Taniera 11 - Te B'aib'ara

¹ Boni ngaia are e tabeakina buokau ma kaawakinau.

² Ao e boni koaua te b'ai ae N nang tuangko.” E taku te anera, “Teniman riki uea aika a na tautaekana Botia, ma n taorimwiiaki iroun te kaaman, are e na rangi ni kaub'ai nakoia ake tabem'aang. E na kakaewenakoa te abanuea are Kuriiti ngkana e korakora m'aakana ma kaub'aina.

Abanuean Aikubita ao Tuuria

³ Ao i mwiina e na kaoti te uea ae e korakora. E na taua taekan te abanuea ni kabane mani karaoa are e bon tangiria.

⁴ Ma e na uruaki ana tautaeka i bukin korakoran m'aakana, ao e na tib'aaki nakon aua te m'akoro. A na uea n onea mwiina n tautaeka n te bareti uea aika tiaki kanoana, ma a na bon aki roota aron korakorana.

⁵ “E na manga korakora uean Aikubita. Ma e ngae n anne, ao e na rikirake m'aakan ana mataniwii ni buaka temanna, e korakora riki ana tautaeka, ao e taua taekan te abanuea are e korakora arei. E na taua taekan te abanuea ni kabutaa.

⁶ Ao i mwiin tabeua te ririki, ao e na manga reitaki uean Aikubita ma uean Tuuria, ao e na angan uean Tuuria natina te aine b'a buuna.

⁷ N te tai ae e aki maan, ao e na manga uea temanna ma i buakoia ana koraki. E na buakana ana taanga ni buaka uean Tuuria, ma n ninia aia nono, ao ni kataenikaia.

⁸ E na manga uotia rikaaki nako Aikubita bannan antiia ao taian koora ma tirewa ake a katabuaki i bukin anti aikanne. I mwiina tabeua te ririki aika a rau

⁹ e na manga ekaanako Aikubita uean Tuuria, ma e na keerikaaki nako abana.

¹⁰ A katauraoi nakon te buaka natiia uean Tuuria m'aane, ao a boota aia taanga ni buaka ae e korakora. Teuana mai buakona e na oro ni kaitiaki n ai aron te ieka ma ni buakana aia nono.

¹¹ E na rangi n un uean Aikubita, ao e na nako ni buakana uean Tuuria, ma ni kataenikaia ana taanga ni buaka are e korakora.

¹² E na rangi ni kamoamoa i bukin ana tokanikai, ao i bukiia tautia aika a m'aiti ake e a tia naba n tiringaki i rouna, ma e na bon aki teimatoa ana tokanikai

¹³ “E na manga nako n oki uean Tuuria, ao e na botiia ana tautia aika a m'aiti riki nakon are mai m'aaina. Ao ngkana e roko raoi taina, ao e na oki ma ana taanga ni buaka ae e korakora, aika a toamau aia b'ai ni buaka.

¹⁴ Ao ane a na m'aiti aomata aika a na rawa nakon Aikubita. Ao tabeman aika a aki kona n taotaon nanoia mai buakoia aomatan am botannaomata Taniera, a na kamangao i bukin te kaotioti are a tia n noria, ma a na bon taenikai.

¹⁵ Ma ngaia are, e na otab'aninia te kaawa are e nonoaki uean Tuuria ma n taua. Ao a na aki kona n reitanako aia buaka tautian Aikubita; e na bon akea naba korakoraia aia tautia ake a bane aroia.

¹⁶ Ao tautian Tuuria a na karaoa are a bon taku nakoia, ao akea totokoaia. E na tei i aon te aba ni berita ma n taua ni kabane i aani m'aakana.

¹⁷ “Ao e na baairea te m'ananga uean Tuuria, ao e na kairiia ana taanga ae e b'anin. Ao i mwiina, e na karaoa te reitaki ma ngaia n anga natina te aine b'a buuna, ma e na bon aki nakoraoi ana iango aei.

¹⁸ Ao i mwiin anne, e na buakana te botannaomata mai taari ma ni kataenikaia aika a m'aiti. Ma e na konaaki ma n toki kamoamoana iroun te tia kairiiri ae te ianena. E na manga boni kaoka ana kamoamoa uean Tuuria bon nakoina.

¹⁹ Ao e na manga okira nonon are bon abana te uea, ma e na boni konaaki naba, ao ai bon anne naba tokina.

²⁰ E na manga teirake te uea temanna i mwiina, are e na kanakoa ana aobitia b'a e na karawawataia aomata n te taekiti i bukin karikirakean kaub'ain ueana. E na tiringaki te uea anne i nanon te tai ae e aki maan, ma tiaki n te aro ae e na ataaki ke n te buaka.”

²¹ Ao e boni waaki nako naba te anera ni kab'ara nanon te kaotioti: Uean Tuuria ane te kauoman bon te aomata ae e rangi ni buakaka ae bon akea riaina b'a e na uea, ma e na reke m'aakana n te aro ae e aki kaantaningaki man ana m'akuri ni mamanibuaka.

²² Ngkana iai ane e kakaitaraa, e ngae ngkana ana ibonga te Atua ae e rietaata, e na boni karenakoaki naba ma ni kamaunaaki.

²³ E karaoa reitakina ma botannaomata tabeua i bukin te m'akuri ni kam'aam'ane, ao e na rikirake ni korakora ma ni korakora, e ngae ngke e uarereke te botannaomata are e tautaekanna.

²⁴ E na buakani burawinti n te aro ae e aki kantaningaaki, ma ni karaoi m'akuri aika a tuai mani kakaraoaki irouia ana bakatibu. Ao i mwiina e na manga tib'ai nakoia raona b'aai, ao ana b'ai ake a reke naba i rouna n te buaka. E na karaoa ana baire i bukin buakanakin taian nono, ma e na bon aki tau ana tai.

²⁵ “E na kateirakea ana taanga ni buaka ae e korakora ni buakana uean Aikubita. Ao uean Aikubita e na kaaitaraa n ana taanga ni buaka naba are e korakora, ma e na konaaki uean Aikubita i bukin ana m'akuri ni kam'ane uean Tuuria.

²⁶ E na uruanaki i boni irouia ana taan iango ake e tatangiriia. A m'aiti ana tautia aika a na tiringaki, ao a na kamaunaaki ana taanga ni buaka.

²⁷ Ao i mwiina, ana kaai n tekateka n am'arake n te taibora ae ti teuana, ma a na ikam'aam'ane i boni i marenaia, ao a na keweia i boni irouia. Bon akea temanna mairouia ae e na koro bukin ana iango i bukina b'a e a tia te Atua ni bairei tokin maiuia.

²⁸ Ao i mwiina, buakanakin Aikubita ao e a oki rikaaki ma taiani b'ai ni kuri ake a reke i rouna n te buaka. Ao e buakaka Ierutarem ma ni kamaunaan aia aaro ana Aomata te Atua. E na karaoa are e bon taku ao i mwiina e a okira oin abana.

²⁹ Ao rimwi riki, e na buakana Aikubita, ma n te tai aei ngkanne a nang bitaki b'aai ni kabane.

³⁰ Ane a na roko kaain Room n taiani kaibuke, ao a na kaitaraia, ao ane a na maaku. “Ao ane a rikaakina aia aaro ana Aomata te Atua ni iangoa kamaunakina. Ao e na irii aia iango koraki ake a kitana ana aaro te Atua.

³¹ A na kam'araaea te Tembora ana tautia tabeman. A na katoka te angakarea are e katoa bong, ao a na katea te b'ai are moan te kakamaaku.

³² Ao e na anai nanoia koraki ake a tia ni kitana te aro ni Iutaia, ma a na kaaitaraaki ni buakanaki irouia ake a teimatoa n aki kitana te Atua.

³³ A na manga tib'aa rabakauia taani kairiiri aika a wanawana nakoia raoia, ma i mwiin tabeua te tai a na manga tiringaki tabeman n te boo ni buaka, ke a na kabuokaki ni kamateaki, ao tabeman a na iraeaki ao a na karikaki b'a buure.

³⁴ Ngke e bon tabe ni waaki nako te tiritiri, ao e reke buokaia teutana ana Aomata te Atua, e ngae ngkana a m'aiti i buakoia ake a iriia i bukin iangoaia i bon irouia.

³⁵ A na mate tabeman mai buakoia taani kairiiri ake a wanawana, ma n tokina, ao a na boni itiaki aomata. E na waaki nako te aro anne ni karokoa rokon te toki, are te tai are e a tia ni baaireia te Atua.

³⁶ “E na karaoa are e bon tangiria uean Tuuria. E na kamoamoa i bon i rouna n iangoia b'a e korakora riki nakoia anti ni kabane, ao nakon te Atua ae e Moan te M'aaka. E na teimatoa ni karaoa aei ni karokoa are e na katuaaeaki iai iroun te Atua. E na boni karaoa are e a tia ni baaireia te Atua.

³⁷ E na aki onimakina te anti ake a onimakinna ana bakatibu, ao te anti naba are a tangiria aine. E na aki onimakinii anti ni kabane, i bukina b'a e iangoia i boni i rouna b'a e na m'aaka riki nakoia ni kabane.

³⁸ Ma e na onimakina te anti are e kakawakini taian nono. E na anga te koora ma te tirewa, ma atiibu aika a kakawaki, ao b'aai n tangira riki tabeua aika a kakawaki nakon te anti are a aki tataromauria ana bakatibu.

³⁹ Ao e na kamanenaia ianena ake a tataromauri anti aika a kakaokoro b'a a aonga ni kawakinaki ana nono ni kabane. Ao e na anga te karineaki ae e korakora nakoia ake a kariaia b'a aia tia tautaeka i aon te aba arei, e na karekei nakoaia aika a kakannato n te tautaeka, ao e na anganiia aaba ake e a tia n taui b'a kaniwangaia i bukin aia kakaonimaki i rouna.

⁴⁰ “N te tai are e nang roko iai n tokina uean Tuuria, ao ane e na teirake iai uean Aikubita ni buakanna, ao e na manga teirake uean Tuuria ni kaitaraa ni buakanna ma korakorana ni kabane. E na kamanenai ana kaa ni buaka, ana aoti, ao ana kaibuke aika a bati. E na eekinakoi man taui aaba aika a bati n ai aron rokon te ieka.

⁴¹ Ao e na ekaanako man taua naba te Aba ni Berita, ao n tiringiia tebwina tengaa, ma a na biri nako kaain te aba are Etom, Moaaba ao nikiraia kaain Ammon.

⁴² Ao e na bon aki karekea maiun Aikubita ngkana e buakaniia aaba aikai.

⁴³ E na uotiinako kaub'ain Aikubita ake a karabaaki aika koora ma tirewa, ao b'aai nako aika a kakaawaki. E na kataenikaia Ribua ma Itiobia.

⁴⁴ Ao ane e na maaku n taian rongorongo ake a roko mai mainiku ao meang are e a riki iai ni buaka n aki akaaka, ma n tiringiia aomata aika a bati.

⁴⁵ Ane e na katea ana um'anrianna n uea ae e korakora i marenan taari ma te maunga n te tabo are e tei iai te Tembora. Ma ane e na mate, ao bon akea temanna ae e na buokia.”