Warekaia Iteraera 32 - Te B'aib'ara

Kaainakin Aaba Ake I Mainikun Te Karaanga Are Te Ioretan

¹ Ao a rangi ni m'aiti aia nanai ni kao ao n tiibu baronga ake Reuben, ao Kata, ao a nooria b'a a rangi n raraoi uteuten te aba are Iatera ma te aba are Kireata.

² Ma ngaia are, a nakon Moote ma Ereata, ao taani kairiri i rouia Iteraera, ao a taku,

³ “E a tia te UEA ni buokiira ni karekei aaba aika i rarikin kaawa aika Atarota, Ribon, Iatera, Nimra, Etibon, Ereare, Tebam, Nebo, ao Beon.

⁴ Bon taian aba aika a raoiroi uteuteia, ao ngaira a rangi ni m'aiti ara nanai ni kao, ao n tiibu,

⁵ Ko kona ni kariaia b'a ti na tiku ikai i mainikun te karaanga are te Ioretan ma ni b'aina te aba aei?”

⁶ Ao e kaeka Moote: Are nanona b'a kam nang tiku ikai, ao nikiraia Iteraera a na nako ni buaka?

⁷ Ngkana kam karaoa anne, ao e na bon riki b'a te kab'aranano nakoia tabem'aang, ao a na aki ri nanon te Ioretan nakon te aba are E berita iai te UEA nako ia.

⁸ Bon aei te b'ai are riki ngke I kanakoia ami bakatibu mai Kateti B'aanea b'a a na tuoa te aba.

⁹ A nako ni karokoa te M'arua are Etikora, ao a okirikaaki ma n tuangiia aomata b'a ti na aki rin n te aba.

¹⁰ E rangi n un te UEA.

¹¹ Ao E taku b'a bon akea temanna mai buakoia aomata aika a koro 20 aia ririki ni maiu ngke a kitana Aikubita ae na rin n te aba are E a tia ni berita iai nakon Aberaam, Itaaka, ao Iakob'a. Akea temanna maibuakoia aomata aikai ae onimakina m'aakan te UEA,

¹² ma bon ti Kareb'a ao Iotua. A teimatoa ni kakaonimaki nakon te UEA,

¹³ ma E rangi n un irouia ake tabeman n te aro are E a kanakoia b'a a na tiotio nako n te rereua i nanon 40 te ririki. I m'aain te tai anne, a bane n tia ni mate aomata ake a tia ni bure nako Ina.

¹⁴ Ao ngkai kam a manga karaoa naba te aro arei ngkami aomatan Reuben ao Kata; kam a rangi ni kauna riki te UEA.

¹⁵ Ngkana kam katinanikua te UEA, ao E na manga kitaniia riki Ana aomata, ma ni katikuia ikai i nanon te rereua. Ao boni ngkami aika kam na bukinaki!

¹⁶ Ao a kaeka m'anen Reuben ma Kata: Kariaia b'a ti na karaoi nneia ara tiibu ao ara kooti, ao aia kaawa buura ma natira,

¹⁷ ike a na kona n tiku iai ma ni kawakinaki raoi iai. Ao i mwiina, ti na katauraoi nakon te buaka, ma ni kairiia baronga ake tabeua nakon te buaka.

¹⁸ Ti na tiku ma ngaiia ni karokoa a tekateka raoi i nanon abaia ni baronga.

¹⁹ E na riki te aba ae n iteran te Karaanga are te Ioretan aei b'a abara, ao ti aki manga tangira abara n te itera ane teuana.

²⁰ Ao E taku Moote: Kam bon berita b'a kam tauraoi ni buaka i bukin te UEA.

²¹ Kam kariaia naba b'a kam na ri aon te Ioretan n iriia nikiraia Iteraera, ni karokoa te tai are E na kakioia nako iai kairiribai te UEA man te aba? Ngkana kam karaoi baikai,

²² ao ngkana E tia te UEA ni buokiia Iteraera n taui aaba, ao kam a kona ngkanne n okira abami ngkana kam tangiria.

²³ Ma ngkana kam aki kakoroa bukin ami berita, ao kam na bure iai nakon te UEA, ao kam na katuaaeaki.

²⁴ Naako waakina ngkai karaoan aia kaawa buumi ma ami ataei, ao nneia ami tiibu ma ami kooti. Ma kam na ti karaoa te b'ai are kam a tia ni berita iai.

²⁵ Ao a kaeka m'anen Reuben ma Kata: Teuae ko karineaki, Ti na bon karaoi baika ko a tia n taekin.

²⁶ A na tiku buura ma natira ao ara tiibu ma ara kao ikai ni kaawan Kireata.

²⁷ Ma ti na waaki nako ngaira aika ti a tauraoi nakon te buaka n ri aon te Ioretan nakon Ana buaka te UEA.

²⁸ Ao e taku Moote nakon Ereata, Iotua, ao mataniwiia utu,

²⁹ “Kam riai ni kakoaua raoi b'a a tauraoi n iringkami nakon te buaka ma n ri aon te karaanga are te Ioretan te baronga are Reuben ma Kata. B'a ngkana a karaoa anne, ao ngkana kam a tia taui aaba nako, ao kam na anganiia te aba are Kireata b'a aban aia baronga.

³⁰ Ma ngkana a urua aia berita, ao a na ti karekeaki abaia n iteran te Ioretan are teuana, ni bon aekakiia naba baronga ake tabeua.”

³¹ Ao a kaeka baronga ake Kata ao Reuben ao a taku, “Bon am toro ngaira, ao ti na karaoi b'aai ni kabane akana E mwiokoira iai te UEA.

³² Ti na ri aon te Ioretan, ao ti tauraoi ni buaka i bukin te UEA i Kanaan. Ma ti tangira te aba ae man te itera aei b'a e na riki b'a abara.”

³³ Ma ngaia are, e anga Moote taian aba ma kaawa ake a tautaekanaki iroun uean Amora are te uea are Taion, ao aaba ma kaawa naba ake a tia n tautaekanaki iroun te uea are Oka are uean Batian nakoia te baronga are Kata, Reuben, ao iteran Manate:

³⁴ A manga katei kaawa ake Ribon, Atora, Aroera,

³⁵ Aterota Tioban, Iatera, Iokebea,

³⁶ Beta Nimra, ao Beta Aran. A katei naba taian oo ni katobibiia, ao a karaoi naba taian tabo ike a na kaawakin iai aia tiibu ma aia kooti.

³⁷ Ao te baronga are Reuben, a manga karaoi kaawa aika Etibon, Ereare, Kiriataim,

³⁸ Tibema, ao ai uana naba ma kaawa aika a ataaki n araia ngkoa aika Nebo, ao B'aara Meon. A manga bitii aran taabo aikai.

³⁹ Ao e nako te kaainga are Makira are man te baronga are Manate mai mainiku nakon te tabo are Kireata, a taua te kaawa, ma ni kakioia nako kaain Amora.

⁴⁰ Ma ngaia are, e a anga te tabo are Kireata Moote nakon kaaingan Makira, ao a tekateka ikekei.

⁴¹ Ao Iaira are man te baronga are Manate, boni ngaia are e taui taiani kaawa, ao e a manga bitii araia nakon “Kaawan Iaira.”

⁴² Ao Nob'a, e taua te tabo are Kenata ma kaawana ao e aranna b'a Nob'a.