Teb'ania 3 - Te B'aib'ara

Ana Bure Ierutarem ao Kamaiuana

¹ E a b'aka Ierutarem, mani mangaongao, te kaawa ae e rarawa. Ae e bon karawawataia ana aomata.

² E a tia n aki kan ongo iroun te UEA, ke n aki kan karin ana rerei. E a tia n aki onimakina te UEA, ma n rawa ni bubutiia buokana.

³ A bekorara aia mataniwi n ai aroia raian. Ai aroia kameanti aika bora ni baki ana taan motikitaeka, e aki kona n tiku nikiran kanaia nakon te ingabong.

⁴ A akea onimakinaia burabeti, b'a a aki kakaonimaki: Ibonga a kabaarekai baike a tabu ao a minota ana tua te Atua nakon oin nanoia.

⁵ Ma E bon mena te UEA i nanon te kaawa. E karaoa ae e eti ao E aki karaoa ae e bure. Ma aomata aika buakaka a bon teimatoa ni kakaraoa ae e bure ma te aki mamaa.

⁶ E taku te UEA, “I a tia n teweia nako botannaomata. I a tia ni kamaunai aia kaawa, ao a tiku n uruaki aia oo ma aia taua. E a riki n rereua aia kaawa; a akea kaain te kaawa-bon akea nikiraia.

⁷ Ao I taku b'a a nang tabeakinai man nanoni Au reirei nakoia, ma n aki kona ni m'aninga ake I a tia n reireia. Ma a manga waekoa naba n rairaki nakon m'akuri aika a buakaka.

⁸ “Ma ngaia ae kam na tataninga, bon ana taeka te UEA, “taningaa te bong are n na bairei taekaia botannaomata nako iai. I a tia ni baireia i nanou b'a N na bootia botannaomata nako iai. I a tia ni baireia i nanou b'a n na botiia botannaomata ma aaba n uea nako, n te aro b'a ana namakina korakoran uran uniu.

⁹ “Ao N na kaitiaka aia taeka botannaomata nako, b'a aonga n riki aia taeka b'a b'ain neboau; ao a na aki manga neboia anti riki tabem'aang.

¹⁰ Ake a raroa i Itiobia ake au aomata ake a uamaae nako; ana uotii mai naba aia karea nako iu.

¹¹ N te tai arei, ao N na kam'awaia taan kairiri aika a kamoamoa mani kainikatonga, ao ane ko na aki manga kainikatonga n au maunga are e tabu.

¹² N na katikuia aomata aika a nimamannei man nanorinano; aika a kawarai ni kan buokaki.

¹³ Ngkami aika Iteraera aika nikira ni maiu, ana bon aki karaoa te kairua nakoia tabem'aang, ana aki kewe, ana aki uarao. Ana katotongia tiibu aika a am'arake ma te rau, ana rawei motirawaia ao akea ae e na kamaiuia.

Te Anene Ni Kukurei

¹⁴ A bane n anene ni kukurei aomatan Iteraera ma Iuta. ma nanoia ni koaua

¹⁵ E a tia ni katoka oream te UEA; E a tia ni kanakoia am kairiribai. E a mena i buakomi te UEA ae aia uea Iteraera. Bon akea te b'ai ae ti na riai ni maaku iai.

¹⁶ E a roko te tai are ana kangai iai nakon Ierutarem. “Ko na tai maaku te kaawa ae Tion! Tai b'arannano.

¹⁷ E bon mena iroum te UEA ae Atuam Ko na tokanikai ni m'aakana. E kukurei te UEA iroum ao E na anganiko te maiu ae e boou n ana tangira. E na anene ni kim'areirei i aom.

¹⁸ n ai aroia aika onrake nanoia n te kukurei.” E taku te UEA, “I a tia ni uotaanako rekenikaim ao n taekaanako rawawatam.

¹⁹ E a roko te tai! N na katuaaia taan karawawatako; N na kamaiuia ake a ikoaki ao man kaokiia taenikai nakoni mwengaia. N na onika mamaaia nakon karineaia ao ana neboaki n te aonnaba ni kabane.

²⁰ E a roko te tai! N na kaokiia ake a maaenako nakon mwengaia. E na tanoata kakannatom n te aonnaba ao N na manga kaoka kab'aiam,” Bon ana taeka te UEA.