Taian Areru 90 - Te B'aib'ara

BOKI IV Areru 90—106 Te Tataro I Bukin Ana Nanoanga te Atua

(Ana Tataro Moote are ana Aomata te Atua)

¹ Te UEA, boni nera ni maeka Ngkoe n taai nako.

² I m'aini karikani maunga iroum, Ngke Ko tuai ni karika aon te aba ma aonnaba, Ao bon te Atua Ngkoe ma ngkoangkoa ao n aki tootoki.

³ Ko tuanga te aomata b'a e na oki nakon arona are ngkoa; Ko onikia nakoni bubun te tano.

⁴ Tengaa te ririki iroura ai aron ae ti te bongina iroum; Ai aron ngkoananoa, ae te bongina ae e a nako, Ai aron aoan teuana te tai n tei n tantani n te tairiki.

⁵ Ko katoki maiura; kanga ai aron te mii ae kaoti tabeua te tai ao i mwina e bua. Ti te bo ngaira ma aeka n uteute aika a moana maiuia man te ingabong;

⁶ A rikirake ao a uee, ma ngke e a tairiki ao a rai ao a mate.

⁷ Ti bora ni maaku n unim ao ti kamaunaki iai.

⁸ Ko aki ti norira ngke ti bure, ma Ko norira naba ngke ti kataia ni karabai ara bure mairoum.

⁹ A kai mauna nako maiura i bukin unim; A waekoa ni kai toki n ai aron te ike ae ti te ikena.

¹⁰ Ti itibwi ana ririki ni maiu te aomata, ke tao wanibwi i bukin te matoa ni mauri; Ma iriaia ti te rawaawata ma te aki rau; a kai toki maiura, ti kai nako.

¹¹ Ai antai ae a tia n namakina aroni korakoran unim, ke n ataa kakamaakuna?

¹² Reireiniira b'a ti na ataa ae kimototo maiura aio, B'a ti aonga ni kareke nanora aika wanawana.

¹³ Te UEA, ai ti maanraa am Tai n un? Ani bita nanom, ao nanoangaira, ngaira aika am Toro.

¹⁴ Ko na kaon nanora n am Tangira ni katoa ingabong, B'a ti aonga n anene ni kakatonga ma ni kukurei ni kabane bongini maiura.

¹⁵ Ko na kabati kukureira n ai aroni m'aitin ara tai n nanokawaki n ririkini maiura ake ti karawaawataaki iai.

¹⁶ Kariaira, ngaira aika am Toro ma natira, B'a ti na noori am M'akuri aika kamimii aika Ko karaoi.

¹⁷ Te UEA ae Atuara, Ko na kakab'aiaira. Ko na katetekeraoira ni b'ai ni bane aika ti karaoi!