Warekaia Iteraera 28 - Te B'aib'ara

Karea Ake B'ain Te Bong Koraki

¹ Ao E tuangaki Moote iroun te UEA

² b'a e na kaangai nako ia Iteraera: Kam na anga ami karea nako Iu n ami tai n taromauri ake a tia n rineaki, b'a I aonga n aroka bubun te karea ao I kukurei iai.

³ Kam na kakareani uoman taian tiibu mm'aane aika kaka teuana aia ririki ni maiu ni katoa bong b'a ami karea are kakukureiai. A na riai n aki toabuaka rab'ataia maan.

⁴ Kam na anga are temanna n te ingabong, ao are temanna n te tairiki.

⁵ Ao a na raonaki ni uoua te rawawata te buraawa are e rangi ni manti are renganaki ma uoua te b'ainti b'aan te oriwa.

⁶ Aio te karea are kakukureiau are e moani karaoaki i aon te Maunga are Tinai.

⁷ Te kabanea, are raon karea aika uoua aikai, bon uoua te b'ainti te wain are na kab'aroaki i aon te baonikarea b'a te karea are te mooi.

⁸ Ao e na kareanaki te tiibu mm'aane are te kauoman n te tairiki n ikotaki ma taian angab'ai ake tabeua, n ai aron are teuana are kareanaki n te ingabong anne. E na boni kakukureiai boiararan bubun karea aikai.

Te Karea n Te Taabati

⁹ N te Taabati, n raonan karea n te bong koraki,

¹⁰ Kam na riai ni kareani uoman taian tiibu mm'aane aika kaka teuana aia ririki ni maiu b'a te karea are kakukureiau. A na riai n akea toabuakan rab'ataia tiibu mm'aane aikai, ao a na kareanaki ma te karea are te mooi, ao aua te rawawata te buraawa man ami buraawa are te kabanea n tamaroa are renganaki ma b'aan te oriwa.

Taiani Karea I bukin Moanibongin Te Nam'akaina Ao E taku te UEA:

¹¹ Kam na uoti nakon te baonikarea uoman kaomm'aane, ao temanna te tiibu mm'aane ae rangi n ikawai, ao itiman tiibu mm'aane aika teuana aia ririki ni maiu aika akea toabuakan rab'ataia. Kam na anga baikai b'a te karea are kakukureiau.

¹² Kam na anga onoua te rawawata man ami buraawa are rangi ni mte ae renganaki ma b'aan te oriwa b'a te karea are te uita are raon tatabeman taiani kaomm'aane. Kam na angan te aba te buraawa are aua te rawawata are renganaki ma te b'a ma te tiibu mm'aane,

¹³ ao uoua te rawawata te buraawa are renganaki ma te b'aa i aon temanna te tiibu mm'aane te ataei. E na boni kakukureiai boiararan bubun karea aikai.

¹⁴ Kam na anga uoua te riita te wain b'a te karea are te mooi b'a raon te kaomm'aane n tatabemaniia, ao teuana ma te iterana te riita b'a raon te tiibu te teei n tatabemaniia. Aio te kaetieti i bukin te karea ni kabuokaki ni moani bongin te nam'akaina koraki ni katoa ririki.

¹⁵ Ao n reitaki ma te karea ni kabuokaki ma te wain ni katoa bong, bon teuana te kooti b'a te karea ni kab'ara bure.

Taiani Karea n Te Toa are te Riao ao Te Toa are Te Kariki ae Aki Karikaki Ao E taku te UEA:

¹⁶ Kam na karaoa te Toa are te Riao b'a karineau ni katebwi ma auan bongin te moan nam'akaina ni katoa ririki.

¹⁷ E na moanaki te Toa are te Kariki ae Aki Karikaki nakon te bong are i mwiina, are e na bane bongina i nanon teuana te wiiki. Kam na am'am'arake n te Kariki ae Aki Karikaki n taai aikai b'a karineau.

¹⁸ Ni moani bongin te Toa aei, kam na motirawa iai man ami m'akuri, ao kam na botaki n taromauriai.

¹⁹ Kam na uoti nakon te baonikarea uoman taiani kao mm'aane, temanna te tiibu mm'aane ae e ikawai, ao itiman tiibu mm'aane aika teuana aia ririki ni maiu aika akea toabuakan rab'ataia. Ao i mwiina, kam na anga baikai b'a taiani karea ake kakukureiau.

²⁰ Kam na kaairia ma kaka temanna te kaomm'aane ami buraawa are onoua te rawawata are e mte are renganaki ma b'aan te oriwa b'a te karea are te uita. E na kaairaki ma te tiibu mm'aane, aua te rawawata te buraawa are renganaki ma te b'a,

²¹ ao e na kaairaki ma taian tiibu mm'aane ake ataei n tatabeua nako, uoua te rawawata te buraawa ae renganaki n te b'a.

²² Ao anga naba te kooti b'a te karea i bukin aia bure aomata.

²³ A na bane baikai ni kareanaki

²⁴ b'a raon ake karean te bong koraki, ao e na kakukureiai boiararan bubuia.

²⁵ Ao kabaneani bongin te Toa, kam na manga motirawa naba iai man ami m'akuri, ao kam na bootaki n taromauriai.

Taiani Karea n Tain Toan te Tai Ao E taku te UEA:

²⁶ Kam na motirawa man ami m'akuri ni moanibongin te Toa ae M'anganikaai. Kam na ikotaki n taromauri, ao uota te karea are te uita ae boou.

²⁷ Kam na anga uoman te kaomm'aane aika ataei, temanna te tiibu mm'aane ae a kawai, ao itiman tiibu mm'aane aika teuana aia ririki ni maiu b'a taian karea are kakukureiau.

²⁸ E na kaairaki ma taiani kaomm'aane n tatabemaniia nako, onoua te rawawata te buraawa are rangi ni mte ae renganaki ma te b'aa, b'a te karea are te uita. Ao e na kaairaki ma te tiibu mm'aane, aua te rawawata te buraawa ae renganaki ma te b'aa,

²⁹ ao uoua te rawawata te buraawa ae renganaki ma te b'aa, e na kaairaki ma taian tiibu mm'aane aika ataei n tatabemaniia nako.

³⁰ Ao kam na anga naba te kooti b'a te karea ni kab'ara bure.

³¹ A na riai n akea toabuakan rab'ataia maan, ao a na kaairaki ni kareanaki ma te karea are karean te bong koraki.