Taian Areru 97 - Te B'aib'ara

Akea N Ai Aron Te Atua N Tautaeka

¹ E uea te UEA; e na kukurei aonnaba! A na kim'areirei abam'akoro aika bati!

² E otab'aniniaki rarikina n taian nang ma te roo; E tautaeka n te raoiroi ma te eti.

³ E ri moana te ai ao e kabuokiia aiana aika katobibia rarikina.

⁴ E kaota aonnaba ana iti; e noria aonnaba ao e m'aeiei.

⁵ A riki n ran taiani maunga, n ai aron nenean te taura te nenea, i matan te UEA ae Uean aonnaba ni bane.

⁶ A kaotiota ana raoiroi taiani karawa; ao a bane n nora mimitongina botannaomata nako.

⁷ A na bane ni kamaamaaeaki akana taromauri bouannanti; Akana kainikatonga i bukiia antiia aika bouananti; A bane anti ni bobaraaki n taromauria te UEA.

⁸ A kukurei kaain Tion, ao a kim'areirei kaaini kawan nako Iuta i bukin am Moti, te UEA.

⁹ Bia Ngkoe, te UEA, Ko tautaeka i aonnaba ni bane; Ko rangi ni kakannato nakoia anti ni kabaneia.

¹⁰ B'a E tangiria akana riba te buakaka te UEA; E kawakini maiuia ana botannaomata; E kamaiuia mai nanoni baiia akana buakaka.

¹¹ E oota raoiroin te Atua b'a kanga ootan te taura i aoia ana Aomata aika raoiroi; Ao e karika te kim'areirei nakoia.

¹² Ngkami akana kam raoiroi ni kabane, kam na kukurei i bukini baika E a tia ni karaoi te UEA! Kam na ururing baike E a tia ni karaoi te Atua are tabu, ao katituaraoia.