Warekaia Iteraera 19 - Te B'aib'ara

Te Botaki I bukin Kab'araani Buure

¹ Aikai tuua ake e anga Moote nakon Aaron:

² A na riai ni uoti kao aika uraura ni buraun Iteraera nakoni Moote. Taiani kao aika akea toabuakan rab'ataia, aika a tuai ni kamanenaaki ni kamarauan te tano.

³ Ao Moote, e na manga uoti nakon Ereata are te ibonga, ao i mwiina, e na kairaki nako tinanikun te maeka, ao e na tiringaki i matan Ereata.

⁴ E na kateboa tabonibaina i nanon te raraa, ao e na tatauriia nako ni kaaitaraa te Um'antabunrianna itiua te tai.

⁵ Ao i mwiin anne, e na kabuokaki rab'atan te kao ni kabane, n ikotaki ma kunna, irikona, raraana, ao b'ain nanona.

⁶ Ao te ibonga, e na karenakoa kain te tiira, m'aangan te utob'a, ao te karai ae uraura nako nanon te ai.

⁷ Ao e na tebotebo te ibonga ma ni uaati ana kunnikai ngkana e a b'ara te botaki. Ao e a tib'a kona n nako n te maeka. Ma e na bon teimatoa ni kam'ara ma n aki tau nakon te taromauri ni karokoa e bong.

⁸ E na riai ni uati naba kunnikaina ma n tebotebo te aomata are e kabuoka te kao, ma e na bon kam'ara naba ni karokoa te tairiki.

⁹ E na rikoa mannangin te kao te aomata ae kam'ara, ao e na maeka i tinanikun te kaawa n te tabo ae itiaki. Ao a kona Iteraera n rengani mannang aikai ma te ran are kabonganaki n tain te botaki b'a kaitiakan buure.

¹⁰ E na uati kunnikaina te aomata are anai taiani mannang, ma e na bon teimatoa naba ni kam'ara ni karokoa te tairiki. A na ongotaeka Iteraera ma iruwa akana maeka i buakoia nakon te tua aei.

Te B'ai Ae Riai Ni Karaoaki I mwiin Riingan Rab'atan Te Mate Ao E taku te UEA:

¹¹ Ngkana kam riinga rab'atan te mate, ao kam na kam'ara i nanon itiua te bong.

¹² Ma ngkana kam tebokingkami n te ran are e renganaki ma mannangin te kao n te katenua ni bong, ao manga n te kaitiua ni bong, ao kam na itiaki, ao ma ni kariaiakaki naba n taromauri. Kam na riai n tebokingkami ni boong aikai, ma kam na teimatoa ni kam'ara ngkana kam aki.

¹³ Ngkana tao arona b'a kam riinga rab'atan te mate, ao kam rawa n tebokingkami n te ran are renganaki ma mannangin te kao, ao kam na boni bure iai ni kam'araea au Um'antabunrianna, ao kam na aki atongaki b'a Iteraera.

¹⁴ Ngkana kam mena n te auti n rianna ae mate te aomata iai, ao kam na kam'ara i nanon itiua te bong. Ao e kam'ara naba te aomata ane a manga rin i nanon te auti n rianna rimwi riki.

¹⁵ A na kam'ara naba ni kabane taian tiaeki akana a uki mataia aika mena i nanon te auti n rianna anne.

¹⁶ Ngkana kam riinga rab'atan te mate ae e tiringaki, ke e mate ngke a boni kara, ke ngkana kam riinga te ri, ke te ruanimate, ao kam na kam'ara iai i nanon itiua te bong.

¹⁷ I m'aain kaitiakakimi, ao e na anaa te mannang te aomata ae itiaki, man te kao ae kabuokaki, ao e na kab'aka n te b'aata ae mena i nanona ranin te koburakenran, ao e na kaboboa.

¹⁸ E na manga kateboa m'aangan te kai ae te utob'a n te ran ma te mannang te aomata naba anne, ao i mwiina, e na tatauriia iai te auti n rianna ma b'aai ni kabane ake i nanona, n reitaki naba ma aomata ake i nanona. Ngkana kam a tia n riinga riin te aomata, ke te ruanimate, ke te mate, ao kam na tataauriaki naba n te ran anne.

¹⁹ Ngkana e tia aei n te katenua ni bong, ao n te kaitiua ni bong, ao kam a itiaki. Ao i mwiina, kam na tebokingkami, ma ni uati ami kunnikai, ao kam a kona n taromauri nakon te tairiki anne.

²⁰ Ngkana kam kam'ara, ao kam rawa ni kaitiakaki n tebokaki n te ran are e renganaki ma te mannang, ao kam na boni bure iai ni kam'araea au Um'antabunrianna, ao kam na aki manga atongaki b'a Iteraera

²¹ A na bon aki manga bitaki tuua aikai. E na uati naba kunnikaina te aomata are tatauringkami n te ran are renganaki ma te mannang ngke kam kam'ara. Ao ngkana iai ae riinga te ran, e na bon kam'ara naba iai ni karokoa te tairiki.

²² Ngkana kam kam'ara, ao a na kam'ara naba b'aai ni kabane akana kam riing, ao e na kam'ara naba ni ua te tairiki ane e riingingkami.