Te Otinako 37 - Te B'aib'ara

Te Atiniberita

¹ Ao e karaoa te Atiniberita Betarera man te kai ae te aketia, ae ab'akina bon tebubua tebwiina te tientemiita ab'akina, onobwi ma onoua te tientemiita raababana, ao onobwi ma onoua te tientemiita rietana.

² E kabira nanona ma tinanikuna n te koora ae itiaki ao e karaoa mataniwiina te koora ni katobibia.

³ E karaoi m'am'a koora aika aua, ao e kanim n tatabeua nako ma rangan te Atiniberita ake aua.

⁴ Ao i mwiina, e karaoi taian boua aika uaai man te kai ae te aketia, ae e kabiraki n te koora,

⁵ ao e karin i nanon taian m'am'a akekei, b'a e aonga ni konaa n uotaki te Atiniberita n taian amo akekei.

⁶ Matan te Atiniberita ni kabutaa, are karaoaki man te koora ae itiaki, bon te tabo n akoi

⁷ E karaoi baike a maiu aika iai baiia ni kiba aika uaai aika koora

⁸ aika a amanaki ao a katokaaki i aon tabon te Atiniberita ake uoua.

⁹ A kaai ni kaaitaraa, ao a rabuna aon te tabo n akoi baiia ni kiba.

Taiboran te Kariki are E tabu

¹⁰ Ao e karaoa te taibora man te kai ae te aketia Betarera ae wanibwi ma wanua te tientemiita ab'akina, abwi ma aua te tientemiita raababana ao onobwi ma onoua te tientemiita rietana.

¹¹ E kabiria n te koora ae itiaki ao e karaoa mataniwiina ni katobibia

¹² ma tokina ae itibwi ma nimaua te mirimiita matentenna,

¹³ E karaoi m'aam'a koora aika aua ao e kanim nakon taian ranga n tatabeua nako

¹⁴ i rarikin te mataniwi. A na karin amon te taibora i nanon taian m'am'a

¹⁵ ao a riai ni karaoaki man te kai ae te aketia ao a kabiraki n te koora.

¹⁶ A na bane b'aai nako akana i aon te taibora ni karaoaki naba n te koora—taian boora, taian raurau, taian tiaeki, ao taian m'angko i bukin te angab'ai are te wain.

Te Kaintaura

¹⁷ Ao e karaoa te kaintaura Betarera man te koora ae itiaki. E karaoaki te kaintaura, n reitaki ma katamaroaana aika taian uee, a bane ni karaoaki man te koora ae ti teuana ae e amanaki,

¹⁸ ma tenua m'aangana n iterana ake uoua.

¹⁹ Bon iai katamaroaan ueen te kai te amon aika tenua ni katoa m'aangana

²⁰ ao aua i aon kaina.

²¹ Bon iai naba taian uee aika a ure n te tabo are a otinako mai iai m'aanga ake kakauoua ma ni kaina.

²² A karaoaki kaintaura, n reitaki ma taian m'aanga ao taian uee ni katamaroa, man te koora ae raneanea ae ti teuana ae e tia n amanaki.

²³ Bootan te koora ae raneanea are e kamanenaaki n te taura ma b'aina nako,

²⁴ n reitaki ma taian turee, e kaaniia tenibwi ma nimaua te kirokuraem.

Te Baonikarea i bukin Kabuokan Te B'ainikaboiarara Are E Kaakabubuaki

²⁵ E karaoa naba te baonikarea Betarera i bukin te b'ai ni kaboiarara are e kaakabubuaki man te kai ae te aketia. Buuburana bon abwi ma nimaua te tientemiita ao raababana ma ab'akina ae ruabwi te tientemiita rietana ma koonana aika a rine rake kaanga koron te kaomm'aane.

²⁶ E kabiria n te koora ae itiaki ao e karaoa mataniwiina ni katobibia.

²⁷ Ao e kanim taian m'am'a aika koora n iterana ake uoua n te aro are e na konaa ni uotaki iai te baonikarea n taian amo.

²⁸ A karaoaki naba taian amo aikai man te kai ae te aketia ao a kabiraki n te koora.

Te B'a i bukin Te Katabutabu Ao Te B'ainikaboiarara Are E kaakabubuaki

²⁹ Ao e rengana te b'a i bukin te katabutabu Betarera ma te b'ai ni kaboiarara ake a rengana te b'ai ni kaboiarara are e kaakabubuaki.