Warekaia Iteraera 36 - Te B'aib'ara

Tuua I bukin Te Aine Ae Mare, Ao Te Aba

¹ N te tai teuana, ao a m'ananga taani kairiri man utuun te kaainga are Kireata man te baronga are Manate ni kawara Moote, ao taani kairiri man aia utu Iteraera ake tabeua

² ao a taku, “Teuae ko karineaki, E a tia n taekinna te UEA b'a E na kaota te aba are na reke irouia baronga n tatabemaniia nako b'a abaia. Ao E a tia naba te UEA n tuangkami b'a kam na angan natin Terobeata aine ake ara koraki te aba are na bon reke nako ina ngke arona b'a e aki mate.

³ Ma ngkana a manga mare ma m'anen te baronga teuana irouia Iteraera, ao e na manga b'ainaki aia b'ai iroun te baronga anne, ao e nang nako mairoura, ao akea ara b'ai iai.

⁴ E ngae ngke a oki te aba nakon are bon oin abana n te Ririki ni Kaokib'ai, E na aki reke i roura aban Terobeata--e na riki b'a aia b'ai te baronga are iein nako iai natina aine.”

⁵ Ma ngaia are, e tuangiia aomata Moote te b'ai are E taekinna te UEA: A eti aia taeka m'anen te baronga are Manate aikai.

⁶ N na kariaia natin Terobeata aine b'a a na iein ma mm'aane, ma a na ti iein ma m'anen te kaainga teuana man te baronga are Manate.

⁷ Ao e na aki nako aban te baronga nakon te baronga teuana---e na bon tiku n te baronga are a bon anganaki.

⁸ N taai aika a na roko, ao a na riai n iein naati aine ake a b'aib'ai n te aba, ma mm'aane aika bon kaain aia baronga.

⁹ Akea ae na kanakoa aban te baronga nakon te baronga teuana n te iein nakon te baronga teuana.

¹⁰ Ao a ongotaeka natin Terobeata ake Nei M'ara, Nei Tireta, Nei Okera, Nei Mireka, ao Nei Nooa nakon te UEA

¹¹ ao a iein ma natin tarin tamaia,

¹² ao a teimatoa n riki b'a kaain te baronga are Manate. Ma ngaia are, a bon tiku abaia i nanon ana kaainga tamaia.

¹³ Ao bon aikai taian tua ake E anga te UEA nakoni Moote, ao Iteraera ngke a maeka n aaba ake a rinano i Moaba i rarikin te Karaanga are te Ioretan mai Ieriko.