1 Danevelloù 15 - Bibl Koad 21: Ar Bibl e Brezhoneg evit ar Vretoned

Pennad 15

¹ David a savas tiez evitañ e-unan e kêr David, hag e kempennas ul lec'h evit arc'h Doue, hag e savas un deltenn eviti.

² Lavarout a reas: Arc'h Doue ne zle bezañ douget nemet gant al Levited, rak an AOTROU en deus dibabet anezho evit ober he servij da viken.

³ David a zastumas holl Israel e Jeruzalem, evit degas arc'h an AOTROU betek al lec'h en doa kempennet dezhi.

⁴ David a zastumas mibien Aaron hag al Levited:

⁵ eus mibien Kehad, Uriel ar penn hag e vreudeur, kant ugent;

⁶ eus mibien Merari, Asaja ar penn hag e vreudeur, daou c'hant ugent;

⁷ eus mibien Gershon, Joel ar penn hag e vreudeur, kant tregont;

⁸ eus mibien Elizafan, Shemaja ar penn hag e vreudeur, daou c'hant;

⁹ eus mibien Hebron, Eliel ar penn hag e vreudeur, pevar-ugent;

¹⁰ eus mibien Uziel, Aminadab ar penn hag e vreudeur, kant daouzek.

¹¹ David a c'halvas Zadok hag Abiatar an aberzhourien, hag al Levited Uriel, Asaja, Joel, Shemaja, Eliel hag Aminadab,

¹² hag e lavaras dezho: C'hwi hag a zo pennoù tadoù al Levited, en em santelait, c'hwi hag ho preudeur, ha degasit arc'h an AOTROU Doue Israel betek al lec'h ma em eus kempennet dezhi.

¹³ Dre ma ne oac'h ket aze ar wech kentañ, an AOTROU hon Doue a reas un toull-freuz en hon touez, rak n'hon eus ket e glasket hervez ma'z eo urzhiet deomp.

¹⁴ An aberzhourien hag al Levited en em santelajont, evit degas arc'h an AOTROU Doue Israel.

¹⁵ Mibien al Levited a zougas arc'h Doue war o skoazioù, gant ar barrennoù, evel m'en doa gourc'hemennet Moizez, hag hervez komz an AOTROU .

¹⁶ David a lavaras da bennoù al Levited dibab o breudeur, ar ganerien, gant o binvioù, lourennoù, telennoù ha simbalennoù, evit seniñ hag ober klevout o mouezhioù gant levenez.

¹⁷ Al Levited a zibabas: Heman mab Joel; a-douez e vreudeur, Azaf mab Berekia; a-douez mibien Merari o breudeur, Etan mab Kushaja;

¹⁸ ha ganto, o breudeur evit an eil renk, Zakaria, Ben, Jaaziel, Shemiramod, Jehiel, Unni, Eliab, Benaja, Maaseja, Matitia, Elifele, Mikneja, Obed-Edom, Jeiel, ar borzhierien.

¹⁹ Ar ganerien Haman, Azaf hag Etan o doa simbalennoù arem a lakaent da seniñ.

²⁰ Zakaria, Aziel, Shemiramod, Jeiel, Unni, Eliab, Maaseja ha Benaja o doa lourennoù war "Alamod"

²¹ Matitia, Elifele, Mikneja, Obed-Edom, Jeiel hag Azazia o doa telennoù gant eizh kordenn, evit ren ar c'han.

²² Kenania, penn al Levited evit an dougen, a rene an dougen, rak ampart e oa.

²³ Berekia hag Elkana a oa porzhierien evit an arc'h.

²⁴ Shebania, Jozafad, Netanael, Amasai, Zakaria, Benaja hag Eliezer, aberzhourien, a sone gant an trompilhoù dirak arc'h Doue. Obed-Edom ha Jekija a oa porzhierien evit an arc'h.

²⁵ David, henaourien Israel ha pennoù ar milieroù a yeas da gerc'hat arc'h emglev an AOTROU eus ti Obed-Edom, gant levenez.

²⁶ E-pad ma skoazelle Doue al Levited a zouge arc'h emglev an AOTROU , e voe aberzhet seizh kole ha seizh tourz.

²⁷ David a oa gwisket gant ur vantell lin fin, kenkoulz hag an holl Levited a zouge an arc'h, hag ar ganerien. Ha Kenania penn an dougen a oa gant ar ganerien. David en doa un efod lin warnañ.

²⁸ Holl Israel a zegasas arc'h emglev an AOTROU gant kriadennoù a levenez, ouzh son ar shofar, an trompilhoù hag ar simbalennoù, hag ouzh tregern al lourennoù hag an telennoù.

²⁹ Evel ma teue arc'h emglev an AOTROU e kêr David, Mikal merc'h Saül a sellas dre ar prenestr hag a welas ar roue David o lammat hag o tañsal. Hag e tisprizas anezhañ en he c'halon.