Taian Areru 94 - Te B'aib'ara

Ana Kaeti-taeka te Atua

¹ Te UEA, ae te Atua ae am B'ai te kareke kai; Ko na kaota unim!

² Te tia motiki taekaia aomata Ngkoe; Tei rake, ao anganiia akana kainikatonga rekeni kaiia ni kaeti ma baike a karaoi.

³ Ai ti maanraa aia tai akana buakaka ni kamoamoaia? Te UEA, ai ti maanraa?

⁴ Ai ti maanraa aia tai akana iowawa ni kainikatonga ma ni kamoamoaia?

⁵ Te UEA, a b'ainikiriniia am Botannaomata; a karawawataia am Aomata.

⁶ A kamateia aine aika a mate buia, ma ataei akana akea aia karo, Ao a kamateia naba iruwa aika a tia n reke maekaia i abara.

⁷ A kaangai, “E aki norira te UEA; E aki mutiakin arora Atuan Iteraera.”

⁸ Kam na iango, ngkami akana kam aki wanawana i buakoia aomata; Ao ngkami akana kam baba, Kam na wanawana n ningai?

⁹ Ngkae E kariki taningara te Atua, ao kaotana b'a E kona n ongo; Ao ngkae E kariki matara, ao nanona b'a E noraba.

¹⁰ Ngkae E boaiia botannaomata nako, ao tiaki b'a E kona ni kareke kaiia ara mataniwi aika buakaka? Ao ngkai te tia reirei Ngaia nakoia aomata nako, ao tiaki b'a e riai n iai te ataib'ai i rouna?

¹¹ E ataa te bae a iangoia te UEA; E ataa ae akea kanoan nanon aia iango.

¹² Te UEA, ai kab'aia ra te aomata ane Ko reireinna, Ane Ko reireinna taekan am Tua!

¹³ Ko anganna rauna man taai aika e kiriwe te aba iai ni karokoa kenakin te kinono i bukini kam'aneaia akana buakaka.

¹⁴ Ane E na aki kaaki taekaia ana botannaomata te UEA; E na aki kitaniia akana ana b'ai.

¹⁵ E na manga noraki te kaetitaeka ae e raoiroi ni b'ainaki n te kabowi, Ao e na boutokaki irouia aomata akana raoiroi.

¹⁶ Antai ae e tei i buku ni kaitaraia akana buakaka? Antai ae buokai ni kaitaraia taani karaoa ae buakaka?

¹⁷ Ngke arona b'a E aki buokai te UEA, ao N na kaman tia ni mate i aban te aki kakarongoaa.

¹⁸ Ngke I kaangai, E maran nako waeu Ma am Tangira, te UEA, boni ngaia ae tauai b'a N na aki b'aka.

¹⁹ N taai ake I tabeaianga ma n raraoma iai, ao Ko kabebeteai ma ni kakukureiai.

²⁰ Ko aki kona n i raorao ma tia moti akana moti-buaka, Akana karaoi baika katabuaki i aan te tua b'a a na karaoaki,

²¹ Akana bootaki ni kario iango b'a a na kam'aruaia akana raoiroi, Ao a motiki taekaia akana aki bure b'a a na kamateaki.

²² Ma E kamanoai te UEA ae Atuau man te kabuanib'ai, Ao E kawakinai.

²³ E na kareke kaiia i bukin aia m'akuri aika bubuaka, Ao E na kamaunaia i bukin aia bure; A na kamaunaki iroun te UEA ae Atuara.