Warekaia Iteraera 31 - Te B'aib'ara

Buakanakiia Kaain Miria Irouia Iteraera

¹ Ao e taku te UEA nakoni Moote,

² “Ko na riai ni kakoaua b'a a na tia ni katuaaeaki kaain Miria i m'aain matem, i bukin te b'ai are a karaoia nakoia Iteraera.”

³ Ao e taku Moote nakoia aomata, “E tangiria ni katuaaia kaain Miria te UEA, ma ngaia are, kam na katauraoia mm'aane nakon te buaka.

⁴ Kam na kanakoia kaka teuana tengaa te mm'aane man taiani baronga nako b'a a na buaka.”

⁵ Ao a anaaki tebwi ma uoua tengaa te mm'aane man aia baronga Iteraera, ao i mwiina, ngke a tia ni katauraoaki nakon te buaka,

⁶ ao e a kanakoia Moote nakon te buaka. Ao e uoti b'aai tabeua Bineati are natin Ereata man te Um'antabunrianna ao taiani bu i bukin katangakin kanikinaean te buaka.

⁷ Ao a buaka Iteraera ni buakaniia kaain Miria n aron Ana babaaire te UEA are E mwiokoa iai Moote, ao a tiringiia mm'aane ni kabane,

⁸ n reitaki naba ma B'araam are natin Beora, ao ai uean Miria ake niiman; Ewi, Rekem, Tura, Ura, ao Reba.

⁹ Ao a bane n tauia aine ma ataei Iteraera b'a aia taenikai, ao aia kao, tiibu, ao b'aai ni kabane ake aia b'ai kaain Miria.

¹⁰ Ao ni kabuoki naba aia kaawa ake a buubura ma ake a uarereke kaain Miria.

¹¹ Ao a booti b'aai ni kabane ake a anai mai Miria aia tautia Iteraera, n reitaki naba ma taian taenikai, ao taiani man.

¹² Ao i mwiina a oki rikaaki nakon aia maeka are n tabukin Moaba

¹³ i rarikin te karaanga are te Ioretan ni kaaitaraa Ieriko n iteran te karaanga are teuana.

¹⁴ Ao e a un Moote irouia taiani kam'anta n te taanga ni buaka

¹⁵ ao e taku, “I aki kakoaua b'a kam na kamaiuia taian aine!

¹⁶ Boni ngaiia naba aika ongotaeka nakon ana babaaire B'araam ao e kaoiia ara aomata b'a a na taromauriia te anti are B'aara Beore. Ao bon anne bukina ae katuaaira iai te UEA n tiringiia ara aomata aika m'aiti.

¹⁷ Kam na tiringiia ataeinimm'aane ni kabane ao aine aika a tia ni bure ma mm'aane.

¹⁸ Ma kam na aki tiringa te ateiaine ae tuai ni bure ma te mm'aane. Kam na kaawakiniia b'a buumi.”

¹⁹ Ao e taku Moote nakoia tautia, “Ngkana kam tiringiia aomata ni kabane, ke n riinga rab'atan te mate, ao kam a kam'araa, ao kam na tiku i tinanikun te maeka i nanon itiua te bong. Ao kam na kaitiakingkami n te katenua ni bong, ao te kaitiua ni bong ngkami ma ami taenikai.

²⁰ Uati ami kunnikai, ao b'aai ni kabane akana a karaoaki man kunin te man, buraen te kooti, ke te kai.”

²¹ Ao e katereterea riki Ereata ao e taku,

²² “Ngkana kam tangiria ni kaitiaka te b'ai ae aki bubue, n aron te koora, te tirewa, te buraonti, te biti, te tin, ke te buange, ao kam na katikua moa n te ai ae kabuebue,

²³ ao i mwiin anaakina ni kaotinakoaki, tatauriia n te ran ni kaitiakia. A na riai b'aai ni kabane n tataauriaki n te ran. Karaoi b'aai ni kabane n aron Ana mwioko te UEA nakoni Moote.

²⁴ Uaati ami kunnikai n te kaitiua ni bong, ao i mwiin anne, kam a itiaki ao kam a kona n okira te maeka.”

Tib'atib'aakin B'aai Ni Kabane Ake A Anaaki Mairouia Kaain Miria

²⁵ Ao E taku te UEA nakoni Moote:

²⁶ Koroi mwiin b'aai n kabane ake a anaaki mairouia kaain Miria, n ikotaki ma taenikai, ao taiani man.

²⁷ Ao i mwiina, tib'aia i aoia tautia, ao aomata ni kabane. A na buoki ngkami Ereata are te ibonga ao taani kairiri man taian utu.

²⁸ Kam na kaokoroa teuana man kaka nimabubua te aomata ke te man, man te itera are aia b'ai tautia,

²⁹ b'a Ana b'ai te UEA, ao angan Ereata baikanne.

³⁰ Man te itera are aia b'ai aomata, kaokoroi mai iai kaka teuana man kaka nimabwi ao angan kanoan Rewi ake tabeia te Um'antabunrianna.

³¹ Ao a iri Ana kaetieti te UEA Moote ma Ereata

³² ao a taui m'aitin b'aai ni kabane ake a anaaki mairouia kaain Miria.

³³ A m'akoro n te b'ai n taare 675,000 te tiibu ao te kooti,

³⁴ 72,000 te kao, 61,000 te aati,

³⁵ ao 32,000 ataeinaine aika tuai ni iein.

³⁶ Kanoan taian itera ake uoua

³⁷ bon 337,500 te tiibu ma te kooti,

³⁸ 36,000 te kao, 30,500 te aati, ao 16,000 ataeinaine.

³⁹ Man te itera are aia b'ai tautia,

⁴⁰ ao Moote e wareka 675 te tiibu ao te kooti,

⁴¹ 72 te kao, 61 te aati, ao 32 ataeinaine

⁴² ao e angan Ereata b'a a na katabuaki

⁴³ b'a Ana b'ai te UEA.

⁴⁴ Ao manga man te itera are aia b'ai aomata,

⁴⁵ ao Moote e anaa kakatemanna man nimangaun maan

⁴⁶ ao aine n aron are E a tia n taekinna te UEA,

⁴⁷ ao E anganiia kanoan Rewi.

⁴⁸ Ao e nakon Moote mataniwiin te taanga ni buaka

⁴⁹ ao e taku, “Teuae ko karineaki, ti a tia ni warekia ara taanga, ao bon akea temanna te tautia ae bua.

⁵⁰ Ma ngaia are, ti kan angan te UEA b'aai ni katamaroa te rab'ata ni kabane ake ti anai mairouia kaain Miria. Bon ara b'ai n tangira nako Ina i bukin tararuaakira ma ara taanga ni buaka.”

⁵¹ Ao a butim'aai b'aai ni katamaroaan te rab'ata mairouia mataniwiia tautia,

⁵² ao bootan rawawataia e ri aon 400 te rawawata.

⁵³ Aio bon i tinanikun are a bon kaawakinna tautia b'a aia b'ai.

⁵⁴ Ma ngaia are, a kaawakina te koora Moote ma Ereata i nanon Ana Um'antabunrianna te UEA b'a kauringaia Iteraera te b'ai ae e a tia n riki.