Tani Motiki-taeka 19 - Te B'aib'ara

Tiringakin Te Aine

¹ I m'aain tautaekanakin Iteraera irouia uea, ao kanoan Rewi temanna i nuukan aaba ake a tabukibuki are abaia kaain te baronga are Eberaim. E iein ma ainen Betereem i Iuta,

² ma e aki raoiroi aron te aine arei, ma ngaia are, e a nako neierei n okira mwengaia ana utu i Betereem. I mwiin aua te nam'akaina

³ ao e kataia buun neierei n taetae ma ngaia b'a e na okirikaaki. Ma ngaia are, e nako Betereem teuarei ngaia ma ana toro ao uoman ana aati. E taetae ma buuna teuarei, ao neierei e wetea teuarei nakon aia auti ana utu. Ao e rangi ni kukurei taman neierei n nooria,

⁴ ao e tangiria b'a a na tiku irouia. Ma ngaia are, e tiku teuarei i nanon 3 te bong, n momooi ma n am'am'arake ma taman buuna.

⁵ Ao ngke a bane n uti aomata n te kaa aua ni bong, ao e a katauraoia kanoan Rewi arei n okira mwengana. Ma e taku taman buuna nakoina, “Ko na aki nako ni karokoa ko tia n am'arake. Ko bon riai n am'arake n karekea korakoram i m'aain te m'ananga.”

⁶ Ao a kaai n tekateka m'aane ake uoman akekei, ao a am'arake ni kanuaia raoi. Ao e taku taman buuna, “Nako mai. Ko na tiku riki nakon te tairiki b'a ti na kukurei.”

⁷ Ao e kataia ni iangoa nakona kanoan Rewi arei, ma e aki kariaia taman buuna, ngaia are, e a manga tiku riki teuana te tairiki.

⁸ N te kanimaua ni bong, ao e a manga kautim'aaka te m'aane arei n te karangaina b'a e nangi nako, ma e a manga taku riki taman buuna nakoina, “Taiaoka ma am'arake riki teutana. Ko a kamaraua riki taai.” Ma ngaia are, a manga am'arake riki m'aane akekei.

⁹ Ao n te kabanea n tai, a teirake mai aon kanaia, ma ngaia are, a nang m'ananga nako ngaia ma buuna ao ana toro. Ma e a manga taku taman buuna, “Nooria, e a kaani bong, kam na bon aki roko n ami tabo ao e a roo naba. Tiiku riki teuana riki te tairiki ni kakukureingkami. Ao kam a kautim'aakaingkami nakon te ingabong n okira mwengami.”

¹⁰ Ma e baaireia kanoan Rewi b'a e na aki manga tiku n te tairiki arei. E katokai kaintekatekan aon ana aati, ao a m'ananga nako ngaia ma buuna ao ana toro ni karokoa Iebuti, are e aranaki ni boong aikai b'a Ierutarem.

¹¹ E a tabe n roo, ao e taku ana toro te m'aane arei, “Ti a tiku n aia kaawa kaain Iebuti aei ni kangainaa.”

¹² Ao e taku kanoan Rewi arei, “Ti na aki. I aki kan tiku i buakoia, b'a tiaki Iteraera ngaiia. Ti na tiku ni kangainaa i Kibea,

¹³ b'a ti na bon roko i Kibea ke i Ram'a i m'aain te roo.”

¹⁴ Ao a waakinako ni m'ananga ni karokoa a roko i Kibea n te aba are Beniamin i mwiin bungintaai teutana.

¹⁵ A kitana te kawai ao a m'ananga nako Kibea. Ma e aki roko n te reke te auti are a na tiku iai n te tairiki arei, ao a tekateka n te tabo teuana ae uki i nanon mataroan te kawai n rin n te kaawa.

¹⁶ E aki maan, ao e roko te unim'aane temanna n rin ni mataroan oon te kaawa ngke e oki man ana katawanang. Angiia kaain te kaawa arei boni kaain te baronga are Beniamin, ma te unim'aane aei boni kaain aaba ake a tabukibuki n te aba are Eberaim.

¹⁷ E ataia te unim'aane arei ae a na iangoa tikuia kanoan Rewi n te kaawa n te tairiki arei. Ao e titirakiniia ni kaangai, Kam na toki ia? Ao kam nako mai ia?

¹⁸ Ao e taku kanoan Rewi arei, “Ti roko mai Betereem i Iuta, b'a ti kawariia ara koraki ikekei. Ao ngkai, ti na nakon te tabo are E tataromauriaki iai te UEA, ao i mwiina ti na manga oki nako abara are n aaba ake a tabukibuki i Eberaim. Ma bon akea ae e butim'aira b'a ti na tiku n aia auti ni karokoa te ngaina.

¹⁹ Ti bon uoti kanaia ara aati, ao ti uoti naba karara te kariki, ao nimara te wain. Ma ngaia are, bon akea te b'ai ae ti kainanoia, ma bon ti te tabo ae ti na matu iai.

²⁰ Ao e taku te unim'aane arei, I rangi ni butim'aingkami nakon au auti b'a kam na matu iai ni kangainaa, ao kam na riki b'a au iruwa, ma ti a nako.”

²¹ Ao e kairiia nakon ana auti ao e kam'arakei aia aati. Ao i mwiina, e teboki waeia, ao a am'arake ma ni mooi.

²² Ao a rangi ni kukurei n te tairiki arei, ngke a ti roko naba kaain te kaawa arei ni katobibia aia auti ma n ororea mataroan te auti ma n takaarua ni kaangai, “Kaotinakoia aomata akana a roko n am auti n te tairiki aei b'a ti na bure ma ngaiia.”

²³ Ao e otinako te unim'aane arei, ao e taku, “Raoraou, taiaoka n aki karaoa te m'akuri ae buakaka nakon te m'aane aei, b'a bon au iruwa n au auti n te tairiki aei.

²⁴ N na kaotinakoa natiu te aine b'a oneani mwiina. Bon te ataeinaine ngaia. Ao N na anganingkami naba buun te m'aane aei.” Kam kona n taua ke ni karaoi b'aai ni kabane akana kam tangiria ni karaoi nakoia, ma taiaoka n aki karaoa te m'akuri ae buakaka nakon te m'aane aei.

²⁵ Ao aki kan ongo m'aane akekei, ma ngaia are, e anaa buuna kanoan Rewi arei, ao e butuia ni kaotinakoa. Ao m'aane akekei, a taua ni ua e ngaina. Ao a tib'a kaokia i m'aain otin taai.

²⁶ Ao e a bon kani ngaina ngke e okira te auti are tiku iai buuna neierei. E b'aka i matan te mataroa ao e wene ikekei ni karokoa otin taai.

²⁷ Ao ni bon te tai naba anne, ao e uti teuare buuna ao e katauraoia nakon te m'ananga. E kauka te mataroa ao e otinako, ao e a noora buuna i matan te mataroa ma baina aika a toka i aon kaintam'araken te mataroa.

²⁸ Ao e taku teuarei nakoina, “Teirake, ti nangi nako. Ma e aki kakam'akuri buuna. E tabekaarake rab'atana ni katokaa i aon te aati ao e nako.

²⁹ Ao ngke e a roko ni mwengana, ao e anaa te biti ni koro irikomaiu, ao e korokorea rab'atan neierei nakon 12 te m'akoro. Ao i mwiina, e tuangiia taan uarongorongo b'a a na uoti kakateuana te m'akoro nakon barongan Iteraera n tatabeua nako

³⁰ ma n titirakiniia aomata b'a tera aia iango n te b'ai are a nooria, ao tera te b'ai ae na riai ni karaoaki i bukin te m'akuri anne. Ao a bane n taku aomata ni kabane ake a noori taiani m'akoro n rab'ata akekei, “Ai kangaangara te m'akuri aei. E bon tuai mani kakaraoaki te aekaki aei i aon Iteraera ni moa man te tai are e kiitanaki iai Aikubita.”