Te Otinako 6 - Te B'aib'ara

¹ Ao E taku te UEA ae te Atua nakon Moote: Ko na noora te b'ai ae N na karaoia nakon te uea n te tai ae aki maan. E na kanakoia Au aomata i bukin korakoran m'aakau, ao e na manga bon kakioia nako mai abana.

² Arau bon te UEA.

³ Ma ngke I kaoti nako ia Aberaam, Itaaka, ao Iakob'a, ao I roko b'a te Atua ae moan te m'aaka ao I aki kamanenaa arau.

⁴ I karaoa te boraraoi ao I berita nako ia b'a N na anganiia te aba are Kanaan, ike a maeka iai kaanga ianena.

⁵ I a tia ngkai n noora aron rawawataia Iteraera irouia kaain Aikubita, ao N na karaoa nanon Au berita.

⁶ Bon aei au rongorongo i bukin Iteraera: “Bon te UEA Ngai! Ao I katuaaea Aikubita ni m'aakau ae e korakora ao I kainaomatai ngkami man te tautoronaki.

⁷ N na karikingkami b'a au aomata, ao N na riki b'a Atuami. Ao ane kam na ataia iai b'a boni Ngai ae I kamaiungkami mairouia kaain Aikubita.

⁸ N na karokoi ngkami n te aba are I karaoa iai au berita ae e matoa nako ia Aberaam, Itaaka, ao Iakob'a, ao e na riki b'a ami b'ai. Bon te UEA Ngai.”

⁹ Ao ngke e tuangiia Iteraera taekan te baei i bukiia, ao a rangi ni b'ara nanoia iai ao a rawa ni kakoaua.

¹⁰ Ao i mwiina, e tuangaki Moote iroun te UEA

¹¹ b'a e na tuanga uean Aikubita b'a e na kanakoia Iteraera.

¹² Ao e kaeka Moote ni kaangai, “Bon tiaki te tia taetae ae rabakau ngai. Ngkana a aki ongo Iteraera irou, ao e nang kangaa riki n ongo uean Aikubita?”

¹³ Ma E kanakoa Aaron ma Moote te UEA ma te rongorongo i bukiia Iteraera ao i bukin te uea; ao e bon tuanga naba Aaron ma Moote b'a a na kainaomataaki aomata mai Aikubita.

Te Kateiriki i bukin Aaron Ao Moote

¹⁴ Aikai mm'aane aika atuun aia kaainga aia bakatibu: Natin Reuben mm'aane, ae ana karimoa Iakob'a te mm'aane bon, Anoka, B'aru, Etiron, ao Karemi.

¹⁵ Aikai natin Timeon aika onoman mm'aane, Iemuera, Iamin, Oata, Iakin, Toara, ao Tiaura, are natin ainen Kanaan te mm'aane.

¹⁶ E maiu Rewi ni karokoa tebubua tenibwi ma itiua ana ririki ni maiu; ao natina mm'aane bon Kerition, Koata, ao Merari.

¹⁷ Aikai natin Kerition mm'aane: Ribeni ao Timei.

¹⁸ E maiu Koata ni karokoa tebubua ao tenibwi ana ririki ni maiu; ao natina mm'aane bon Amram, Itiia, Eberon, ao Utiera.

¹⁹ Aikai natin Merai mm'aane; Mari, ao Muti. A bane n nako akanne man te baronga are Rewi.

²⁰ E maiu Amram i nanon tebubua tenibwi ma itiua ana ririki ni maiu. E iein ma m'anen tamana are Nei Iokebeta, ao uoman natina mm'aane, aika Aaron ao Moote.

²¹ Natin Itiia mm'aane bon Kora, Nebeki, ao Tikeri.

²² Natin Utiera mm'aane bon Mitaera, Eritaban, ao Titeri.

²³ E iein Aaron ma Nei Eriteba. Bon natin Amminataba te aine ao m'anen Nation; bon aman natiia mm'aane aika Nataba, Abiu, Ereata, ao Itama.

²⁴ Natin Kora mm'aane bon Atira, Erekana, ao Abiataba.

²⁵ E iein natin Aaron te mm'aane ma temanna natin Butiera te aine, ao natiia te mm'aane bon Bineati. E toki ikai araia koraki ake atuun taiani kaainga n te baronga are Rewi.

²⁶ Ao te UEA E tuanga Aaron ma Moote b'a a na kairiia utu ni kabane ao baronga n Iteraera ni kaotinakoia mai Aikubita,

²⁷ ma ngaia are, a tuanga uean Aikubita b'a e na kainaomataia Iteraera.

E Tuanga Aaron ma Moote Te UEA b'a a na Taetae nakon Te Uea

²⁸ E kaangai te UEA ngke e taetae ngkoa Moote n

²⁹ te aba are Aikubita, “Bon te UEA Ngai. Ko na tuanga uean Aikubita b'aai ni kabane ake I taekin nako im.”

³⁰ Ma e kaeka Moote ni kaangai, “Ko bon ataia b'a I rangi ni babanga n taetae, ao ane e na bon aki kan ongo te uea i rou.”