Warekaia Iteraera 10 - Te B'aib'ara

Taiani Bu Aika Tirewa

¹ Ao E taku te UEA nakoni Moote:

² Karekea te aomata ae na karaoi uoua taiani buu man te tirewa ae amanaki. E na riki te buu anne b'a b'ain ikotaia aomata, ao anganakiia aomata te kanikina b'a a nang kam'ainga aia maeka.

³ Ngkana a katangaki uaai taiani buu, ao a na bane aomata ni botaki ma ngkoe i mataroan te Um'antabunrianna.

⁴ Ma ngkana ti teuana ae tang, ao a ti tangiraki taani kairiri man baronga ake tengaun ma uoman b'a a na roko.

⁵ Anga taiani kanikina n ami bu ngkana e a bo tain kab'aranakoan te auti n rianna.

⁶ Te moani bu bon i bukiia baronga ake mai mainiku, ao te kauoua ni bu i bukiia ake mai maiaki.

⁷ Ma ngkana ko tangiriia aomata ni kabane b'a a na ikotaki, ao ko na katanga te bu ae kaokoro.

⁸ A na katanga te bu ibonga ake utuun Aaron, ao e na aki manga bitaki te tua aei.

⁹ Kam na anga naba te kanikina n te bu ngkana kam nako ni buakaniia ami kairiribai aika a roko ni buakaningkami, b'a I aonga n ongo Ngai ae te UEA, ao N na kamaiungkami.

¹⁰ Kam na katanga naba te bu ngkana kam anga karea n tain te Toa ae Moan Otin Nam'akaina ao taian toa riki ake tabeua. E na riki aei b'a te b'ai ni kauring b'a bon te UEA Ngai ae Atuami.

Moanakin M'anangaia Kaain Iteraera

¹¹ Ao ni kauabwiin bongin te kauoua n nam'akaina n te ririki arei, ao e a m'aing nako te nang mai aon te Um'antabunrianna.

¹² Ma ngaia are, a kab'aranakoi aia auti n rianna Iteraera, ao a kiitana Rereuan Tinai. Ao i mwiin te tai ae maan, ao e tei te nang n Rereuani B'aran.

¹³ Bon aio te moan tai are E tuangaki iai Moote iroun te UEA b'a e na tuangiia Iteraera b'a a na waaki nako.

¹⁴ Ao a moan m'aati nako te baronga are Iuta ma baronga ake a katei auti n rianna i rarikiia, ma uotaia aia buraeki. Ao te tia kairiri i aon te baronga are Iuta bon Nation are natin Amminataba te mm'aane.

¹⁵ Te tia kairiri n te baronga are Itakara bon Netanera are natin Tua te mm'aane,

¹⁶ ao te tia kairiri n te baronga are Teburun, bon Eriaba are natin Eron te mm'aane.

¹⁷ Ao e a tia ni kab'aranakoaki te Um'antabunrianna, ao e uouotaki i rouia kanoan Kerition ao Merari, ake a m'aati rimwiia te baronga are Iuta.

¹⁸ Ao te kauoman ni m'aati nako, bon te baronga are Reuben ma baronga ake a katei auti n rianna i rarikiia, ma uotaia aia buraeki. Ao te tia kairiri n te baronga are Reuben bon Eritua are natin Tetura te mm'aane,

¹⁹ ao te tia kairiri n te baronga are Timeon, bon Terumiera are natin Turitiatai te mm'aane,

²⁰ ao te tia kairiri n te baronga are Kata, bon Eriataba are natin Teuera te mm'aane.

²¹ I mwiina, bon kanoan Koata; ao a uouoti b'ain nako te Um'antabunrianna, are a na manga kateia ngkana a roko n aia tabo ni katei auti n rianna aika boou.

²² A m'ananga i mwiina te baronga are Eberaim ma baronga ake a katei auti n rianna i rarikiia, ao uotaia aia buraeki. Te tia kairiri n te baronga are Eberaim bon Eritama are natin Ammiuta te mm'aane.

²³ Te tia kairiri n te baronga are Manate bon Kamariera are natin Betatura te mm'aane,

²⁴ ao te tia kairiri n te baronga are Beniamin bon Aitan are natin Kiteon te mm'aane.

²⁵ Ao te baronga are Taan ma baronga ake a katei auti n rianna i rarikiia, boni ngaiia ake a na kamanoia Iteraera man buakanakiia i rouia aia kairiribai mai buki, ma ngaia are, a na m'aati n te kabanea, ao uotaia aia buraeki. Te tia kairiri n te baronga are Taan bon Aietera are natin Ammitiatai te mm'aane,

²⁶ te tia kairiri n te baronga are Atera bon Bakiera are natin Okeran te mm'aane,

²⁷ ao te tia kairiri n te baronga are Nabetari bon Aira are natin Enan te mm'aane.

²⁸ Ao akanne kaetieti are a m'aati iai Iteraera ngkana a m'aing man aia tabo ni katei auti n rianna teuana nakon teuana.

²⁹ Ao e mena ikekei Obaba are kaain Miria are taman buun Moote, ao e taku Moote nako ina, “Ti nang nako nakon te tabo are E a tia ni berita iai te UEA nako ira. E a tia n taku b'a a na akea te kangaanga ae ti na bo ma ngaia. Ma ngaia are, ko na iriira b'a ti na bon tararuaiko raoi b'a a na akea naba te kangaanga iroum.”

³⁰ Ao e taku Obaba, “I aki iringkami b'a n na okira au auti, ni kawariia kaain abau.”

³¹ Ao e taku Moote, “Taiaoka, ko na iriira b'a ko na riki b'a te tia kaoti taabo ni katei maeka n te rereua.

³² I rarikin anne, ao ngkana ko iriira, ao ti na karekea tib'am man b'aai ake E anganiira te UEA.”

³³ Ao a moana m'anangaia Iteraera man te Maunga are Tinai. A m'ananga i nanon tenibong, ao a rimoa kanoan Rewi ni kaira te m'ananga, ao a uouota te Atiniberita, n te aro b'a E aonga n tuangiia te UEA aia tabo ike a na katei maeka iai.

³⁴ Ao e teimatoa te nang arei ni memena i rouia.

³⁵ Ao e aki toki n tataro Moote ni katoa te bong are a nang m'ananga iai Iteraera, ao e tataro ni kaangai, “Ara UEA, kataenikaiia Am kairiribai, ao kakioia nako!”

³⁶ Ao ngkana a manga motirawa ma ni katei aia auti n rianna, ao e a manga tataro Moote ni kaangai, “Ko na aki kararoako mai rarikiia Am aomata aika nga ma nga.”