Te Minita 9 - Te B'aib'ara

E Tau Te Bong Ma Kanoana

¹ I iangoi baikai. Ao i mwiina, I a ataia b'a bon iai m'aakan te Atua i aoia aomata ni kabane, e ngae ngkana ti wanawana ngaira aikai ao ti maiuakina te raoiroi. A konaa n riki b'aai ni kabane nakoira, ma ngaia ae, ti aki konaa n ataia b'a tera uotan te maiu, tao te raoiroi ke te buakaka.

² Ma ni koauana raoi e na bon ti te bo te b'ai ae e na riki naba nakoira ni kabane n tokina, e ngae ngkana tao ti maiuakina te raoiroi ma ni karinea te Atua, ke ngkana tao ti bure ma n aki karinea te Atua. Eng, e na bon riki naba te b'ai ae ti te bo ngkana ti anga ara karea nakon te Atua ke ngkana ti aki, ke ngkana ti kakoroa bukin ara berita ke ngkana ti urui.

³ E bon rangi n aki riai b'a e na booraoi rikin te b'ai ae ti teuana nakoira n tatabemaniira nako. Ti bon tei ni baba, ao ti rangirang ngkai ti maiu, ao i mwiina ti a manga mate.

⁴ Ngkai ti maiu ao bon iai ara kaantaninga, n aron te kamea ae e maiu e raoiroi riki nakon te raian ae e mate.

⁵ Ti ataia b'a ti na boni mate, ma ngkana ti mate, ao ti bon aki ataa te b'ai teuana. Bon akea te b'ai ae e raoiroi ae e na riki nakoira, ti nako ao e a m'aninga naba te aba taekara.

⁶ A kaai ni mauna nako ma aia tangira, aia riribai ao bakantangiia. A aki konaa te manga ira buakon b'aai aika a riki n te aonnaba aei.

⁷ Kakukureingkami ao kamaiu nanomi n am'arake mani mooi! Bon aei te b'ai ae e a kaman baaireia te Atua b'a kam na riai ni karaoia.

⁸ Karina kunnikaimi, koomiia irami, ao katikiraoingkami.

⁹ E kimototo te maiu aei, ao ko tangira buum, ma ngaia are, kakukureiko ni mena i rarikina. Bon aei te b'ai ae ko kaantaningaaki b'a ko na karaoia, ngkai ko tabe ni korakai n te maiu n te aonnaba aei.

¹⁰ M'akuri korakora ni b'aai ni kabane aika ko karaoi. Ko na waekoa n roko n aia aonnaba maate, ike akea iai ae e m'akuri, ke ni iango, ke ni kakaai bukin b'aai, ke n atai b'aai ni kabane.

¹¹ Ao aikai b'aai riki tabeua aika I a tia n noori i aan taai: Aika birim'aaka ao aomata aika a ninikoria a aki tootokanikai n taai nako n te kabobirim'aka ao te buaka. Te wanawana, ni ikotaki ma te niniwana ao te ataib'ai a aki anganiko te marurung n taai nako, te kaub'ai, ke tanoatan taekam. Ti bane n toa n te tekebuaka.

¹² Bon akea mai buakora ae e ataa te tai ae e na reke iai, b'a konan te kabuanib'ai ae e karina, are ti na kuneira iai kaanga te ika ae e bae n te karaun, ke te mannikiba ae e m'ane n te b'ai ni kam'ane.

E Raoiroi Riki Te Wanawana Nakon Te Nanobaba

¹³ N te tai teuana ao I a noora aia iango aomata i bukin te b'ai ae te wanawana.

¹⁴ E riki aei ngke e katobibia ma ni buakana te kaawa ae e uarereke te tia tautaeka ae e korakora, ike a maeka iai ti tabeman aomata. A tauraoi aia tautia kairiribai n urua oon te kaawa man rin nako.

¹⁵ Ma e maiu te kaawa arei ni wanawanan te aomata temanna ae e maiu ni kainano, are e a manga m'aninga te aba taekana n te tai ae e waekoa.

¹⁶ I iangoia b'a e raoiroi riki te wanawana nakon te korakora. Ma ngkana ko maiu ni kainano, ao bon akea temanna ae e kubariko, e ngae ngkana ko tim'aati.

¹⁷ Bon iai riki nanon te taeka ni wanawana ae e taekinaki ni kabebeteaki nakon takaaruan te tia tautaeka irouia nanobaba.

¹⁸ E tamaroa riki te wanawana nakon b'aai ni buaka, ma te kaairua ae ti teuana e konaa ni kamaunai am m'akuri ni kabane aika a raoiroi.