Warekaia Iteraera 24 - Te B'aib'ara

¹ E boni kakoaua B'araam b'a E na manga bon tuangaki iroun te UEA b'a e na kakab'aiaia riki Iteraera. Ma ngaia are, e aki kamanena te tabunea i bukin kakaean nanon te UEA n te b'ai ae na karaoia n aron n ana moan ma ana kauoua n tai, ma ngaia are, e tara nanon te rereua

² ao e nooriia barongan Iteraera aika katei auti n rianna i nano. Ao e rina n niniaki iroun Tamnein te Atua

³ ao e taku, “Bon natin Beore te mm'aane ngai, ao a boni koaua au taeka, ma ngaia are, kam na ongora n au rongorongo!

⁴ E roko mairoun te UEA te Atua ae Moan te M'aaka. I bobaraaki nako Ina, ao I noora te kaotioti i bukiia Iteraera.

⁵ “Iteraera, Ai tamaroara ami maeka.

⁶ Kaanga ai aron taian b'ariko ni baam, ke te nne n aroka ae mena i rarikin te karaanga. Ti te bo ngkami ma aroka ake taian aroti aika rietaata aika E a tia n uniki te UEA, ke ai aron taian tira aika maiu i rarikin te ran.

⁷ A na rikirake ni maiu raoi kanoam kaanga aron taiani kai n am'arake i rarikin te karaanga n ran. E na tautaeka am uea ma te m'aaka ao e na riki b'a te uea ae korakora riki nakon Akaaka are kaain Amareka.

⁸ E kaotinakoi ngkami te Atua mai Aikubita n te korakora ae kaanga ai aron korakoran te kao anti mm'aane. Kam na konaiia ami kairiribai Kam na katebeia n ami kanoa ni katebe ma ni kamanti riia.

⁹ Kam wene kaanga raian, aika katoki kuaia i mwiin uniia Iai ae kona n aki karauingkami? A na kakab'aiaki akana kakab'aiaingkami A na katekebuakaaki ane katekebuakaingkami.”

¹⁰ Ao ngke ongo aei B'araka, ao e rangi n un, ao e orea baina ao e taku, “I weteiko n nako mai b'a ko na katekebuakaia au kairiribai, ma ngkoe, ko kakab'aiaia tenua te tai.

¹¹ Naako naba ngkai, okira am auti! I tuangko b'a N na kabooko raoi, ma ngkai E aki kariaia te UEA b'a ko na karaoa te b'ai ae I butiiko, ao ko na aki kabooaki.”

¹² Ao e kaeka B'araam ao e taku, “I bon tuanga ngkoa am tia ua rongorongo

¹³ b'a e ngae ngkana ko b'aintangiraai n te bareti ae onrake n te koora ma te tirewa, ma N na bon teimatoa naba n ongotaeka iroun te UEA. Ao I boni katereterea naba ae n na bon ti taekin baike E tuangai te UEA.

¹⁴ Ma ngaia are, N nang nako n okira au auti, ma N na katikuko ma te kauring i bukin te b'ai ae a na karaoia Iteraera nako ia am botannaomata n te bong teuana.”

Ana ka aua n rongorongo B'araam

¹⁵ Ao e taku B'araam: “Bon natin Beora te mm'aane ngai, ao a koaua au taeka aikai, ma ngaia are, ongora raoi n au rongorongo!

¹⁶ E roko rabakau mairoun te Atua ae Moan te Rietaata, ae Moan te M'aaka. I bobaraaki nako Ina, ao I noori taiani kaotioti i bukiia Iteraera.

¹⁷ “A tuai koro bukin baike I noori n te kaotioti, Ma n te bong teuana ane e na kaoti uean Iteraera b'a kaanga te itoi. E na kamaunanakoi ngkami kaain Moaba ma ni kamaunaia baronga aikai kam maeka n te rereua.

¹⁸ Ao a kataenikaia Etom Iteraera ao a taua abaia te botannaomata are aia kairiribai.

¹⁹ Ane a na tautaekanna ma ni kamaunaia taian nikira ni maiu ni kaawa akekei n kabane.

²⁰ “Ao I noora te kaotioti i bukiia kaain Amareka: E korakora aia botannaomata, ma ane a na mauna nako n te bong teuana, n aki manga nooraki.”

²¹ “Ao aio te b'ai ae I nooria i bukiia kaain Keena: A taku n aia iango b'a a rangi ni mano, ngke a maeka i buakon taiani b'aa,

²² ma ane a na kamateaki, ngkana a kataenikaiaki irouia I-Aturia.

²³ Ma bon akea ae na kona ni maiu ngkana e bairea ana urub'ai te Atua.

²⁴ A na roko kaibuke mai Kubero, ni uotiia aomata ake a na buakan aban Aturia ma Ebera. Ma n tokina, e na boni mauna nako Kubero.”

²⁵ Ao ngke a bane ana taeka B'araam ao e a m'ananga n okira mwengana, ao e nako naba B'araka.