Tekaria 9 - Te B'aib'ara

A Na Katuaeaki Aia Kairiribai Iteraera

¹ Aio te rongorongo mairoun te UEA: E mena matana i aoia aomata ni kabane, ai moara ra riki barongan Iteraera. Ma ngaia are, e katanoataa te motikitaekaia kaawa aika Ateraka ao Tamateko.

² E na motikaki naba taekan te kaawa ane i rarikina ane Amata, ao ai uana naba ma Turo ao Titon, ake a wanawana kaaina.

³ E a tia Turo ni karaoa te nono ma ni kab'arikoirake taian tirewa ma koora, b'a kaanga ai aron te maange ke te bokaboka mani kawain nako nuukan te kaawa.

⁴ Ao ngkai E nang katuaaea Turo te UEA n te maiu ni kainano; e na kaiinakoi ana kaibuke nako ma ni kaurarakei.

⁵ A na kaai n ruru ni maaku Atikeron ao Kata. E na b'ara nanon Ekeron. E na tiringaki uean Kata, ao e na akea kaain Atikeron.

⁶ Aomata aika bon aekaki tabeua, a na tekateka i Atitota ao bon te UEA n ti Ngaia ae E na kimoa Biritia man kakatongana.

⁷ A na aki manga kana te iriko ni man kaain Biritia ae e raraa ke am'arake aika a aki itiaki. A na riki b'a raoia Ana aomata Atuara man te baronga are Iuta. Ao te Atua E na butim'aia kaain Ekeron, n aron naba are e karaoia nakoia kaain Iebuti.

⁸ E taku te UEA, “N na aki mamatu ni kakaawakina au Tembora mairouia aika a na roko ni buakanna. I ataa te b'ai ae e riki, ao bon akea temanna ae e na manga karaoa riki ae e buakaka nakoia Au aomata.”

E Taekina Rokon Te King Te UEA

⁹ Kukurei ao takaarua aomata ni kabane i Ierutarem, E a tia n tokanikai ami uea, ao E a roko ni kawaringkami. E nanorinano ao E toka i aon te ati; ao E roko i aon bunin te aati.

¹⁰ Boni Ngai ae te UEA ae N na uoti nako kaani buaka ao taian aoti mai i Iteraera ao Ierutarem. A na uruaki taiani kainikatebe ake a karaoaki i bukin te buaka. N na karokoa te rau i aoia botannaomata nako, ao e na tautaeka ami uea man taari nakon taari. E moa abanueana man te Karaanga are Iuberetiti ni kabuta te aonnaba.

E Berita Te UEA B'a E na Kamaiuia Taenikai

¹¹ Ngke I karaoa te boraraoi are e tabu ma ngkami, Au aomata, ti kanikinaea n te raraa. Ngkai tabeman maibuakomi bon taenikai n taian kinono aika akea te ran i nanoia, ma N na roko ni kamaiungkami

¹² ma n anganingkami te kaantaninga. Okira ami nono, b'a N na anganingkami kaniwangami uoua okiokin ami b'ai akana a tia n reke iroumi.

¹³ N na kamanenaa Iuta b'a Au kainikatebe ao Iteraera b'a Au kanoanikatebe. N na anaia kaain Tion b'a Au kabaang ma ni buakaniia kaain Kuriiti.

E Na Kaawakiniia Ana Aomata Te UEA

¹⁴ E na kaoti te UEA ae te Atua nakoia Ana aomata kaanga te nang, ao E na iti n oota Ana kanoanikatebe kaanga te iti. E na katanga ana buu te Atua ma ni buaka n te ukeukenanti mai maiaki.

¹⁵ E na kaawakiniia Ana Aomata te UEA ae Moan te M'aaka, ao a na kamanatuaia taani bana aika a baiteke ma aia bana. A na mooi ma ni kaberoro; a na riki b'a kaanga te boora ae e on n tain te angakarea.

¹⁶ E na kamaiuia te UEA ae te Atua n te bong arei, i bukina ngkai bon Ana aomata ngaiia, ao a na raneanea i aon te aba n ai aron taiani b'ai ni katamaroa n te baunuea.

¹⁷ Ai tangirakira. A na rikirake te roronrikirake ikekei n ai aron te uita i nanon te rereua ke te kureebe i nanon te nne n aroka ni kureebe.