Te Otinako 21 - Te B'aib'ara

Tooro aika Ebera

¹ Aikai tuua ake E anga te UEA nakon Moote i bukiia ana aomata:

² Ngkana kam kabooa te toro ae te Ebera, ao e na riki b'a ami toro i nanon onoua te ririki. Ma kam na kainaomata ngkana e koro itiua ana ririki iroumi, ao akea te b'ai ae e na kabooa iai inaomatana mairoumi.

³ Ngkana arona b'a e roronga n te tai are e kabooaki iai, e na kainaomataaki n ti ngaia. Ma ngkana arona b'a e a tia ni mare, ao e na kainaomataaki ma buuna.

⁴ Ao ngkana arona b'a kam anganna buuna, ao a riki natiia, ao bon ti te mm'aane are e na kainaomataaki; ao a na tiku buuna ma natina b'a ana b'ai te tia b'aib'ai.

⁵ Ngkana arona b'a e rangi n tangira buuna ma natina te mm'aane n te aro are e aki konaa ni kiitaniia,

⁶ ao e na tei i rarikin mataroan ke bouan te mataroa n te tabo n taromauri, ao e na ewara taningana teuare e b'aib'ai i rouna n te biti ae kakang tabona. Te aro aei are e na riki iai b'a te toro ni kabane maiuna.

⁷ E na bon aki konaa naba ni karekea te inaomata te nati ae e kaboaki nako iroun tamana n aron te mm'aane anne.

⁸ Ngkana arona b'a e aki kukurei te mm'aane are e kabooaki b'a e na riki b'a buuna, ao e na manga kabooa ni kaokia E aki konaa ni kabooa nako nakoia ianena; b'a e na uruaki iai te boraraoi are e karaoia ngkoa ma ngaia.

⁹ Ngkana arona b'a e rineia b'a buun natina te mm'aane, ao e na tararuaia raoi b'a kaanga bon oin natina te aine.

¹⁰ Ngkana arona b'a e a manga mare te mm'aane anne ma te aine temanna, e na bon teimatoa naba ni kaakarekea kanan te aine are e kabooa ma kunnikaina ma ni karaoa aron ae bon te buu ni koaua.

¹¹ Ngkana arona b'a e aki koro bukin aikai i rouna, ao e na kainaomataaki te aine anne n akea boon kainaomataana.

Te Tiritiri ma buure riki tabeua E taku te UEA:

¹² Tuaan te tiriaomata bon te manga tiringaki.

¹³ Ngkana arona b'a tiaki nanona n tiritiri, ao bon Ngai ae te UEA ae e karika anne, ao kam na riai ni biri nako n rawea maiumi n taabo ni kamanomano ake I a tia ni kaokoroi.

¹⁴ Ao ngkana arona b'a kam a kaman iaiangoa tiringan te aomata temanna, ao bon akea maiumi, kam aki maiu naba ngkana arona b'a kam nimta te baonikarea. Kam na katikitikaki nako ma n tiringaki.

¹⁵ Tuaan te aomata ae e un ma tamana ke tinana bon te tiringaki.

¹⁶ Tuaan te aomata ae e iraea te aomata. Ngkana arona b'a kam kaboa nako te aomata are kam kimoaia, ke ngkana kam kawiaaki ma ngaia, kam na bon anganaki naba te tuua are te tiringaki.

¹⁷ Tuaan te aomata ae e karereantia tamana ke tinana bon te tiringaki.

¹⁸ Ngkana arona b'a iai i roumi aika kauntaeka, ao a oroia i bon i rouia ke n karekare ke a oro n aia timoi, n te aro are a rang ni ikoaki i bon i rouia. Ngkana arona b'a e aki konaa n nakonako temanna,

¹⁹ ao i mwiina, e nakonako ma te oko, ao te aomata are e kaikoakia e na kabooi mwiin taai ake a bua iroun teuare e ikoaki ma ni buokia ni karokoa marurungina.

²⁰ Tuaan te aomata ae e oroia ana toro ni karokoa mateia bon te tiringaki.

²¹ E ngae n anne, ma ngkana e maiu te toro anne i nanon tabebong i mwiin oreana, ao e na bon katuaaeaki. E bon okiria te kangaanga b'a e na aki m'akuri te toro anne i bukin ikoakina i mwiin oreana ngkai e na bon m'akuri i rouna ngkai bon ana b'ai.

²² Ngkana arona b'a e ikoaki te bikoukou i mwiin unna ma temanna. Ngkana arona b'a e ikoaki korakora, e na kabooa mwiin ana kaikoaki n aron are e tangiria buun te aine are e ikoaki ao ni kaineti naba ma are a tia n ri nanona taani moti.

²³ Ao ngkana arona b'a e rangi ni korakora, ao e na kabooaki n are te maiu boona te maiu,

²⁴ te mata boona te mata, ao te wii boona te wii, te bai boona te bai, ao te wae boona te wae,

²⁵ te bue boona te bue, te ikoaki boona te ikoaki, ao te oreaki boona te oreaki.

²⁶ Ngkana arona b'a kam orea ami toro temanna n te aro are e ikoaki iai kanoan matana, ao e na riai ni kainaomataaki te toro anne.

²⁷ Ti te bo naba te tua aei nakon te toro ae e b'aka wiina-e na kainaomataaki.

²⁸ Ngkana arona b'a iai te kao mm'aane ae tiringa temanna te aomata ni korona, e na tiringaki ma ni karenakoaki irikona, ma bon akea ana bure iai te aomata are ana man.

²⁹ Ngkana arona b'a e aki toki ana man te kao temanna n unun nakoia aomata, ao e rawa te aomata are ana man ni karinna n te o. Ngkana arona b'a iai konan te kao anne ae e tiringnga, ao a na kaai ni karebanaaki n te atiibu te kao ma te aomata are ana man ni karokoa mateia.

³⁰ Ngkana arona b'a a kariaia ana utu te aomata are e mate iroun te kao b'a e na kaboaki mwiin aia mate, ao e na riai te aomata are ana man te man ni kab'aka ni kabane te b'ai are e tangiraki.

³¹ E na b'ainaki naba te tua aei nakon te ataeinimm'aane ke te ataeinaine ae e ikoaki ni korona.

³² Ngkana arona b'a e tiringa te toro te kao mm'aane, e na kab'aka boon maiun te toro te aomata are ana man te man, n te m'aiti ae tenibwi te m'akoro n tirewa nakon te tia b'aib'ai iroun te toro, ao e na karebanaaki te kao anne n taian atiibu ni karokoa matena.

³³ Ngkana arona b'a e mate te kao mm'aane ke te aati ngke e b'aka i nanon te rua ae kam kenna ke kam kiitanna n aki rabunna i abami.

³⁴ Kam na kab'aka boon te man are e mate, ao kam na anaia b'a ami man.

³⁵ Ngkana arona b'a e tiringa ana man te aomata temanna ami kao mm'aane, e na kaboaki nako ami man anne. Ao e na anaaki te m'ane are boona ao irikon te man are e mate ao e na tib'aaki raoi nako imi ma te tia b'aib'ai are temanna.

³⁶ Ngkana arona b'a kam rawa n ooa ami kao ae e unun nakoia maan tabem'aang, ao kam na kabooi mwiin b'aai aika e tiringiia, ao kam na anaa te man are e mate b'a ami man.