Tani Motiki-taeka 5 - Te B'aib'ara

Anenen Nei Tebora Ma B'araka Nakon Te UEA

¹ Ao e a toki te buaka n te bong arei, ao a anenea te anene aei Nei Tebora ma B'araka:

² Ti neboiko, te UEA. A anga nanoia ana tautia, a tauraoi ni iriko.

³ Kam na ongora uea ma taan tautaeka, ngkai I tabe n anene i bukin te UEA, ae Atuan Iteraera.

⁴ Ara UEA, Atuan Iteraera, Ngkana Ko roko mai Teira, ike a maeka iai kaain Etom,

⁵ e b'aro te karau mai karawa e ruru te aonnaba, ao a m'aeiei maunga.

⁶ I nanon ana tai Tiamka are natin Anata te m'aane, ao ngkai naba i nanon ana tai Nei Iaera, a rangi ni kamaamate taian kawai nakoia taiani kaa ake a katikitikaki irouia maan. Ao a na riai taani m'ananga n toua te kawai are ribuki,

⁷ a aki kona ni m'akuri kaain te kaawa n aia katawanang. Ao i mwiina, e a waaki Nei Tebora, ni kaawakina Iteraera n aron te tina ni kaawakiniia natina.

⁸ A taromauriia atua riki tabeman Iteraera, ao a rina ni buakanaki mataroan aia kaawa nako Ma bon akea aia otanga ke aia kainiwai ni buaka.

⁹ I neboiko, te UEA, ao I rangi ni kaitau i bukiia taani kairiiri ao tautia aikai aika a anga nanoia.

¹⁰ Ongora aomata ni kabane, ngkana tao kam tabe ni m'ananga i aon ami aati i aon kaintekatekan aon ami aati ke tao kam nakonako.

¹¹ Ao ngkami naba aika taani uouoti taian ran a na tuangko taiani man aika kawakawa ni kaangai, “E a tia te UEA n reke i rouna taian tokanikai, ao ai aroia naba Iteraera.” Ao i mwiina, a m'aati ana aomata te UEA rikaaki nakoni mataroan te kaawa

¹² ao a taku, “Nei Tebora, ti a nako. Ti na anene ngkana ti m'aati B'araka, ko na kataenikaiia ara kairiribai.”

¹³ A manga ikotaki ma aia tia kairiiri ana Aomata te UEA ake a tiku ao a buaka i buku.

¹⁴ A roko taanga ni buaka mai Eberaim n te tabo ike a maeka iai ngkoa kaain Amareka. Ao a roko tabeman man Beniamin; a roko taian aobitia ma taani kairiiri mai Makira ao Teburun

¹⁵ A roko mairoun Nei Tebora taan tautaeka ake man Itaakara, ao e iria B'araka nakon te m'arua. Ma bon akea buokan ana baronga Reuben iai.

¹⁶ Reuben, e aera ngkai ko tiku i buakon ooia am tiibu?

¹⁷ A tiku kaain Kireata ni iteran te Karaanga are te Ioretan. E aera kaain te baronga are Taan ngkai a tiku i aon aia kaibuke ao kaain te baronga are Atera a tiku i mataniwiin taari i rarikin taiani matabaiawa?

¹⁸ Ma a tatauraoi n anga maiuia tautian Teburun ao Nabetari ni buakaniia aia kairiribai.

¹⁹ A buakaniira uean Kanaan i Taanaka i mataniwiin te karaanga i rarikin Mekito ma a aki kona ni iraei ara tirewa.

²⁰ A buakana Titera taian itoi ni kawaia are i karawa,

²¹ ao a uotaki nako ana tautia iroun te Karaanga are Kition are mangkoangkoa. N na m'aati ma te ninikoria.

²² A birinako ana aoti Titera, a rebwe kaanga te baa waeia ma ni keerikaaki.

²³ Ao E taku Ana anera te UEA, “Ko na karokoa te maraia i aon te Kaawa are Meroti a rawa kaaina ni buoka te UEA ni buakaniia Ana kairiribai aika korakora.”

²⁴ Ma kam na neboa Nei Iaera, are buun Ebera are kaain te kaainga are Ken. Karakaa riki neboana nakoia aine nako aika maeka n autinrianna. Eng, karakaa riki neboana nakoia aine nako.

²⁵ E bubuti Titera te ran, ma e anga Nei Iaera te miriki ae kangkang i nanon te m'angko ae tamaroa.

²⁶ Ao e anaa beken te autinrianna ao e taua te aama ni baina te angaatai. Ao e raanga kain atuuna n raeuaaka tab'anouna.

²⁷ Ao e b'aka Titera i aon bubuan waena ao e b'aka ni mate i waen neierei.

²⁸ Ao e tarataranako tinan Titera man ana winto. Ao e titiraki, “E aera ngkai e a rangi n iremwe? E aera ngkai ti tuai man ongo tangin ana kaanibuaka n okirikaaki?”

²⁹ Ao a bane n anga te kaeka ae ti teuana ngaia ma ana aine ake a rangi ni wanawana.

³⁰ “A kunea te b'ai ae kakaawaki Titera ma ana taanga ni buaka are a na uotia rikaaki tao te aine aika uoman i aon temanna te m'aane, ma taiani kunnikai aika rangi n tikiraoi are a na kunnikaia iai aine aikai.”

³¹ Ti tataro nakoim, ara UEA b'a a na mate ara kairiribai ni kabane n ai aron Titera Ma Ko na karaneaneaia ni kabane n aron taai ngkana e a tib'a ingabong akana tangiriko. Ao e tiku n rau Iteraera i nanon 40 te ririki.