Te Otinako 15 - Te B'aib'ara

Ana Anene Moote

¹ Ao a anenea te anene aei Moote ma Iteraera nakon te UEA: “N anene nakon te UEA i bukina ngke E a tia n reke i Rouna te tokanikai ae kakannato; E a tia n karenakoia taian aoti ma taan toka i aoia nako nanon taari.

² Bon otangau ae matoatoa te UEA; boni Ngaia ae E a tia ni kamaiuai. Bon Atuau, ao N na neboia, Bon Tamau te Atua, ao N na anenea korakorana.

³ Bon te tia buaka te UEA, ao bon te UEA arana.

⁴ “E tewenakoia aia taanga ni buaka kaain Aikubita i taari; A b'ab'a i Taari are Uraura ana aobitia ake a bane aroia.

⁵ A rabunaki n taari ae nano; a inako nako kabina n ai aron te atiibu.

⁶ “E kakamaaku m'aakan baim are te atai te UEA, e urua te kairiribai ni kamaerikirikia.

⁷ Ko tewenakoia am kairiribai ni mimitongin am tokanikai; ao e tii nako uran unim ni kabuokiia n ai aron te uteute ae m'au.

⁸ Ko uka aon taari, ao e a ikoikorake n rietaata te ran; e a teirake kaanga te o; ao e a tabe ni matoa kabin taari are te kabanea n nano.

⁹ E taku te kairiribai, ‘N na kakioia ma n raweia. N na tib'ai kaub'aia ma n anai b'aai ni kabane aika I tangiri; N na buuta au kabaang ma n anai b'aai ni kabane ake i rouia.’

¹⁰ Ma ti teuana ikeikem te UEA, ao a b'ab'a naba kaain Aikubita; a inako n ai aron te buange i nanon te ran ae marebu.

¹¹ “Te UEA, antai ae ai arom i buakoia atua? Antai ae katotongko n arom ae Ko tabu ma ni mimitong? Antai ae kona ni karaoi kakai ma m'akuri aika ab'ab'aki n aron am m'akuri?

¹² Ko arora nako baim ti te angaatai, ao a kab'autaki naba ara kairiribai iroun te aonnaba.

¹³ Ko kakaonimaki nakon Am berita, ao Ko kairiia aomata ake Ko kamaiuia; Ko kaawakiniia ni korakoram ni karokoa rokoia i abam are tabu.

¹⁴ A tia n ongo botannaomata, ao a ruru ni maaku; ao a rootaki kaain Biritia n te maaku.

¹⁵ A maaku taani kairiri i Etom; a ruru m'anen Moaba ake a korakora; ao a biu kaain Kanaan.

¹⁶ A taonaki n te maaku ae moan te korakora. A noora korakoran te UEA, ao a tei n akea angin nanoia i bukin te maaku ni karokoa banen raoi am aomata ni m'ananga i rarikiia ake am aomata ngkoa ake Ko kainaomataia man te toronaki.

¹⁷ Ko uotiia ni kariniia, ao Ko unikia i aon te maunga, te tabo ike Ko a tia n rineia te UEA i bukin Am auti, te Tembora are Ko boni kateia.

¹⁸ Te UEA Ko na riki b'a te UEA n aki toki.”

Ana Anene Miriam

¹⁹ A nakonako Iteraera i nanon taari i aon te tano ae m'au. Ma ngke a nako nanon taari aia kaa ni buaka kaain Aikubita, ma aia aoti ma taani kabutii; ao E a manga kaoka taari te UEA, ao E rabuniia.

²⁰ Ao e anaa ana timbere Nei Miriam are m'anen Aaron, ao a bane aine ni iria ni katangtang n te timbere ma ni m'am'aie.

²¹ Ao e anene Nei Miriam nako ia: “Anene nakon te UEA b'a E a tia ni karekea te tokanikai ae mimitong; E a tia n tewenakoia taian aoti ma taan toka i aoia aoti i taari.”

Te Ran Ae Tarika

²² Ao i mwiin anne, ao e kairiia Iteraera Moote man Taari are Uraura nakon te Rereua are Tiura. Ao a nakonako i nanon te rereua i nanon tenua te bong, ao e aki roko n te reke te ran i rouia.

²³ Ao i mwiina, a roko n te tabo ae aranaki b'a Maara, ma e a manga rangi n tarika te ran ikekei n te aro are a aki kona ni mooi iai. Ao bon anne bukina are e aranaki iai b'a Maara.

²⁴ Ao a ngurengure aomata nakoni Moote, ao a taku, “Tera ngkai ae ti nang mooi iai?”

²⁵ Ao e kakorakora n tataro Moote nakon te UEA, ao E kaota te m'akoro ni kai te UEA nako ina, ao e karenakoa te kai Moote nako nanon te ran; ao e a riki naba ni mam te ran arei. Ao te UEA, E anganiia ikekei taian tua are a na maiuakinna, ao E boni kataia naba ikekei

²⁶ Ao E taku, “Ngkana kam na ongotaeka i Rou ni karaoi b'aai ni kabane ake I taku b'a a raoiroi, ao ni kaawakin au babaire, ao N na bon aki katuaaingkami n taian aoraki ake I karokoi ngkoa i aoia kaain Aikubita. Bon te UEA Ngai ae I kamaiungkami.”

²⁷ Ao i mwiina, a manga roko i Erim ike a mena iai 12 koburake n ran, ao itingaun taiani baam iai; ao a katei aia auti n rianna i bukin te ran.