Warekaia Iteraera 23 - Te B'aib'ara

Ana Moan Rongorongo B'araam

¹ Ao e taku B'araam nakon B'araka, “Karaoi itiua baonikarea ikai, ao uotimai nako iu, itiman kao mm'aane, ao itiman tiibu mm'aane.”

² Ao ngke a tia B'araka ni karaoa arei, ao a kareana temanna te kao mm'aane, ao temanna te tiibu i aon taiani baonikarea ake itiua.

³ Ao e taku B'araam, “Taningaai ikai i rarikin am karea aikai b'a N na kaokoroai moa n te tabo teuana, b'a E na kaoti te UEA nako iu. Ngkana E kaoti, ao n na tuangko b'aai ni kabane aika E taekin.” Ao e a nako.

⁴ Ao ngke E kaoti te Atua nako ina, ao e taku B'araam, “I a tia ni karaoi itiua baonikarea, ao I a tia naba ni kareana temanna te kao mm'aane, ao temanna te tiibu mm'aane i aoia n tatabeua nako.”

⁵ Ao E anga te rongorongo te UEA nakoni B'araam ao E a manga kaokia nakon B'araka.

⁶ Ao ngke e oki B'araam ao e noora B'araka ma ana aobitia n teitei i rarikin taiani baonikarea.

⁷ Ao e taku B'araam: E kairai te uea are B'araka are ueani Moaba man tabukin Tiria b'a n na katekebuakaia Iteraera ma ni katanoata b'akana.

⁸ Ma I bon aki kona n ekaanako te Atua! E tuai ni katekebuakaia Iteraera, ke ni kabuakakaia.

⁹ “I taratara rikaaki mai taubukin te Maunga ao I nooriia Iteraera, Ana aomata te Atua aika ongotaeka.

¹⁰ A maeka n ti ngaiia ma te rau e ngae ngke e rangi ni m'aiti aia aomata ma a aki kumeia botannaomata tabeua. “I kantaningaia b'a n na ongotaeka iroun te UEA ni kabane au bong ni maiu ao I kantaningaia b'a n na mate ma te rau.”

¹¹ Ao e taku B'araka, “Tera ae ko karaoia? I butiiko b'a ko na roko ni katekebuakaia au kairiribai, ma ko aki b'a ngaia ko a manga kakab'aiaia!”

¹² Ao e kaeka B'araam ao e taku, “I ti kona n taekin baike E tuangai te UEA.”

Ana Kauoua n Rongorongo B'araam

¹³ Ao e taku B'araka nakon B'araam “Nako mai b'a ti na nakon te tabo riki teuana. Tao ko na kona riki ni katekebuakaia m'akoron Iteraera ae uarereke riki nakon aei.”

¹⁴ Ma ngaia are, e kaira B'araam nakon te katawanang ae mena i taubukin te maunga are Bitika ike a mena iai taabo n taratara nako. Ao i mwiina, e katei itiua baonikarea, ao e kareani taian kao mm'aane, ma tiibu mm'aane i aon baonikarea n tatabeua nako.

¹⁵ Ao e taku B'araam “Ko na taningaai riki i rarikin am baonikarea. N na nako ikekei b'a E na kaoti iai te UEA nako iu.”

¹⁶ Ao E kaoti te UEA nakoni B'araam ao E a manga anganna naba te rongorongo, ao i mwiina, E a tuangnga b'a e na kawara B'araka n tuangnga te rongorongo.

¹⁷ Ao e oki B'araam ao e nooria b'a a teitei i rarikin taiani karea ma ana aobitia. Ao e titiraki B'araka, ao e taku, “E kanga Ana taeka te UEA?”

¹⁸ Ao e kaeka B'araam ao e taku: “Kakauongo raoi nakon au taeka.

¹⁹ Tiaki aron te aomata te Atua! E aki kona ni kewe, ao E aki bibitaki naba nanona. E aki kona n ae E na aki kakoroa bukin Ana berita.”

²⁰ Akea riki te b'ai ae I kona ni karaoia i rarikin mwiokoau mai Rouna are te kakab'aiaia aomata aikai. I aki kona ni bita te b'ai are a tia ni karaoia.

²¹ Bon te UEA ae te Atua aia Uea Iteraera. E maeka ma ngaiia ikekei, ao E aki kona ni karaoa te b'ai teuana ae buakaka nakoia.

²² E kaotinakoia te Atua mai Aikubita ni korakorana ae ai aron korakoran te kao anti mm'aane.

²³ Bon akea te tabunea teuana ae kona n totokoia. Bon noora te b'ai ae E a tia ni karaoia te Atua nakoia Ana aomata.

²⁴ Kaanga ai aroia raian aika a tauraoi nakon te buaka, ao a bon aki kona ni motirawa ni karokoa a tia ni kab'auta konaia.”

²⁵ Ao e takaarua B'araka ao e taku, “Ngkana ngaia b'a ko na aki katekebuakaia, ao tai manga kakab'aiaia.”

²⁶ Ao e kaeka B'araam “I a kaman tia n tuangko are N na bon ti taekin baike E tuangai te UEA.”

Ana Katenua N Rongorongo B'araam

²⁷ Ao e taku B'araka nakoni B'araam “Nako mai ti na kataa riki te tabo teuana. E na mena ngkoa, ao E na kariaia te UEA b'a ko na katekebuakaia Iteraera man te tabo arei.”

²⁸ Ma ngaia are, e kaira B'araam nakon te Maunga are Beore, are kaaitaraa te rereua are i meangin Taari are Mate.

²⁹ Ao e taku B'araam, “Karaoi itiua baonikarea ikai, ao uotimai nako iu itiman kaomm'aane, ao itiman naba tiibu mm'aane.”

³⁰ Ao ngke e a tia B'araka ni karaoi baike e tuangaki iroun B'araam ao e a kareana temanna te kaomm'aane, ao temanna te tiibu mm'aane i aon taiani baonikarea n tatabeua nako.