1 Danevelloù 16 - Bibl Koad 21: Ar Bibl e Brezhoneg evit ar Vretoned

Pennad 16

¹ Degas a rejont eta arc'h Doue, hag e lakajont anezhi e-kreiz an deltenn en doa savet David. Hag e voe kinniget loskaberzhoù hag aberzhoù a drugarekadennoù dirak Doue.

² P'en doe echu David da ginnig al loskaberzhoù hag an aberzhoù a drugarekadennoù, e vennigas ar bobl en anv an AOTROU .

³ Hag e lodennas d'an holl Israeliz, gwazed ha maouezed, da bep hini, ur varaenn, ul lodenn gig hag ur wastell rezin.

⁴ Hag e lakaas Levited evit ober ar servij dirak arc'h an AOTROU , evit eñvoriñ, trugarekaat ha meuliñ an AOTROU Doue Israel:

⁵ Azaf ar penn, Zakaria an eil, Jeiel, Shemiramod, Jehiel, Matitia, Eliab, Beneja, Obed-Edom, Jeiel. Ganto e oa binvioù, lourennoù ha telennoù, hag Azaf a sone gant simbalennoù.

⁶ An aberzhourien Benaja ha Jakaziel a sone dalc'hmat gant trompilhoù dirak arc'h emglev Doue.

⁷ En deiz-se, evit ar wech kentañ, David a roas da Azaf ha d'e vreudeur ar garg eus meuliñ an AOTROU , evel-henn:

⁸ Meulit an AOTROU , pedit e anv, roit da anavezout e-touez ar pobloù e oberoù bras!

⁹ Kanit dezhañ, salmit dezhañ, komzit eus e holl vurzhudoù!

¹⁰ Lakait ho kloar en e anv santel! Ra laouenaio kalon ar re a glask an AOTROU!

¹¹ Klaskit an AOTROU hag e nerzh, klaskit dalc'hmat e zremm!

¹² Ho pet soñj eus ar burzhudoù en deus graet, eus e virakloù hag eus barnedigezhioù e c'henoù,

¹³ lignez Israel e servijer, mibien Jakob e zibabet!

¹⁴ Eñ eo an AOTROU hon Doue, e varnedigezhioù a zo war an douar holl.

¹⁵ Ho pet soñj da viken eus e emglev, eus e bromesa a reas evit mil rummad,

¹⁶ eus an emglev a reas gant Abraham, eus al le a reas da Izaak,

¹⁷ hag a startaas e Jakob evit bezañ ur reol, evit bezañ da Israel un emglev peurbadus,

¹⁸ o lavarout: Me a roio dit bro Ganaan, lod ho hêrezh eo.

¹⁹ Pa ne oant nemet un dornad tud, nebeut anezho ha diavaezidi er vro,

²⁰ o vont a vroad da vroad hag a rouantelezh d'ur rouantelezh all,

²¹ ne lezas den d'o gwaskañ, hag e kastizas rouaned abalamour dezho,

²² o lavarout: Na stokit ket ouzh va olevidi, na rit ket a zroug da'm frofeded!

²³ Kanit d'an AOTROU , tud an douar holl! Embannit e silvidigezh a zeiz da zeiz!

²⁴ Disklêriit e c'hloar e-touez ar broadoù, e vurzhudoù e-touez an holl bobloù!

²⁵ Rak an AOTROU a zo bras ha din a veuleudioù uhel. Burzhudus eo dreist an holl zoueoù,

²⁶ rak holl zoueoù ar pobloù a zo idoloù, met an AOTROU a reas an neñvoù.

²⁷ Ar gaerded hag ar veurded a zo dirazañ, an nerzh hag al levenez a zo en e chomlec'h.

²⁸ Roit d'an AOTROU , tiegezhioù ar pobloù, rentit d'an AOTROU gloar ha nerzh!

²⁹ Rentit d'an AOTROU ar c'hloar dleet d'e anv. Degasit ar profoù, ha deuit dirazañ. Stouit dirak an AOTROU en ur c'haerder santel!

³⁰ Krenit dirazañ, tud an douar holl! Start eo ar bed ha ne vrañsell ket.

³¹ Ra laouenaio an neñvoù ha ra drido an douar gant levenez! Ra vo lavaret e-touez ar broadoù: An AOTROU a ren!

³² Ra dregerno ar mor gant kement a zo ennañ, ra laouenaio ar maezioù ha kement a zo enno,

³³ ra gano a levenez holl wez ar c'hoadoù dirak an AOTROU! Rak dont a ra, dont a ra da varn an douar.

³⁴ Kinnigit trugarekadennoù d'an AOTROU rak mat eo, rak e drugarez a bad da viken!

³⁵ Lavarit: Salv-ni, o Doue hor silvidigezh, hag hon dastum hag hon tenn a-douez ar broadoù, evit ma veulimp da anv santel, ha ma kavimp gloar en da veuleudioù.

³⁶ Benniget ra vo an AOTROU , Doue Israel, a gantved da gantved, ha ma lavaro an holl bobl: Amen! Meulit an AOTROU!

³⁷ Hag e voe lezet eno, dirak arc'h emglev an AOTROU , Azaf hag e vreudeur, evit ober dalc'hmat ar servij dirak an arc'h, hervez ar pezh a zo d'ober bemdez;

³⁸ hag Obed-Edom gant e vreudeur, eizh ha tri-ugent, Obed-Edom mab Jedutun hag Hosa evel porzhierien;

³⁹ ha Zadok an aberzhour gant e vreudeur aberzhourien, dirak tabernakl an AOTROU , war an uhellec'h a oa e Gabaon,

⁴⁰ evit kinnig dalc'hmat loskaberzhoù d'an AOTROU war aoter al loskaberzhoù, da vintin ha d'abardaez, hag evit ober hervez kement a zo skrivet e lezenn an AOTROU , a zo bet urzhiet gantañ da Israel;

⁴¹ ha ganto e oa Heman ha Jedutun, hag ar re all a oa bet dibabet ha merket dre o anv evit meuliñ an AOTROU , rak e vadelezh a bad da viken;

⁴² ganto e oa Heman ha Jedutun, gant trompilhoù ha simbalennoù evit ar re a lakae anezho da seniñ, ha gant binvioù evit Doue; mibien Jedutun a oa porzhierien.

⁴³ Hag an holl bobl a yeas kuit, pep hini d'e di. David a zistroas da vennigañ e di.