: Setu emaon o chom en un ti sedrez, hag arc'h emglev an AOTROU a zo dindan pallinier.

² Natan a lavaras da Zavid: Gra kement a zo ez kalon, rak Doue a zo ganit.

³ Ha setu en noz-se e voe disklêriet komz Doue da Natan o lavarout:

⁴ Kae ha lavar da Zavid va servijer: Evel-henn e komz an AOTROU: N'eo ket te a savo un ti din evit chom ennañ.

⁵ Rak n'on ket bet o chom en un ti abaoe an deiz ma em eus lakaet Israel da bignat betek hiziv, met bet on eus teltenn da deltenn, hag eus un tabernakl d'egile.

⁶ E pep lec'h ma em eus kerzhet gant holl Israel, daoust hag em eus komzet diwar-benn-se da unan eus barnerien Israel am boa gourc'hemennet dezho peuriñ va fobl, o lavarout: Perak n'hoc'h eus ket savet din un ti?

⁷ Bremañ e komzi evel-henn da Zavid va servijer: Evel-henn e komz AOTROU an armeoù: Da gemeret em eus er peurvanoù e-kichen an deñved, evit bezañ penn war va fobl Israel,

⁸ bet on ganit dre holl lec'h ma ec'h eus kerzhet, distrujet em eus da holl enebourien dirazout, graet em eus dit un anv evel anv ar re vras a zo war an douar,

⁹ reiñ a rin ul lec'h da'm fobl Israel hag e plantin anezho, hag e vint o chom el lec'h-se, ha ne vint ken dilec'hiet; mibien an direizhder ne wastint ken anezho evel diagent,

¹⁰ abaoe an deizioù ma em eus lakaet barnerien war va fobl Israel. Izelaet em eus da holl enebourien, hag e kemennan dit penaos an AOTROU a savo un ti dit.

¹¹ Pa vo peurechu da zeizioù hag ez i kuit gant da dadoù, e savin da lignez war da lerc'h, unan eus da vibien, ha me a startaio e ren.

¹² Eñ eo a savo din un ti, ha me a startaio e dron da viken.

¹³ Me a vo evitañ un tad, hag eñ a vo evidon ur mab, ha ne lamin ket digantañ va gras, evel ma em eus he zennet digant an hini a oa ez raok.

¹⁴ Me a ziazezo anezhañ em zi hag em rouantelezh da viken, hag e zron a vo startaet da viken.

¹⁵ Natan a gomzas ouzh David hervez an holl gomzoù-se hag hervez an holl weledigezh-se.

¹⁶ Neuze ar roue David a zeuas d'en em zerc'hel dirak an AOTROU , hag a lavaras: Piv ez on, AOTROU Doue? Ha petra eo va zi ma ec'h eus va degaset betek amañ?

¹⁷ Met nebeut a dra eo da'z taoulagad, o Doue! Komzet ec'h eus diwar-benn ti da servijer evit un amzer bell, hag ec'h eus sellet ouzhin evel ouzh un den a renk uhel, o AOTROU Doue!

¹⁸ Petra a c'hellfe David lavarout dit diwar-benn an enor a rez da'z servijer? Anavezout a rez da servijer.

¹⁹ O AOTROU! Abalamour da'z servijer, hag hervez da galon, ec'h eus graet an holl draoù bras-se, evit reiñ da anavezout an holl draoù bras-se.

²⁰ O AOTROU! Nikun n'eo heñvel ouzhit, ha n'eus Doue all ebet nemedout, hervez kement hon eus klevet gant hon divskouarn.

²¹ Ha bez' ez eus war an douar ur vroad heñvel ouzh da bobl Israel, a zo bet dasprenet gant Doue evit ober anezhi e bobl, hag evit ober dit un anv dre draoù bras ha spontus, en ur gas kuit broadoù dirak da bobl ac'h eus dasprenet eus an Ejipt?

²² Lakaet ec'h eus da bobl Israel evit bezañ da bobl da viken, ha te, AOTROU , te a zo deuet o Doue.

²³ Ha bremañ, AOTROU , ra vo start da viken an traoù ac'h eus disklêriet diwar-benn da servijer hag e di, ha gra evel ma ec'h eus lavaret!

²⁴ Ra vo startaet, ra vo meuraet da anv da viken, evit ma vo lavaret: AOTROU an armeoù, Doue Israel, a zo Doue evit Israel! Ha ra vo ti David da servijer startaet dirazout!

²⁵ Rak te da-unan, va Doue, te ac'h eus disklêriet da'z servijer e savfe un ti dezhañ. Setu perak en deus kredet da servijer pediñ dirazout.

²⁶ Ha bremañ, AOTROU , te a zo Doue, ha prometet ec'h eus da'z servijer an eurvad-se.

²⁷ Ra blijo ganit bremañ bennigañ ti da servijer, evit ma vo da viken dirazout! Rak ar pezh a vennigez, AOTROU , a zo benniget da viken.