Warekaia Iteraera 18 - Te B'aib'ara

Tabeia Ibonga ao Kanoan Rewi

¹ Ao E taku te UEA nakon Aaron, “Tabem ngkoe ma natim mm'aane ao kanoan Rewi ake tabeman ake man te kaainga are Koata, tararuaan b'aai aika riki n te Um'antabunrianna. Ao ngkoe ma natim mm'aane, tabemi tararuaan aia m'akuri ibonga.

² Bon ami koraki kanoan Rewi, ao a mena i rarikimi b'a a na buokingkami n ami m'akuri n te Um'antabunrianna.

³ Kam na riai ni kakoauaia b'a a bon karaoi raoi tabeia. Ma ngkana a kaanii b'aai ake a tabu n te Tabo are e Tabu ke te baonikarea, ao kam na bane ni mate.

⁴ Bon akea temanna ae kariaiakaki b'a e na kaawakina te Um'antabunrianna, ke ni karaoi b'aai aika a reitaki ma te Um'antabunrianna.

⁵ N na bon aki manga un, ke ni katuaaia Iteraera ngkana kam iri raoi taiani kaetieti i matan te Tabo are e Tabu ao te baonikarea.

⁶ Boni Ngai are I rineia kanoan Rewi mai buakoia baronga b'a Au b'ai, ao I a tia n anganingkami b'a buokami.

⁷ Ma bon ti ngkoe ma natim mm'aane ae kam kona ni karaoa te m'akuri n ibonga n te baonikarea i nanon te Tabo are Moan te Tabu. Bon au b'aintangira nako imi te m'akuri n ibonga. Ao ake a kataia ni karaoa te m'akuri n ibonga, a na bon tiringaki.

Aia B'ai Ibonga man taian Angab'ai nakon te UEA

⁸ Ao e taku te UEA nakon Aaron, “I a tia n anganiko taiani b'aintangira ma taiani karea ake a uoti nako Iu Iteraera b'a ami b'ai. Ao man te tai aei nakon taai aika na roko ko na b'aina m'akoron te karea ni kab'arabure natim mm'aane, ao kanoam,

⁹ n reitaki naba ma m'akoron te karea are te uita, ao m'akoron naba te karea ni kabomwi. Ami b'ai man te karea aei bon te m'akoro are aki kabuokaki i aon te baonikarea.

¹⁰ Ao ngkai a tabu taian b'ai aikai, ao a na riai ni kanaki i rarikin te Um'antabunrianna, ma a na ti am'arake iai taiani mm'aane.

¹¹ Kam na b'ain naba m'akoron taian raka ni b'aintangira ma taian angab'ai ake a na uoti Iteraera nako Iu. A kona ni kang baikai kaain ami utu akana a itiaki ma n tau i bukin te taromauri.

¹² N aron aei, ngkana a uoti aia moani b'a ma aia moani wain, ao aia moani uita Iteraera, ao kam na b'aini kabanean tamaroan m'akoron b'aintangira aikai.

¹³ Ao ami b'ai naba moa ni uaa n arokan aia katawanang ma aia nne ni kureebe. A na anga baikai aomata nako Iu, ao a na kona n anai tabeua mai iai kaain ami utu akana a itiaki.

¹⁴ Ami b'ai ni kabane b'aai ake a tia ni kaokoroaki b'a au b'ai

¹⁵ Au b'ai karimoa mm'aane n aia utu Iteraera, ao ai arona naba ma karimoa mm'aane n aia nanai n tiibu, kooti, ao nanai ni kao, ma a na kabooaki ni kaokaki taiani karimoa mm'aane, ao karimoa mm'aane aika taian aati mai Rou.

¹⁶ Boon te karimoa te mm'aane ae moa man teuana ni waerake ana nam'akaina ni maiu bon nimaua te m'akoro n tirewa, ae boraoi rawatana ma are b'ainaki n te Um'antabunrianna.

¹⁷ Ma e ngae n anne, ao bon au b'ai ni kabane taiani karimoa i rouia taiani kao, tiibu, ao kooti; a aki kona ni manga kaboaki ni kaokaki. E na tatauriaki te baonikarea n raraaia, ao a na kabuokaki neneaia b'a a na aetorake bubuia b'a I aonga ni kukurei.

¹⁸ Kam kariaiakaki ni kang irikon maan aikai, n aron ae kam kona n kang rinikaokao, ao rangan taian raka ni Karea.

¹⁹ Ni moa man te tai aei, ao kam a b'aini taian angab'ai aika tabu ake a anga Iteraera nako Iu b'a ami b'ai ma natimi mm'aane, ao natimi aine. Bon aei Au berita nako imi ma kanoami, ao e na bon aki manga bitaki.

²⁰ E na aki reke nako imi te aba teuana i aon Iteraera b'a abami. Bon te UEA Ngai, ao N na anganingkami b'aai ni kabane akana kam kainanoi.”

B'aai Aika A Reke Irouia Kanoan Rewi E taku te UEA nakon Aaron:

²¹ Au b'ai 10 te betienti man uaan arokaia Iteraera, ao tebwina te betienti man aia man aika karimoa. Ma I anga baikai ni kabane nako ia kanoan Rewi b'a booia i bukin aia m'akuri are a karaoia n te Um'antabunrianna,

²² Bon ti ngaiia aika a kariaiakaki ni m'akuri n te Um'antabunrianna, ao e aki kariaiakaki temanna b'a e na roko ni kaaniia.

²³ Ngkana iai ane karaoa anne, ao e na tiringaki, ao a na katuaaeaki naba kanoan Rewi. E na bon aki bibitaki te tua aei. I bukina ngke a na aki anganaki abaia kanoan Rewi man te aba i aon Iteraera b'a abaia,

²⁴ ao a na anganaki uaan aroka ma maan ake karimoa ake a anga Iteraera nako Iu.

Baika Riai n Anga Kanoan Rewi

²⁵ Ao e tuangaki Moote iroun te UEA b'a e na kaangai nako ia kanoan Rewi,

²⁶ “Ngkana kam anganaki irouia Iteraera 10 te betienti man uaan arokaia, ao aia man aika a tib'a bungiaki, ao kam na manga anganai tebwina te betienti mani baikanne.

²⁷ Ko na kaokoroi m'akoron b'aai ake a reke i roum b'a te angab'ai nako Iu, n aroia naba

²⁸ Iteraera ngkana a anganai m'akoron aia uita ma aia wain. Ao e na anganaki Aaron b'aai akanne,

²⁹ ma ngaia are, b'aai akana reke i roum, akana a rangi n tamaroa bon Au b'ai.

³⁰ Ngkana ko a tia ni katabui m'akoroia akana a rangi n tamaroa b'a Au b'ai, ao ko a kona ni kang nikiraia, n ai aroia Iteraera ngkana a kang m'akoron aia uita ma aia wain ngkana a tia n anga nako Iu.

³¹ E kona ni kanaki tib'ami n aki akaaka irouia kaain ami utu nako, b'a ai bon anne naba boomi ni m'akuri n te Um'antabunrianna.

³² Kam na bon aki katuaaeaki ngkana kam kanna, ti ngkana kam a tia n anga nako Iu m'akorona ake a rangi n raoiroi. A na teimatoa n tabu taiani b'aintangira ma karea ake a uoti aomata nako imi, ao ngkana kam kang tabeua mai iai i m'aain ae kam anga nako Iu, ao kam na bon tiringaki.