Tekaria 12 - Te B'aib'ara

Ana Tokanikai Ierutarem

¹ Aio te rongorongo mairoun te UEA i bukin Iteraera: Bon te UEA Ngai! I arora nako taiani karawa; I kaaki te aonnaba i aon aana ao I anga te ikeike ni maiu nakoia aomata.

² I a tia ni iangoia b'a e na riki Ierutarem b'a te boora ni wain ae e na kamangingia botannaomata nako akana i rarikina. Ao ngkana e roko buakanakin Ierutarem, e na buakanaki naba Iuta.

³ Ma N na onika Ierutarem nakon te atiibu ae e rawaawata ae e na kamanatuaia aomata nako i aon te aonnaba aika a katobibia Ierutarem,

⁴ N na kakamaakuia aoti ni kabane ao a na mangaongao taan toka i aoia aoti. Ma, N na taratara Iuta n te tai naba anne.

⁵ Ao ane a na ataia te baronga are Iuta ae bon Atuaia Ngai ae te UEA ae Moan te M'aaka, ao boni Ngai oin korakoraia.

⁶ N na kariaia te baronga are Iuta n te tai anne b'a e na riki b'a te ai ae e mronron n te b'ariko ni kai ke te tooti ae e ura ni b'ariko n uteute aika a baaireaki raoi. Ao i mwiina, e na kaurarakei botannaomata ake a katobibia Iuta. Ao e na manga waekoa n okira arona te kaawa are Ierutarem n onrake n te aomata.

⁷ N na anga te tokanikai nakon Iuta, ma ngaia are, e na aki manga kakannato riki abanuean Tawita ma mimitongin te kaawa are Ierutarem ni kabane nakon Iuta n ti ngaia.

⁸ N na kaawakina Ierutarem Ngai ae te Atua. E na bon korakora naba te aomata ae te kabanea ni mamaara ikekei n ai aron Tawita, ao e na tautaeka abanuean Tawita b'a kaanga bon Au anera ae e riki b'a ana tia kairiiri.

⁹ I a tia ni iangoia b'a N na kamaunaia botannaomata nako ake a buakana Ierutarem.

Te Tanginiwenei I bukin Are E Ewaraki N Te Kainiwai

¹⁰ Boni Ngai ae te UEA ae N na karaoa ana kariki Tawita ma kaain Ierutarem b'a a na rangi n nanokawaki ao a na tataro ngkana a noora te aomata are e ewaraki n te kainiwai. A na tang ma n tanginiwenei i bukina, kaanga kaaro aika a tang i bukin maten natiia te rikitemanna ke aia karimoa.

¹¹ A na tang kaain Ierutarem n te bong arei kaanga m'aitin are a karaoia aomata nako i bukin Atata Rimmon n aaba ake a aoraoi i rarikin Mekito.

¹² A na bane kaain utu n tatabeua nako i aon te aba n tang, ao m'aane ana tang ni kaokoroia mairouia aine. A raonaki irouia ake man ana utu Tawita, ao ana utu Natan,

¹³ Rewi, Timei,

¹⁴ ao ai uana naba ma utu ni kabane ake tabeua.