Te Otinako 16 - Te B'aib'ara

Te Maana (Manna) Ao Te Kuere

¹ Ao a m'ananga nako te botannaomata are Iteraera mai Erim, ao n te katebwi ma nimaua ni bongin te kauoua n nam'akaina i mwiin kiitanakin Aikubita, ao a roko n te Rereua are Tin are mena i marenan Erim ma Tinai.

² Ao a ngurengure nakoni Moote ma Aaron i nanon te rereua arei

³ ao a taku nako ia, “Ti bia kaman tiringaki iroun te UEA ngke ti boni mena i Aikubita. Ngke ti mena n te tabo ike ti tekateka ma karara taian irikomaiu ni katoki nanora n aekaki n am'arake nako ake ti tangiri. Ma ko uotiira mai b'a ti na mate ni baki i nanon te rereua aei.”

⁴ Ao E taku te UEA nakoni Moote, “Ngkai N nang kab'aka te am'arake mai karawa kaanga te karau i bukimi ni kabane. A na otinako aomata ni katoa bong n rikoi kanaia ae bon tau i bukin anne. Ao N na kona ni kataia n te aro anne b'a a na iri au kaetieti ke a na aki.

⁵ A na kabatiai riki kanaia aika a rikorikoi nakon are a bon tataneiai iai n te kaonoua ni bong, ao ma ni katauraoia.”

⁶ Ao e taku Moote ma Aaron nakoia Iteraera ni kabane, “Nakon te tairiki aei, ao kam na ataia b'a bon aei te UEA are kaotinakoi ngkami mai Aikubita.

⁷ Nakon te moanibong ao kam na noora raitiitin ootan mimitongin te UEA. E a tia n ongo ngurenguremi nako Ina---kam aki ngurengure nako ira b'a ngaira bon ti taani kakoroi mwiin Ana babaaire.”

⁸ Ao e taku Moote, “Bon te UEA ae na anganingkami te iriko are kam na kanna nakon te tairiki, n ai aron m'aitin te kariki ae kam kakanna n te ingabong, i bukina b'a E a tia n ongo m'aitin ngurenguremi nako Ina. B'a ngkana kam ngurengure nako ira, ao kam boni ngurengure iai nakon te UEA.”

⁹ Ao e taku Moote nakon Aaron, “Tuangiia te botannaomata ae Iteraera b'a a na roko n tei i matan te UEA, b'a E a tia n ongo ngurengureia.”

¹⁰ Ao e taetae Aaron nakoia te botannaomata arei ni kabane, ao a tei ni kaaitaraa te rereua Iteraera ni kabane, ao e karina ni kaoti raitiitin ootan te UEA nakoni Moote.

¹¹ Ao E taku te UEA nakoni Moote,

¹² “I a tia n ongo ngurengureia Iteraera. Tuangiia b'a e na reke kanaia te iriko nakon te tairiki, ao e na reke kanaia te kariki ae bati nakon te moaningabong. Ao ane a na ataia b'a bon te UEA Ngai ae Atuaia.”

¹³ Ao a roko taian nanai ni kuere aika m'aiti n te tairiki anne ni kabuta aia maeka arei, ao te ingabong are i mwiina, e wene te aoi ni kabuta aia maeka naba arei.

¹⁴ Ao ngke e a mauna nako te aoi ni kabuebuen taai, ao iai te b'ai ae mmani ae bebete i nanon te rereua. Kaanga ai aron marauraun te aiti ae mmani.

¹⁵ Ao ngke a nooria Iteraera, ao a aki ataia b'a tera, ao a titiraki i bon i rouia, ao a taku, “Tera te b'ai aei?” Ao e taku Moote nako ia, “Bon aei te am'arake ae e a tia te Atua n anganingkami b'a kanami

¹⁶ E a tia te UEA n tuangkami b'a kam na rikoi kanami n tatabemaningkami nako, ae bon tau; uoua te kiro i aoia kaain te auti n tatabeua nako.”

¹⁷ Ao a karaoa aei Iteraera, ao tabeman a rangi ni kabatia, ao tabeman bon ti teutana.

¹⁸ Ao ngke a karaua ni baaireia, ao koraki ake a kabatia n anaia bon akea nikiran kanaia, ao koraki ake ti tabeua kanaia, bon akea naba nikiran kanaia

¹⁹ Ao e taku Moote nako ia, “Akea ae na katuka teutana nakon te ingabong.”

²⁰ Ma bon iai naba tabem'aang ake a aki kan ongo irouni Moote, ao a katikui tabeua. Ao n te ingabong are i mwiina, ao a onrake n te ino ao a boira. Ao e un Moote i rouia.

²¹ Ao a bane n rikoi kanaia aomata aika bon tau ni katoa bong, ao ngke e a tabe ni kabuebue taai, ao a bane n ran nako nikiran ake i aon te tano.

²² Ao n te kaonoua ni bong, ao a rikoi kanaia ni kam'aiti, uoua te tai are a ririkoi mai m'aaina; aua te kiro i aon temanna. Ao a bane n roko taani kairiri n tuanga Moote te b'ai arei,

²³ ao e taku nako ia, “E a tia n tua te UEA b'a bon te bong ni motirawa nakon te ingabong. Te bong ae katabuaki i bukina. Kam'ai n te bong aei, akana kam tangiri ni kaburoi, ao nikiraia kam na kaawakin i bukin te ingabong.”

²⁴ Ao a kaawakin taian nikira nakon te bong are i mwiina, ao a aki roko n te buakaka ke n ino.

²⁵ Ao e taku Moote, “Kang aikai n te bong aei, b'a bon te Taabati te bong aei, te bong ni motirawa ae katabuaki i bukin te UEA, ao kam na bon aki kona ni kunea te am'arake i tinanikun aia maeka.

²⁶ Kam na rikorikoi kanami i bukin onobong te bong, ma bon akea n te kaitiua ni bong are te bong ni motirawa.”

²⁷ Ao a nako tabeman b'a a na rikoi kanaia n te kaitiua ni bong, ma bon akea ae reke i rouia.

²⁸ Ao E taku te UEA nakoni Moote, “E aera ngkai kam aki kan ongo Au babaaire ngkami aika au aomata?

²⁹ Uringnga b'a I a tia n anganingkami te bong ni motirawa Ngai ae te UEA, ao bon anne bukina are I aki toki n anganganingkami iai kanami ae tau i nanon te ka onoua ni bong i bukin uabong. B'a a na bane aomata n aki nakonako man te tabo are a mena iai n te kaitiua ni bong, ma n aki kiitan aia auti.”

³⁰ Ma ngaia are a aki m'akuri aomata n te kaitiua ni bong.

³¹ Ao a arana te am'arake arei aomata b'a te maana. Kaanga ai aron te ati ae mainaina, ao kaanga kanakin te bitiketi ae renganaki ma ana karewe te manibeeru.

³² Ao e taku Moote, “E a tia te UEA ni mwiokoira b'a ti na kaawakin tabeua te maana, i bukiia kanoara rimwi, b'a a aonga n noora te aekaki n am'arake are E anganiira te UEA n te rereua ngke E kaotinakoira mai Aikubita.”

³³ Ao e taku Moote nakon Aaron, “Anaa te tiaeki, ao karin i nanona uoua te kiro te maana, ao katikua i matan te UEA b'a a na kaawakinaki i bukiia kanoara rimwi.”

³⁴ Ao Aaron, e katikua i matan te Atiniberita, b'a e aonga ni kaawakinaki n aron Ana mwioko te UEA nakoni Moote.

³⁵ Ao a kang maana Iteraera i nanon 40 te ririki ni karokoa rokoia i Kanaan, are a tekateka raoi iai.

³⁶ Te b'ai n taurawawata are b'ainaki n te tai arei, e kan tii teboo ma uabwi te kirokuraem.