Te Otinako 27 - Te B'aib'ara

Te Bao ni karea i bukin Te Angakarea E taku te UEA nakon Moote:

¹ Karaoa te baonikarea man te kai ae te aketia ae uoua ma te kuata ni miita raababana ma ab'akina ae teuana ma te katenim'akoro rietana,

² ao kaoti rakei koonana ake aua kaanga koron te kaomm'aane. Ao i mwiina, kabira te baonikarea ni kabane n te buraonti, n reitaki ma korona ake aua.

³ A na bane b'ain nako te baonikarea ni karaoaki n te buraonti, taian baan i bukin te mannang ae kabuebue, te tiabora, taian boora n tataauri, kainiwaiteken te irikoniman, ao baanin te ai.

⁴ Karaoa te b'ai ae rinenako ni katobibia te baonikarea i nuukan tabona mai eta ma tabona mai nano,

⁵ ao kabira oina, kabira kaam'akoron bukin te baonikarea mai nano n te warawara te buraonti ni katamaroaa. Ao i mwiina, kanim'a te m'am'a te buraonti i aan te b'ai are e rine nako ni katobibia te baonikarea ni koonan te baonikarea ake aua.

⁶ Kabiri taian amo ake uoua ake a karaoaki man te kai te aketia n te buraonti

⁷ ao karin i nanon taian m'am'a b'a b'ain uotakin te baonikarea.

⁸ Karaoa te baonikarea kaanga tein te b'aoki ae e uki, n aron are I a tia ni kaotia nakoim i aon te maunga.

Te Katawanang i Tinanikun Te Um'antabunrianna E taku te Atua

⁹ Karaoa te katawanang ni katobibia te Um'antabunrianna ae abwi ma aua te miita ab'akina, i maiakina ma meaangina

¹⁰ ao uabwi ma uoua te miita raababana i mainikuna ma maeaona.

¹¹ Katei uabwi taian boua buraonti i aon taian kaintei i bukin maiaki ao meang

¹² ao tebwina i bukin maeao.

¹³ Ao i mwiina, katinea te keeten ni kaokoro ae tamaroa

¹⁴ i aon bouan nako rarikina ake tenua.

¹⁵ Kamanenaa te matau te tirewa ma kaibiti i bukin katineana.

¹⁶ Kamanenai aua riki taian boua mai buakon aikai i bukin mataroan te kawai n rin, ao i mwiina, katinei raoi taian keeten ake a korotinaki ake a karaoaki n te riinen ae tamaroa ae ruaiwa te miita ab'akina ae karaoaki man te burae n tiibu ae buru, uraro, ao ae uraura.

¹⁷ A na riai n uoua ma te kuata te miita rietan taian keeten ake a katobibia te katawanang

¹⁸ ao a riai n katineaki man taian boua buraonti ao taian matau aika taian tirewa ao taian kaibiti.

¹⁹ A riai ni karaoaki nikiran b'ain nako te Um'antabunrianna man te buraonti, n reitaki ma taian beke i bukin te auti n rianna ao i bukin naba te keeten are katobibia te katawanang.

Oeran Te Taura N Te Tabo Are Moan Te Tabu E taku te Atua nakon Moote:

²⁰ Mwiokoia Iteraera b'a a na kaakatauraoa b'aan te oriwa ae itiaki. Kam na karaoa aei b'a e aonga n teimatoa uran te taura

²¹ i matan te keeten are e kaokoroa te tabo are e tabu ma te tabo are moan te tabu, are kaawakinaki iai te Atiniberita. Tabeia Aaron ma natina mm'aane kaakauraan te taura ni katoa tairiki i nanon te Um'antabunrianna. A riai Iteraera n ongotaeka nakon te mwioko aei.