Warekaia Iteraera 5 - Te B'aib'ara

Kanakoakiia Aomata Nako Tinanikun Te Maeka

¹ Ao e tuangaki Moote iroun te UEA

² b'a e na kaangai nakoia Iteraera, “Kam na kanakoa ana auti n rianna te aomata ae rebera, ao ane meira te buri, ke ane e a tia n riinga rab'atan te mate.

³ B'a ngkai I maeka i buakoia au aomata, ao a na riai ni kateimatoa itiakin aia maeka.”

⁴ Ao a irii Ana kaetieti te UEA Iteraera.

Te Tuua I bukin Karaoan Te Bure

⁵ Ao e tuangaki Moote iroun te UEA

⁶ b'a e na kaangai nakon aia botaki Iteraera: Ngkana iai ane bure nakon raona, ao e a tia iai ni bure nako Iu.

⁷ Ko na riai ni kab'arai am bure, ma ni kabooa mwiin am urub'ai nakon te aomata are ko bure nako ina n te bo ae tab'anin, n ikotaki ma te 20 ni betienti

⁸ Ao ngkana tao arona b'a akea naba ana koraki te aomata are ko bure nako ina are e na butim'aea te m'ane ni kabomwi, ao e na riki b'a au b'ai, ao ko na angan te ibonga. Ao raonan te kabomwi anne, ko na uota te tiibu mm'aane nakon te ibonga b'a a aonga ni kab'araaki am bure.

⁹ Ngkana ko karaoa te anganano nakon te Um'antabunrianna, ao e na b'aina te m'ane aei te ibonga,

¹⁰ ao a na kaawakina aia b'ai ibonga ake a anganaki n tatabemaniia nako.

Te Ainenum'a Ae Kanamakinaki Ni Bure

¹¹ Ao te UEA, E tuanga Moote

¹² b'a e na kaangai nakoia Iteraera:

¹³ Ngkana arona b'a ko kokoo n am kanamakin b'a e a tia ni bure buum,

¹⁴ ma akea am b'ai ni kakoaua.

¹⁵ E na kaira buuna nakon te ibonga, n ikotaki ma teuana te kirokuraem te b'araua ae te b'are b'a ana karea i bukin kakaeana b'a e bure ke e aki. Bon akea b'aan te oriwa ke te b'ai ni kaboiarara are na katokaaki i aon te karea aei.

¹⁶ E na katea te ainenum'a i matan au baonikarea,

¹⁷ ao e na kab'aroa te ran ae tabu nako nanon te tiaeki te katiibu, ma ni kab'aka i nanona bubun nanon te Um'antabunrianna tabeua ma ni kaboboa.

¹⁸ Ao i mwiin anne, ao te ibonga e kab'ara iran atuun neierei, ao i mwiina, e na anganna te karea are te b'are, man kaangai,

¹⁹ “Ngkana ko bon kakaonimaki nakon buum, ao e na aki kamaraia te ran aei nako im,

²⁰ ma ngkana ko a bon tia ni bure, ao e na ruoniko Ana kamaraia te UEA

²¹ ao ko na bon aki konaa ni kariki, ao a na bane ni kamaraia aram aomata nako.”

²² Ao i mwiina, e na kaangai te ainenum'a, “E na koro bukin am taeka aika ko taekin, ngkana I a bon tia ni bure.”

²³ E na koroi taian taeka ni kamaraia aikai te ibonga i aon te beeb'a, ao e na kateboa n te ran ae mao ni kamaunai iai koroboki,

²⁴ B'a e aonga n ae ngkana e nima te ran anne te ainenum'a, ao a na rin taeka ni kamaraia akanne i nanon rab'atana.

²⁵ E na ana te karea are te b'are mairouna, ao e na tabekiarake ni katabua nako Iu, Ngai ae te UEA. Ao i mwiina, e na katikua i aon au baonikarea,

²⁶ ma ni kabuoki m'akorona tabeua b'a te karea. Ao i mwiin aei, ao e na nima te ran are mao te ainenum'a anne.

²⁷ Ngkana arona b'a e a bon tia ni bure te ainenum'a, ao e na waekoa ni m'akuri te ran anne ni karikia b'a te aine ae tekebuaka i buakoia ana botannaomata.

²⁸ Ma e na bon aki maraia ngkana e bon tuai, ao e na bon teimatoa naba ni kakariki.

²⁹ Bon aei te botaki teuana are na karaoaki n au baonikarea ngkana arona b'a e kanamakina buuna temanna b'a e a tia ni bure.

³⁰ E na katea te ainenum'a i matan au baonikarea ma n iriri kaetieti aikai.

³¹ Ngkana arona b'a e kaairua ana katautau te mm'aane, ao e bon aki katuaaeaki naba te mm'aane, ma ngkana e reke ni bure neiere buuna, ao e na boni katuaaeaki buuna.