Warekaia Iteraera 15 - Te B'aib'ara

Tuua I bukin Taiani Karea

¹ Ao te UEA, E tuanga Moote

² b'a e na anganiia Iteraera tuua aikai:

³ Maan ake kam riai ni kabuoki i aon te baonikarea bon taiani kaomm'aane, tiibu mm'aane, ao taiani kooti b'a taiani karea ake kakukureiau. Ao kam kona naba n anganano n anga ami karea, ke i bukina ngke kam a tia ni berita iai, ke i bukina naba ngke boni kanoan waakin ami Toa. I kukurei ni boiararan bubun taian karea aikai.

⁴ Ao ngkana kam anga te tiibu mm'aane ae te ataei, ke te kooti, ao kam riai n anga naba ami buraawa are moan te raoiroi ae teuana te rawawata ae renganaki ma teuana ma te iterana te riita b'aan te oriwa b'a te karea are te uita.

⁵ Ao e na kab'aroaki naba teuana te riita te wain i aon te baonikarea.

⁶ Ao ngkana te tiibu mm'aane ami man ae a boni ikawai, ao kam na riai n anga uoua te rawawata te buraawa ae renganaki ma teuana ma te iterana te riita b'aan te oriwa.

⁷ Ao e na kab'aroaki naba teuana ma te iterana te riita te wain i aon te baonikarea. E na bon kakukureiai boiararan bubun te karea aei.

⁸ Ngkana e kareanaki te kaomm'aane b'a te karea are kakukureiau, ke i bukin butiakiu Au kakab'aia,

⁹ ao e na nikiraki naba te karea are te uita, are karaoaki man onoua te rawawata te buraawa ae renganaki ma uoua te riita b'aan te oriwa

¹⁰ n reitaki naba ma aua te b'ainti te wain. N na boni kukurei ni boiararan bubun te karea aei.

¹¹ Ngkana boni Iteraera ngkami,

¹² ao kam riai n ongotaeka nakon tuua aikai n taai ni kabane

¹³ ake kam anga iai te kaomm'aane, te tiibu mm'aane, ke te kooti b'a ami karea.

¹⁴ Ao e na iri naba nanon tuua aikai te ianena ae maeka i buakomi.

¹⁵ E na bon aki manga oneaki te tua aei. Bon te UEA Ngai ae ti te arona aomata ni kabane i Rou.

¹⁶ Ti te arona Iteraera ma te iruwa ae maeka i buakomi.

¹⁷ Ngkana kam kana te am'arake n te aba ae I anganingkami,

¹⁸ ao uringnga ni kaokoroi tabeua

¹⁹ b'a taian angab'ai nako Iu.

²⁰ Kam na anga nako Iu te moan kabobo n te buraawa are kam karaoia man moan uitan te tai. Karaoa teuana te kariki ao anganai n aron are kam karaoia n te karea are te uita.

²¹ A na bane ni karaoi nanon tuua aikai kanoami, ma n anga m'akoron te moan kabobo n te buraawa.

²² Ao te UEA,

²³ E tuanga Moote te b'ai ae na karaoaki ngkana a aki ongotaeka n irii nanon nako tuua aikai:

²⁴ Ngkana kam bane n aki ongotaeka nakon Au tua teuana n tiaki nanomi, ao kam na anga te kaomm'aane b'a te karea are kakukureiau, n ikotaki ma te karea ae te uita, ao te angab'ai are te wain, ao te kooti b'a te karea i bukin kab'araani buure.

²⁵ Ao i mwiina, e na tataro te ibonga ni butiai kab'araan ami bure. Ao i bukina ngke kam bon aki kantaningaia b'a kam na karaoa te bure, ao kam anga ami karea,

²⁶ ao a na kab'araaki aia bure aomata nako aika bon Iteraera, ao iruwa ake a maeka i buakomi.

²⁷ Ma ngkana iai temanna i buakomi ae karaoa te bure n tiaki nanona, ao e na kareana te kooti aine ae teuana ana ririki ni maiu b'a te karea ni kab'arabure.

²⁸ Ao e na bubutiai te ibonga i bukin kab'araan ami bure.

²⁹ E na kamanenaaki naba te tua aei nakoia aomata nako aika a karaoa te bure n tiaki nanoia, b'a tao te Iteraera, ke tao te iruwa ae maeka i buakomi.

³⁰ Ma ngkana bon iai ae karaoa te bure ni bon nanona, b'a tao te Iteraera ke te iruwa ae maeka i buakomi, ao e na bon reke n te bure b'a e a tia n aki ongeaba n urui taian tua.

³¹ E na kanakoaki ao e na aki manga maeka i buakoia Iteraera.

Te Aomata Ae Tiringaki I bukina Ngke E riko aia N Te Taabati

³² N te tai teuana ngke a tabe Iteraera ni m'ananga i nanon te rereua, ao e reke te mm'aane temanna b'a e riko aia n te Taabati.

³³ E uotaki nakoni Moote ma Aaron, ao nakon te botaki ni Iteraera.

³⁴ Ma akea ae ataa te b'ai ae na karaoaki nako ina, ma ngaia are, e a tiku ni kaawakinaki.

³⁵ Ao i mwiina, E taku te UEA nakoni Moote, “Tuangiia aomata b'a a na uota te aomata anne nako tinanikun te maeka, ao karebanaia ni karokoa matena!”

³⁶ Ma ngaia are, e a tiringaki n aron are E a tia ni baaireia te UEA nakoni Moote.

Taiani Korooti i aon Kunnikaia Aomata

³⁷ Ao te UEA e tuanga Moote,

³⁸ b'a e na kaangai nako ia Iteraera, “Kam na korotini mataniwiin kunnikaimi akana mai nano, ao ma ni kabaei taiani kora aika a beebo ma taiani korooti akanne n tatabeua nako.

³⁹ E na kauringngkami baikai b'a kam na riai n ongotaeka nakon Au tua ma Au reirei.

⁴⁰ Ao ngkana kam karaoa aei, ao kam boni kaokoroi iai ngkami b'a au b'ai, ma n aki iri nanomi aika buakaka.

⁴¹ Bon te UEA ae Atuami Ngai ae kaotinakoingkami mai Aikubita.”