Warekaia Iteraera 14 - Te B'aib'ara

Ekakinakoan Moote Irouia Iteraera

¹ Ao ngke a tia n ongora te ribooti Iteraera irouia mm'aane ake tengaun ma uoman ake a nako n tuoa aon Kanaan, ao a tang ni karokoa te ngaina

² ao a ngurengure nakon Moote ma Aaron ao a taku, “E raoiroi riki ngke ti mate i Aikubita, ke n te tabo teuana i nanon te rereua!

³ E boni kairiira n nako Kanaan te UEA b'a ti na bane n tiringaki ma n tauaki ara aine ma ataei b'a taenikai? E raoiroi riki ngke ti mena i Aikubita.”

⁴ Ao a i taetae i bon i rouia, ao a taku, “Ti na karekea ara tia kairiri temanna, ao ti na okira Aikubita.”

⁵ Ao e bobaraaki Moote n tataro i mataia aomata.

⁶ Ao a raeuai kunnikaia Iotua ma Kareb'a i bukin rawawatan nanoia

⁷ ao a taku: Ti bon noora raoi te tabo arei i matara, ao e bon rangi n raoiroi.

⁸ Ngkana ti ongotaeka iroun te UEA, ao E na bon anganiira te aba are kaub'ai n te miriki, ao a na karewe te manibeeru.

⁹ Ma ngaia are, kam na aki rarawa nakon te UEA. Bon akea bukina b'a ti na maakuia aomata ake a maeka ikekei. E tei te UEA i bukira, ao a na bon aki kona ni kataenikaira!

¹⁰ Ao a bane aomata ni bononnanoa karebanaia Moote ma Aaron n taian atiibu ni ua mateia. Ma E karina ni kaoti te UEA n te nang i nanon te Um'antabunrianna.

Ana Tataro Moote I bukiia Aomata

¹¹ Ao E taetae te UEA nakoni Moote ni kaangai, “I a tia ni karaoi b'aai aika a ab'ab'aki i bukiia aomata aikai, ao a rawa i Rou ngke a aki onimakina m'aakau.

¹² Ma ngaia are, a na aki atongaki b'a Au aomata, N na tiringiia, ao N na karikiko b'a aia bakatibu botannaomata aika korakora riki nako ia.

¹³ Ao e kaeka Moote: Ko kamaiuia aomata aikai mai Aikubita ni m'aakam ae korakora, ao ana bon ongo kain Aikubita baike ko a tia ni karaoi nako ia am aomata aikai,

¹⁴ ma ngaia are, ti butiiko b'a Ko na aki tiringiira i nanon te rereua ikai.

¹⁵ B'a ngkana Ko tiringiira, ao ane a na ongo kaain Aikubita, ao a na tuangiia kaain Kanaan.

¹⁶ A kaman ataia kaain Kanaan b'a bon Am aomata ngaira, ao ti aki toki n itaramata ma Ngkoe. A tia naba n ongo arom ni kairiira n te nang ae matenten n te ngaina, ao te ai n te tairiki. Ma ngkana Ko tiringiira, ao ane a na taku b'a e aki tau korakorani m'aakam ni kairiira nako Kanaan n aron Am berita.”

¹⁷ Ko na kaota m'aakam ae korakora nako ira te UEA. Ko berita ngkoa

¹⁸ b'a Ko tangiria ni kaota te akoi ma te nanoanga. Ao Ko taku naba b'a Ko rangi n taotaonakinano, ma Ko bon katuaaia naba aika a tia n karaoa te m'akuri ae bure, tiaki ti ngaia ma Ko katuaaia naba natiia, ao natin natiia.

¹⁹ Ko rangi n akoi, ao Ko karaoa ae raoiroi riki nakon are e bon riai n reke nakoia. Ma ngaia are, ti butiiko b'a Ko na kab'arai aia bure aomata aikai n ai arom naba ngkoa ngke Ko kab'arai aia bure ngke ti kiitana Aikubita ni karokoa te tai aei.

²⁰ Ao E taku te UEA nakoni Moote: I kab'arai aia bure i bukin kaekaan am tataro.

²¹ Ma ngkai I boni maiu, ao bon akea tokin m'aakau,

²² ao I tuea b'a akea mai buakoia koraki aikai ae na noora te aba are I berita iai nakoia aia bakatibu b'a N na anganiia.

²³ A tia n noora m'aakau koraki aikai i Aikubita, ao n te rereua, ma a na bon aki noora Kanaan. A m'aiti aia tai n aki ongeaba nako Iu, ao ni kataai.

²⁴ Ma e bon rangi ni kaokoro au toro are Kareb'a ma ngaiia i bukin ana kakaonimaki nako Iu, ao N na boni kariaia riaoakin te Ioretan nako Kanaan irouna, ao a na maeka kanoana ikekei.

²⁵ Kakauongo ngkai Moote! A maeka kaain Amareka, ao kaain Kanaan n taian m'arua ake i Kanaan. Ao nakon te ingabong ko na manga rairaki n okira nanon te rereua n kaineta Taari are Uraura.

Katuaeakiia Iteraera I bukin Ngurengureia

²⁶ Ao te UEA, E tuanga Moote ma Aaron

²⁷ b'a a na anga ana rongorongo nakoia Iteraera ae kaangai:

²⁸ A m'aiti ami tai ni ngurengure nako Iu ngkami aika aomata aika taani bure! Ao ngkai I berita i boni i Rou b'a N na anganingkami te b'ai are kam bon tangiria.

²⁹ Kam na boni mate i nanon te rereua aei, ao a na raea rab'atami i aon te tano. Kam a tia ni kamatauningaai, ao bon akea mairoumi ngkami mm'aane aika ai 20 ami ririki ni maiu,

³⁰ ae na rin n te aba are I a tia ni berita iai b'a N na anganingkami b'a abami ni koaua; a na ti rin iai Kareb'a ma Iotua.

³¹ Kam raraoma ngkoa i bukiia natimi b'a a kaawa ni manga tauaki b'a taian taenikai. Ma boni Ngai ae te UEA, ae N na bon karokoia n te aba are kam ribaia.

³² Kam na mate i nanon te rereua ikai!

³³ A na tiotio nako natimi i nanon te rereua aei i nanon abwi te ririki, n rawawata i bukin ami bure n karokoa te tai are kam bane ni mate iai ngkami aikai.

³⁴ N na boni karawawata tuaami ni katoabong i nanon abwi te ririki. Teuana te ririki i bukin teuana bongin tuoan ngkoa te aba arei.

³⁵ Kam na boni mate i nanon te rereua aei ngkami aika taani bure ake kam a tia ni bobotakiia kaaitaraau.

³⁶ A tia n uota rongorongon te aba arei ae buakaka mm'aane ake tengaun ake a nako ngkoa n tuoa te aba arei, ao a kangurengurei nanoia aomata nakon te UEA.

³⁷ Ma ngaia are, E kanakoa te aoraki ae kamamate are tiringiia mm'aane akekei,

³⁸ ma E kamaiuia Iotua ma Kareb'a.

Kab'akaia Iteraera n Niniia Kanaan

³⁹ Ao a rangi n nanokawaki aomata i mwiin anganakiia Ana rongorongo te UEA irouni Moote.

⁴⁰ Ma ngaia are, a utim'aaka n te bong are i mwiina, ao a katauraoia ni m'ananga nakon te aba are tabukibuki are i Kanaan. Ao a taku, “Ti boni bure ngke ti ngurengure iroun te UEA. Ti a nako nakon te aba are E a tia ni berita iai nako ira.”

⁴¹ Ma e kaeka Moote ni kaangai, “Kam a tia n aki ongeaba nakon te UEA, e na bon aki koro bukin ami iango,

⁴² ma ngaia are, kam na bon riai n aki manga kataia ni karaoia. E aki kani manga buokingkami te UEA, i bukina ngke kam a tia n tannako mai Rouna.

⁴³ A na buakaningkami ami kairiribai ake kaain Amareka, ao kaain Kanaan, ao a na tokanikai i aomi.”

⁴⁴ Ma a aki kani kubara Moote Iteraera, ao a bon m'ananga naba nakon aaba ake a tabukibuki, e ngae ngke e tiku Moote ma te Atiniberita.

⁴⁵ Ao a ruorikaaki kaain Amareka ma kaain Kanaan man te aba are tabukibuki, ao a kataenikaiia Iteraera, ma ni kakioia nako ni karokoa te kaawa ae buubura are Oma.