Warekaia Iteraera 9 - Te B'aib'ara

Tuua I bukin Te Toa are Te Riao

¹ I nanon moan nam'akainan aia kauoua n ririki Iteraera n te Rereua are Tinai, ao e tuangaki Moote iroun te UEA

² b'a e na taetae nakoia aomata ni kaangai, “Kam na kauringa te Riao n te tairiki

³ are te katebwi ma aua ni bongin te nam'akaina aei. Kam na irii kaetietin te Toa aei ngkana kam waakinna.

⁴ Ao Moote, e tuangiia aomata te b'ai are E taekinna te UEA,

⁵ ao a kauringa te Riao n tairikin te katebwi ma aua ni bongin te moan nam'akaina i nanon te rereua.

⁶ A a tia tabeman mairouia aomata n aia maeka Iteraera n riinga te mate, ao aikoa tau n taromauria te UEA, ao a aki riai naba ni kauringa te Riao. Ma a bubutiia Moote ma Aaron, ao a taku,

⁷ “Bukin tera ngkai ti na aki iriia raora aika Iteraera ni kauringa te Riao, ma te angakarea nakon te UEA ngkana ti a tia n riinga te mate?”

⁸ Ao e taku Moote, “Kam na taningaai b'a N na nako n rinnako n te Um'antabunrianna n ongora iroun te UEA b'a tera ana taeka iai.”

⁹ Ao E a manga tuanga Moote te UEA

¹⁰ b'a e na kaangai nakon te botaki n Iteraera: Ngkana tao arona b'a iai mai roumi ke mairouia kanoami ae riinga te mate, ao e a aki tau n taromauriai, ke ngkana tao kam mena i kiraroa n te kawai ae ananau, ao kam bon tangiria naba ni kan kauringa te Riao.

¹¹ Ma e na riai ni karaoaki n tairikin te katebwi ma aua ni bongin te kauoua n nam'akaina. Kam na kana te tiibu te teei n te Riao ma te kariki ae aki karikaki, ao te baanikaai ae mao,

¹² ao tai katuka teutana nakon te ingabong, ke n otea riin te man. Ururingnga n iri kaetieti aikai.

¹³ Ma ngkana iai i roumi ae rawa ni karaoa te Riao ngkana kam aki m'ananga nako kiraroa, ao e na katinanikuaki. E na bon katuaeaki i bukina ngke e aki anga karea nako Iu n te tai ae riai.

¹⁴ A kona aomata nako, n ikotaki ma iruwa ake a maeka i buakomi ni kauringa te Riao ngkana a iri taiani kaetieti ni kabane.”

Te Nang i aon Te Um'antabunrianna

¹⁵ Ao ngke e a tib'a tei te Um'antabunrianna, ao e a kaoti naba te nang ae matenten n rabuna aon te Um'antabunrianna.

¹⁶ Ao e tiitiku te nang n te tabo arei n te ngaina ae koraki. Ao n te tairiki, e a manga riki b'a te ai.

¹⁷ E kamanena te nang aei te UEA n tuangiia Iteraera b'a n ningai ae a na kam'ainga iai aia auti n rianna, ao ni manga kateia ia.

¹⁸ Ngkana e rabuna te Um'antabunrianna te nang arei, ao a bon aoriia Iteraera n aki kab'arai aia auti n rianna.

¹⁹ Ma ngkana e m'aing nako te nang, ao a iria nako naba, ao ngkana e tei, ao a manga katei naba aia auti n rianna ma n tiku ikanne,

²⁰ e ngae ngkana ti teuana te tairiki ke tabebong, ke teuana te nam'akaina, ke teuana te ririki.

²¹ Ngkana e tiku te nang i aon te Um'antabunrianna, ao a bon tiku Iteraera n aia tabo.

²² Ao ngkana e m'ananga te nang, ao a m'ananga naba Iteraera.

²³ A ongotaeka nakon Ana babaaire te UEA, ao a m'ananga nakon are E tuangiia te UEA, b'a a na nako iai.