Warekaia Iteraera 3 - Te B'aib'ara

Natin Aaron aika Mm'aane

¹ Ngke E taetae ngkoa te UEA nakon Moote i aon te Maunga are Tinai

² ao i aoni kawaia ni katabuaki natin Aaron ake aman

³ ake Nataba, Abiu, Ereata, ao Itama b'a taiani ibonga.

⁴ Ma E a manga tiringa Nataba, ao Abiu te UEA i nanon Rereuan Tinai ngke a kamanena te ai ae aki kukurei te UEA iai ngke a anga karea nakon te UEA. Ao ai bon ti Ereata ma Itama, ao tamaia are Aaron aika a karaoa te m'akuri n ibonga, i bukina ngke bon akea naba kanoaia Nataba ma Abiu. Bon ti Ereata ma Itama aika a kakaraoa te m'akuri n ibonga ngke e maiu tamaia.

Nakoaia Kanoan Rewi

⁵ Ao E taku te UEA nakoni Moote:

⁶ Ko na anga te baronga are Rewi nakon Aaron are te ibonga. A na riki b'a taani buokia,

⁷ ao a na m'akuri i bukin Aaron n te Um'antabunrianna, ao i bukiia naba Iteraera ni kabane.

⁸ A na m'akuri i bukiia aomata ni kaawakin b'ain nako te Um'antabunrianna.

⁹ A rineaki i bukin buokan Aaron ma natina mm'aane,

¹⁰ aomata ake a tia n rineaki b'a ibonga. Ngkana iai ane kataia ni karaoa aia m'akuri ibonga, ao e na tiringaki.

¹¹ I a tia n rinea te baronga are Rewi mai buakoia Iteraera, ao a na kaokoroaki b'a Au b'ai.

¹² Ngke I tiringiia aia karimoa kaain Aikubita, ao I baaireia b'a N na b'ainiia naati mm'aane ake aia karimoa Iteraera n aia utu nako, ao n aia kao ma aia tiibu nako naba.

¹³ Ma ngkai I a butim'aia kanoan Rewi b'a oneani mwiin natiia Iteraera aika karimoa mm'aane.

Warekaia Kanoan Rewi

¹⁴ Ao E taku te UEA nakoni Moote n Rereuan Tinai,

¹⁵ “I tangiria b'a ko na weteia utuun, ao kaaingan te baronga are Rewi. Ao warekia mm'aane akana a tia ni koro teuana aia nam'akaina ni maiu.”

¹⁶ Ao e ongotaeka Moote, ao e wareki m'aitiia.

¹⁷ Ao a riki natin Rewi ake teniman mm'aane ake Kerition, Koata, ao Merari b'a atuun aia kaainga.

¹⁸ Araia natin Kerition mm'aane bon Ribeni, ao Timei.

¹⁹ Araia natin Koata mm'aane bon Amram, Itiia, Eberon, ao Utiera.

²⁰ Araia natin Merari mm'aane bon Maari, ao Muti. Ao aikanne natin, ao tibun Rewi mm'aane; boni ngaiia ake a riki b'a taani kairiri ni kaaingan nako Rewi.

²¹ Araia kaaingan Kerition ake uoua bon Kanoan Ribeni, ao Kanoan Timei,

²² ao m'aitiia mm'aane ma ataeinimm'aanena ake a tia ni koro teuana aia nam'akaina ni maiu bon 7,500.

²³ A na katei auti n rianna kanoan Kerition i maeaon te Um'antabunrianna,

²⁴ i aan ana kairiri Eriataba are natin Raera te mm'aane.

²⁵ Aia m'akuri n te Um'antabunrianna boni kaawakinan te Um'antabunrianna, ma rabunana are mai tinaniku, ma te roki are ni mataroan te Um'antabunrianna,

²⁶ ma taian roki ake a tine n te o ni katobibia te Um'antabunrianna. Ao ai uana naba ma roobun mataroan te o ma te baonikarea. Tabeia kanoan Kerition bon te katei baikai ao te kab'aranakoi.

²⁷ Araia kaaingan te baronga are Koata bon kanoan Amram, kanoan Itiia, kanoan Eberon, ao kanoan Utiera.

²⁸ Ao m'aitiia mm'aanena ma ataeinimm'aanena ake a tia ni koro teuana aia nam'akaina ni maiu bon 8,600.

²⁹ A na katei auti n rianna kanoan Koata i maiakin te Um'antabunrianna

³⁰ i aan ana kairiri Eritaban are natin Utiera te mm'aane.

³¹ Aia m'akuri n te Um'antabunrianna bon kaawakinan te Ati ni Berita, te Taibora i bukin te Kariki ae Tabu, Kaintein te Taura, te Bao ni Karea, B'ain nako te Taromauri, ao te Roki are i matan te Tabo are Moan te Tabu. Tabeia kanoan Koata bon te katei baikai, ao manga te kab'aranakoi.

³² Ereata are natin Aaron te mm'aane, boni ngaia mataniwiia kanoan Rewi, ao boni ngaia naba are e na tara raoi te m'akuri n te Um'antabunrianna b'a e na tia raoi.

³³ Araia kaaingan Merari ake uoua bon kanoan Maari, ao kanoan Muti,

³⁴ ao m'aitiia mm'aanena ma ataeinimm'aanena ake a tia ni koro teuana aia nam'akaina ni maiu bon 6,200.

³⁵ A na katei auti n rianna kanoan Merari i meangin te Um'antabunrianna, i aan ana kairiri Turiera, are natin Abiera te mm'aane.

³⁶ Aia m'akuri n te Um'antabunrianna boni kaawakinan kain te Um'antabunrianna, ma kaai ni kateitei, kaai ake bangaki, ao kaai ake taian aana, ao b'aina riki tabeua.

³⁷ Ao tabeia naba kaawakinan te boua are kamatoaan te o, ao te beke, ao taian roobu. Tabeia kanoani Merari bon te katei baikai, ao te kab'aranakoi.

³⁸ A na katei aia auti n rianna Moote ma Aaron ao natina mm'aane i matan te Um'antabunrianna, mai mainikuna, ao n tararua naba aroia Iteraera b'a a na taromauri raoi. Ngkana iai ae na kataia ni karaoa ana m'akuri Moote ma Aaron, ao e na tiringaki.

³⁹ Ma ngaia are, a ongotaeka Moote ma Aaron iroun te UEA, ao a warekia kanoan Rewi n aia kaainga nako. Bootan m'aitiia kanoan Rewi ake a tia ni koro teuana aia nam'akaina ni maiu bon 22,000.

Kariaiakaia Kanoan Rewi B'a Taan Onomwi I bukiia Karimoa Mm'aane

⁴⁰ Ao E taku te UEA nakoni Moote, “Karaoa tauani mwiin m'aitiia karimoan utuia Iteraera n tatabeua nako aika nati mm'aane akana a tia ni koro teuana aia nam'akaina ni maiu.

⁴¹ Bon Au b'ai, ma N na kariaia kanoan Rewi b'a oneani mwiia, ao N na kariaia naba aia man kanoan Rewi b'a oneani mwiin aia man Iteraera ake taiani karimoa naba.

⁴² E ongotaeka Moote, ao e wareki m'aitiia taiani karimoa mm'aane,

⁴³ ao m'aitiia bon 22,273.

⁴⁴ E a manga taku te UEA,

⁴⁵ “A na riki kanoan Rewi b'a Au b'ai, ao a na onei mwiia taiani karimoa mm'aane, ao aia nanai ni man, a na onei mwiin taiani karimoa n aia nanai ni man Iteraera.

⁴⁶ Ma ngkai a raka riki m'aitiia taiani karimoa mm'aane nakoia kanoan Rewi, ao a na riai ni manga kabooaki ni kaokaki mai Rou, te raka are 273 te mm'aane ma te ataeinimm'aane.

⁴⁷ Kam na anaa nimaua te m'akoro n tirewa ae boraoi rawawatana ma are e b'ainaki n te Um'antabunrianna, b'a boon temanna.

⁴⁸ A na anganaki Aaron ma natina taian m'ane aikai.”

⁴⁹ Ao e rikoi taian tirewa Moote man te raka ni mm'aane, ao n ataeinimm'aane ake a tib'a bungiaki are 273.

⁵⁰ Bootan rawawatan te tirewa bon 1,365 ni kabotauaki ma te rawawata are e b'ainaki n te Um'antabunrianna.

⁵¹ Ao i mwiina, ao e a angan Aaron ma natina mm'aane n aron are E a tia ni baaireia te UEA.