Tani Motiki-taeka 4 - Te B'aib'ara

Tebora Ao B'araka

¹ I mwiin maten Euta, ao a manga moana naba aki ongotaekaia Iteraera iroun te UEA.

² Ma ngaia are, E kanakoa uean Kanaan are Iabin are mena i Atora b'a e na kataenikaiia Iteraera. E maeka ana kam'anta Iabin are Titera i Aroteta-A-Koiim.

³ Bon iai ana kaanibuaka Iabin aika taian biti aika m'aitiia 900, ao e karawawataai maiuaia Iteraera i nanon 20 te ririki, ni karokoa a bubutiia te UEA buokaia.

⁴ Bon te burabeti Nei Tebora are buun Rabitota ao bon te tia kairiiri naba irouia Iteraera i nanon boong akanne.

⁵ E tetekateka i aan arokana te baam are i marenan Ram'a ma Betaera are n te aba are tabukibuki i Eberaim, ike a roroko iai i rouna Iteraera ni bubutiia b'a e na karaoi aia kaangaanga.

⁶ N te bong teuana, ao e mena B'araka are natin Abinoam te m'aane i Keteti i Nabetari, ao e kanakoa ana taeka Tebora nakoina b'a e na roko ni maroroo ma ngaia. Ao ngke e a roko, ao E taku: Bon iai te rongorongo nakoim mairoun te UEA ae Atuaia Iteraera. Ko na botiia tebwina te nga m'aane man te baronga are Nabetari ao Teburun ao kairiia nakon te Maunga are Tabora.

⁷ E na kam'anea Titera te UEA b'a e aonga n otinako ni buaka n te Karaanga are Kition. E na kaira ana taanga ni buaka are Iabin Titera n aron are kakaraoia, ao a na uoti aia kaanibuaka, ma E a tia te UEA ni berita b'a E na buokiia ni kataenikaiia.

⁸ Ao e taku B'araka nakoina, “N na bon aki m'ananga ngkana ko aki m'ananga.”

⁹ Ao e taku Nei Tebora, “E tamaroa, N na m'ananga, ma I kauringko b'a E na katokanikaia te aine te UEA i aon Titera, ao akea riki ae na manga karineko i bukin tokanikaim n te buaka.” Ao a nako Nei Tebora ma B'araka nako Keteti,

¹⁰ ike e botiia iai aia taanga ni buaka Teburun ma Nabetari aika 10,000, ao e kairiia B'araka nako Keteti. Ao e iri naba Nei Tebora.

¹¹ Ao n te tai aei, e maeka Ebera are kaain te kaainga are Ken i rarikin te kaawa are Oke i Taanannim, e aki rangi n raroa mai Keteti. A nako kaain te kaainga are Ken mairoun Obaba, taman buun Moote, ma e a tia ni m'aing nako Ebera ma ni katea ana kaemb'a ni kararoa ma te kaainga.

¹² Ao ngke e ataia Titera b'a e a tia B'araka ni kaira ana taanga ni buaka nakon te Maunga are Tora,

¹³ ao e weteia ana taanga ni buaka ni botiia, ao e katauraoi 900 taiani kaanibuaka ni kabane. Ao e kairiia nako ana taanga ni buaka mai Aroteta A Koiim nakon te Karaanga are Kition.

¹⁴ Ao e takaarua Tebora ni kaangai, “B'araka, e a bo tain buakanakin Titera b'a E na buokiko te UEA ni kataenikaia n te bong aei.” Ao ni koauana raoi, “E a tia te UEA n ri moami ni buaka i bukimi.” Ao e kairiia ana taanga ni buaka B'araka ake 10,000 rikaaki man te Maunga are Tabora.

¹⁵ Ao i nanon tain te buaka, ao E kamangaongaoa Titera te UEA ma ana taan toka i aoia aoti, ao ana taanga ni buaka ni kabane. A bane ni maaku aomata ni kabane iroun B'araka ma ana taanga ni buaka, ni karokoa naba bon Titera, e kibanako man ana kaanibuaka ma ni kataia ni biri nako.

¹⁶ Ao B'araka ma ana taanga, a ri mwiin ana kaanibuaka Titera ma ana taanga ni buaka ni karokoa Aroteta A Koiim. Ao a tiringaki ni kabane ana taanga ni buaka Titera.

¹⁷ Ao bon ti Titera ae reke birinakona. E birinako n ana kaemb'a Ebera i bukina b'a e a tia Ebera ma ana utu ni karaoa te boraraoi n raoi ma uean Atora. Ao e nako Titera nakon ana autinrianna Nei Iaera are buun Ebera.

¹⁸ Ao e otinako neierei ni butim'aia ao e taku, “Nakomai rin, teuae ko karineaki. Taiaoka rin nako. Tai maaku.” Ao ngke a tia n rin nako, ao e a wene Titera, ao e rabunna Nei Iaera n te burangketi.

¹⁹ Ao e taku Titera, “Taiaoka, e kona n reke nimau te ran teutana? I a rangi n taka.” Ao e kauka te b'atoro are te kunniman Nei Iaera ao e kab'aroa nimana te miriki, ao e a manga rabunna naba.

²⁰ Ao e taku Titera nakoina, “Teitei i matan te autinrianna, b'a ngkana iai ae roko ma n titirakiniko b'a iai kaain te autinrianna, ao ko na kaangai, ‘Akea.’ ”

²¹ Ao e a toki kuan Titera ao e a matu nako. Ao e anaa te aama Nei Iaera, ao e unika te beke i atuun Titera ni kanimm'a ma te tano, ao e a mate.

²² Ao i mwiin tabeua te tai, ao e a roko B'araka b'a e riri mwiin Titera, ao e otinako Nei Iaera ni kawaria ao e taku, “Are i nanon te auti te aomata ae kam kakaaea, nakomai riin b'a N na kaotia nakoimi.” Ao a rinnako, ao a noora Titera ni wene ni mate ma kain atuuna te beke.

²³ Ao a kataenikaiia uean Kanaan are Iabin, ao e a keerikaaki korakoran ana taanga ni buaka ma n aki manga kona ni buakaniia Iteraera.

²⁴ Ao e rikirake ni mamaara korakoran Iabin, ma e rikirake korakoran Iteraera, ao ni bon tokina e kamaunaaki Iabin ma ana tautaeka irouia Iteraera.