1 Danevelloù 12 - Bibl Koad 21: Ar Bibl e Brezhoneg evit ar Vretoned

Pennad 12

¹ Setu amañ ar re a yeas da gavout David da Ziklag, pa oa c'hoazh pellaet a-zirak Saül mab Kish. Int a oa e-touez an dud kadarn a skoazellas anezhañ er brezel,

² armet gant gwaregi, e c'hellent teurel mein gant o dorn dehou ha gant o dorn kleiz, ha tennañ biroù gant o gwareg. Eus Benjamin e oant, a-douez breudeur Saül:

³ Akiezer ar penn ha Joaz, mibien Shemaa eus Gibea; Jeziel ha Peled mibien Azmaved; Beraka; Jehu eus Anatod,

⁴ Jishmaeja ar Gabaoniad, kadarn e-touez an tregont, ha dreist an tregont; Jeremiaz; Jakaziel; Jokanan; Jozabad ar Gederatad;

⁵ Eluzai; Jerimod; Bealia; Shemaria; Shefatia an Harufian;

⁶ Elkana; Jishija; Azareel, Joezer ha Jashobeam, ar Gorahiz;

⁷ Joela ha Zebadia mibien Jerokam eus Gedor.

⁸ A-douez ar C'hadiz, tud kadarn en em dennas e-kichen David d'ar c'hreñvlec'h er gouelec'h, tud a vrezel evit an emgann, ampart da embregañ ar skoed hag ar goaf, heñvel o dremmoù ouzh dremmoù leoned, herrek evel gazeled war ar menezioù:

⁹ Ezer ar penn, Abdia an eil, Eliab an trede,

¹⁰ Mishmanna ar pevare, Jeremiaz ar pempvet,

¹¹ Atai ar c'hwec'hvet, Eliel ar seizhvet,

¹² Jokanan an eizhvet, Elzabad an navet,

¹³ Jeremiaz an dekvet, Makbanai an unnekvet.

¹⁴ Ar re-se, a-douez mibien Gad, a voe ofiserien an arme. Unan a-douez ar re zisterañ a dalveze kant, hag an hini brasañ mil.

¹⁵ Ar re-se eo a dreuzas ar Jordan er miz kentañ, pa zic'hlanne dreist d'e ribloù. Hag e lakajont da dec'hout holl dud an traoniennoù, eus ar sav-heol hag eus ar c'huzh-heol.

¹⁶ Reoù eus mibien Benjamin ivez a zeuas da gavout David er c'hreñvlec'h.

¹⁷ David a yeas er-maez war arbenn dezho hag a gemeras ar gomz o lavarout: Mard oc'h deuet e peoc'h etrezek ennon, evit va skoazellañ, va c'halon a vo unanet ganeoc'h, met mard eo evit va zouellañ evit mad va enebourien, pa n'on kablus eus feulster ebet, ra vo gwelet ha dinac'het kement-se gant Doue hon tadoù.

¹⁸ Neuze ar Spered a wiskas Amasai penn an tregont, a lavaras: Ni a zo dit, David, ha ganit, mab Jese! Peoc'h, Peoc'h dit! Ha peoc'h d'ar re a skoazell ac'hanout, rak Doue en deus da skoazellet! David a zegemeras anezho, hag o lakaas e-touez ofiserien e strolladoù.

¹⁹ Reoù eus Manase ivez a yeas da Zavid, pa zeuas gant ar Filistined d'ober brezel a-enep Saül mab Kish. Met ne sikourjont ket anezho, rak priñsed ar Filistined, goude bezañ en em guzuliet, en kasas kuit en ur lavarout: Tremen a raio d'e aotrou Saül, war-var hor pennoù.

²⁰ Pa zistroas da Ziklag, ar re-mañ eus Manase a yeas gantañ: Adnak, Jozabad, Jediael, Mikael, Jozabad, Elihu ha Ziltai, pennoù milieroù Manase.

²¹ Ar re-se a skoazellas David a-enep bandennoù, rak brezelourien gadarn e oant holl, hag e voent ofiserien en arme.

²² Ha bemdez e teue tud da Zavid evit e skoazellañ, betek ober ur c'hamp bras evel kamp Doue.

²³ Setu amañ niveradeg an dud harnezet evit an arme a zeuas da gavout David da Hebron, evit reiñ dezhañ rouantelezh Saül, hervez urzh an AOTROU:

²⁴ mibien Juda o tougen ar skoed hag ar goaf: c'hwec'h mil eizh kant, harnezet evit ar brezel;

²⁵ mibien Simeon: soudarded kadarn, seizh mil kant;

²⁶ mibien Levi: pevar mil c'hwec'h kant,

²⁷ ha Jehojada, priñs Aaron, ha tri mil seizh kant gantañ,

²⁸ ha Zadok, den yaouank kreñv ha kalonek, ha daou benn-brezel warn-ugent eus ti e dad;

²⁹ mibien Benjamin, breudeur Saül: tri mil, rak betek neuze an darn vuiañ anezho a oa manet stag ouzh ti Saül;

³⁰ mibien Efraim: ugent mil eizh kant den kreñv ha kalonek, brudet e ti o zadoù;

³¹ eus hanter-veuriad Manase: triwec'h mil, a voe anvet dre o anvioù evit mont da lakaat David da roue;

³² mibien Isakar, meizek evit merzout an amzerioù hag anavezout petra a rafe Israel: daou c'hant eus o ofiserien, hag o holl vreudeur dindan o urzh;

³³ eus Zabulon: hanter-kant mil o vont er-maez d'al lu, doareet evit an emgann, gant armoù ar brezel, evit derc'hel o renk, gant ur galon youlek;

³⁴ eus Neftali, mil penn-brezel, ha seizh mil ha tregont ganto, o tougen ar skoed hag ar goaf;

³⁵ eus Dan, eizh mil warn-ugent c'hwec'h kant, doareet evit an emgann;

³⁶ eus Aser, daou-ugent mil o vont d'an arme ha doareet evit an emgann;

³⁷ eus an tu all d'ar Jordan, eus ar Rubeniz , eus ar C'hadiz hag eus hanter-veuriad Manase, kant ugent mil, gant holl armoù ul lu e brezel.

³⁸ An holl re-se, tud a vrezel, o terc'hel o renk, a zeuas gant ur galon youlek da Hebron, evit lakaat David da roue war holl Israel. Hag holl nemorant Israel a oa ivez a-unvan evit lakaat David da roue.

³⁹ Hag e voent eno gant David, o tebriñ hag oc'h evañ e-pad tri devezh, rak o breudeur o doa aozet bevañs evito.

⁴⁰ Hag ar re zoken a oa tost dezho, betek Isakar, Zabulon ha Neftali, a gasas bevañs war ezen, war gañvaled, war vuled ha war ejened. Kas a rejont boued, bleud, fiez sec'h, rezin sec'h, gwin, eoul, saout ha deñved e-leizh, rak levenez a oa en Israel.