Te Otinako 29 - Te B'aib'ara

Tuua i bukin Katabuaia Ibonga E taku te UEA nakon Moote:

¹ Kam na rinea te kaomm'aane ae uarereke ao uoman tiibu mm'aane aika akea toabuakan rab'ataia, ngkana kam na katabuaia natin Aaron b'a a na riki b'a au ibonga.

² Ao i mwiina, kam na karaoi ten aekaki taian kariki aika aki karikaki. Tabeua mai iai b'a taian kariki aika a buubura, ao tabeua b'a taiani kariki aika uarereke aika renganaki ma b'aan te oriwa, ao nikirana a na karaoaki b'a taian kariki aika mmani aika kabiraki aoia n te oera.

³ Kaaki taian kariki aikai i nanon te b'aene ao uoti ngkana kam roko ni karean maan ake teniman nako Iu.

⁴ Kairiia Aaron ma natina mm'aane nako mataroan te Um'antabunrianna b'a a na tebotebo.

⁵ Karina kunnikain Aaron te kabaraaki n ibonga, te niiniira are mena i aan te raburabu ae tabu, ao bon te raburabu n ti ngaia, te ub'a, ao te kabaean nuuka.

⁶ Katoka ana m'aita ma te koora ae irariki ae nib'aaki te koroboki i aona

⁷ ao i mwiina, kam na katabua ni kab'aroa i aon atuuna b'aan te oriwa.

⁸ I mwiin anne, kam na karina kunnikaiia n ibonga aika kaokoro natin Aaron mm'aane

⁹ ao b'araia ao aia kabae n nuuka, ao i mwiina, kam na katabuia, i bukina b'a ana teimatoa n riki aia kariki b'a ibonga.

¹⁰ Kaira te kaomm'aane nakon mataroan te kawai nakon te Um'antabunrianna, ike a na katokai iai baiia Aaron ma natina mm'aane i aon atuuna.

¹¹ Tiringa te kaomm'aane i rarikin au baonikarea i matan te Um'antabunrianna.

¹² Kamanenai tabonibaimi ni kabiri koonan te baonikarea n tatabeua nako ao kab'aroa nikiran te raraa i aon te tano i rarikin te baonikarea.

¹³ I mwina, anaa te nenea mai rarikin te man, ao ai uana naba m'akoron te ato are mai nano ao taian kirine ma neneaia, ma ni kabuoki i aon te baonikarea.

¹⁴ Ma a na riai ni kabuokaki i tinanikun aia maeka te iriko ni man, te kun, ao te am'arake are tiku i nanon biroton te kaomm'aane b'a te angab'ai i bukin te buubuti kab'araan aia bure ibonga.

¹⁵ Uota temanna mai buakoia tiibu mm'aane nakon Aaron ma natina mm'aane ao tuangiia b'a a na katokai baiia i aona.

¹⁶ Tiringa te tiibu te mm'aane ao tatauriia raraana nakon iteran te baonikarea ake aua.

¹⁷ Korokorea te tiibu mm'aane, teboki kanoannanona ma waena ake mai buki, ao kawenei i aon te baonikarea m'akorona ni kabane n reitaki ma atuuna.

¹⁸ Ao i mwiina, kam na kakoaua raoi b'a e tinimaki raoi rab'atan te man ni kabane b'a e na kakukureiai boina.

¹⁹ Uota te tiibu mm'aane nakon Aaron ma natina mm'aane ao tuangiia b'a a na katokai baiia i aon atuuna.

²⁰ Tiringa te tiibu mm'aane ao kaaki raraana teutana i aon reben taningan Aaron are te atai, ao i aon waebuan tabon waena are te atai. Karaoa naba ae ai aron anne nako ia natina mm'aane n tatabemaniia, ao taauria nako nikiran te raraa nakon iteran te baonikarea ake aua.

²¹ Ao i mwiina, anaa teutana te raraa man te baonikarea, ao renganna ma te oera are e kamanenaaki i bukin te katabutabu, ao tatauriia iai kunnikain Aaron, ao kunnikaia naba natina mm'aane. E na kaotaki iai b'a a tia ni katabuaki ma aia kunnikai nako Iu.

²² Bon kanoan naba te katabutabu te tiibu mm'aane aei. Ma ngaia are, kanakoi rangana akana mai buki.

²³ Anaa teuana te kariki man aekaki ni kariki n tatabeua nako man te b'aene,

²⁴ ao katuka te kariki anne, n reitaki ma te iriko ni man, nako nanon baiia Aaron ma natina mm'aane. Ao i mwiina, a na tabekaki rake ma ni kaotaki b'a e katabuaki b'a au b'ai.

²⁵ I mwiin aei, e na katukaki te iriko ni man ma te kariki i aon te baonikarea ma ni kawaerakea bubuna ma boina are N na kukurei iai.

²⁶ Kam na kana te rinikaokao are e a tia ni kaokoroaki man te kauoman n tiibu aei, ma kam riai moa n tabeki rake ma ni kaotii b'a a tia ni katabuaki b'a au b'ai.

²⁷ Ni boong aika na roko ngkana arona b'a iai Iteraera ane e anga rinikaokaon ma rangan te tiibu mm'aane ake mai buki b'a tao b'ain katabuaia ibonga ke i bukin te buubuti te kakab'aia,

²⁸ ao e na aranaki te irikoniman b'a au b'ai, ma e na riai ni kanaki irouia ibonga. E na aki manga bitaki te tua aei.

²⁹ E na kakaawakinaki kunnikain Aaron n ibonga nakon rooro nako ae na manga onea mwiina n riki b'a te ibonga ae rietaata,

³⁰ ao a na riai ni kunnikainaki ni kunnikai aikai ni kaitiuani bongin te bootaki ni katabutabu.

³¹ Kaburoa irikon te tiibu are b'ain te katabutabu n te tabo are e tabu,

³² ao a na kaai ni kanna Aaron ma natina mm'aane n reitaki ma taian kariki ake tenaekaki akekei n te mataroa n rin nakon te Um'antabunrianna.

³³ E na karaoaki te bootaki ni kab'ara bure i bukiia ma kanaia aika a tabu i nanon taini katabuaia. Ti i nanon te tai anne ae a konaa ni kanna iai.

³⁴ Ngkana arona b'a iai nikiran te am'arake are e tabu ae e tiku nakon te moaningabong are i mwiina, e na riai ni kabuokaki.

³⁵ Karaoa te bootaki ni katabutabu i bukin Aaron ma natina mm'aane i nanon itiua te bong aika ti te bo kanoaia, n aron are I a tia n reireiniko.

³⁶ Kam na katoa bong n anga te kaomm'aane b'a te karea i bukin kab'araan buure n ai aron kaitiakan te baonikarea. N reitaki ma anne, ko na taauria te baonikarea ni b'aan te oriwa b'a e aonga n tabu rab'atana ni kabane.

³⁷ Kam na karaoa aei i nanon itiua te bong, ao e na riki n tabu iai te baonikarea n te aro are a na bane n tabu akana a riiringnga.

Te Karea are Katoabong E taku te Atua:

³⁸ Kam na riai ni kareana uoman te tiibu mm'aane ae uoua ana ririki ni maiu ni katoa bong,

³⁹ temanna n te ingabong ao temanna n te tairiki.

⁴⁰ Kam na anga ni kaairia ma te tiibuteteei, teuana te kirokuraem te buraawa ae e renganaki ma teuana te riita b'aan te oriwa ni koaua b'a te angab'ai.

⁴¹ I rangi ni kukurei ni boiararan te karea aei i aon ain te baonikarea.

⁴² Kam riai n angaanga te karea aei n taai nako ngkoe ma am kariki

⁴³ i aon te baonikarea are ni mataroan te Um'antabunrianna. Kaain Iteraera, N na manga kaitibo ma n taetae ma ngkami ikekei, ao e na riki n tabu te tabo anne n ootan mimitongiu.

⁴⁴ E na riki n tabu te Um'antabunrianna i buku, ao a na nako raoi aia m'akuri n ibonga Aaron ma natina mm'aane.

⁴⁵ N na maeka i buakomi b'a Atuami Ngai,

⁴⁶ ao kam na ataia iai b'a bon te UEA Ngai ae Atuami, are E kamaiungkami mai Aikubita, b'a I aonga ni konaa ni maeka i buakomi.