Taian Areru 89 - Te B'aib'ara

Ana Boraraoi te Atua ma Tawita

(Ana Areru Etan ae tibun Etera)

¹ Te UEA, N na anenea n taai nako taekan am Tangira ae Teimatoa; N na aki toki ni kaotiota taekan am Kakaonimaki.

² I ataia b'a akea tokin am Tangira, ao e nene ni matoatoa am Kakaonimaki n ai aroni karawa.

³ E taku am Taeka, “I a tia ni karaoa au boraraoi ma te aomata are I rineia; I a tia ni kab'aka au taeka nakon au toro are Tawita, ni kaangai,

⁴ ‘E na uea n aki toki temanna man am Kariki; N na kateimatoa te nakoa n uea n am Kariki n aki toki.’ ”

⁵ Te UEA, a anene kaaini karawa ni kamoamoaai am M'akuri aika kamimii ake Ko karaoi, Ao a anenea taekan am Kakaonimaki taian anera

⁶ Te UEA, akea n ai arom i karawa; akea i buakoia kaaini karawa ae ti te bo ma Ngkoe.

⁷ E korakora makakim irouia kaain te kauntira i karawa; Ko kakamaaku nakoia ake a mena i rarikim.

⁸ Te UEA ae te Atua are Moan te M'aaka, akea n ai arom ni korakora; te UEA, Ko kakaonimaki ni b'aai nako.

⁹ Ko taua aroni marawa; Ko katoki korakoran naona.

¹⁰ Ko kamanatua Raaba ao e tiringnga; Ko katae aia kai am Kairiribai ni korakorani m'aakam.

¹¹ Am B'ai karawa ma aon te aba; Ko karaoa aonnaba ma b'aai ni kabane ake iai.

¹² Ko kariki aaba nako i aang ao nako aiaki; A anene ni kim'areirei nakoim Tabora ma Oman.

¹³ Ai m'akara Ngkoe! Ai kamakuraa korakoram!

¹⁴ Ko katea ueam i aon te eti ma te motikitaeka ae e raoiroi; E ri moam te tangira ma te kakaonimaki b'a kanga taan ua-rongorongo i bukim.

¹⁵ Te UEA, ai kab'aia ra akana anene n taromauriko, Akana karaoia i matam ae Ko kukurei iai.

¹⁶ A kim'areirei n taai nako i bukim, Ao a neboiko i bukin ae Ko raoiroi nakoia.

¹⁷ Ko anganira te korakora are ti na kona iai n tokanikai i aoia aiara; Ko katokanikaira i bukina b'a Ko tangirira.

¹⁸ Boni Ngkoe, te UEA, ae Ko rinea ae na kamanoira; Boni Ngkoe, Atuan Iteraera ae tabu, ae Ko anganira ara uea.

Ana Taeka N Akoi Te Atua Nakon Tawita

¹⁹ Ko taku n taai ake ngkoa i nanoni te mii nakoia am Toro ake a kakaonimaki, “I a tia ni buoka te tautia ae bati n ataaki; I a tia n anga te kaintokanuea nakon temanna ae I rineia mai buakon te botannaomata.

²⁰ I a tia ni kauea au toro are Tawita ngke I kabiria n te b'aa are tabu.

²¹ Iriana korakorau n taai nako, E na kakorakoraki ni m'akau.

²² A na aki kona aona aiana; E na aki kona ni konaaki irouia akana buakaka.

²³ N na kamanatuaia aiana, Ao N na kamateia ni kabaneia akana ribaia.

²⁴ N na tangiria ma ni kakaonimaki nakoina; N na kakatokanikaia n taai nako.

²⁵ N na karababaa nako tian ueana man te Mereterenian nakon te karaanga are te Iuberetiti.

²⁶ Ane e na kaangai nako iu, ‘Bon Tamau ao Atuau Ngkoe; te tia katanai ao te tia kamaiuai.’

²⁷ N na karikia b'a natiu ae te karimoa, ae te kabanea ni kakannato i buakoia uea.

²⁸ N na aki toki ni kakoro bukin au taeka n akoi nakoina, Ao e na teimatoa au boraraoi ma ngaia n aki toki.

²⁹ E na tei maan ueana n ai aron tei maanin karawa; E na ririki temanna n ana kariki b'a te uea n te tai teuana ma teuana.

³⁰ Ma ngkana a aki ongeaba ana kariki nakon au tua, ao n aki iri nanon au kaetieti,

³¹ Ngkana a uru au babaire ao a aki kawakin au taeka,

³² Ao N na kareke kaia i bukin aia bure; N na karawawataia i bukin aia buakaka.

³³ Ma e na aki toki tangiran Tawita irou Ao N na teimatoa ni kawakina au taeka n akoi nakoina.

³⁴ N na aki urua au boraraoi ma ngaia ke ni bita au taeka are I a tia ni kab'aka nakoina.

³⁵ I a tia n tuea ao N na boni kakoro bukin au taeka ngkai te Atua Ngai: B'a N na bon aki kona ni kewe nakon Tawita.

³⁶ E na aki toki n uea kaain ana utu Ao e na teimatoa ueana n ai aron otan taai i matau.

³⁷ E na tei maan n ai aron nam'akaina, are te tia kakoaua ae kakaonimaki i karawa.”

Te B'aeb'aeti I Bukini Konaakin Te Uea

³⁸ Ma Ko un iroun te uea are Ko rineia; Ko a tia n rawa i rouna ao Ko ribaia.

³⁹ Ko a tia n urua am Boraraoi ma am Toro ao Ko anaa nakoana n uea mai rouna.

⁴⁰ Ko a tia n ururu oon ana kaawa ao Ko kamaenikun ana tabo ni karabaraba.

⁴¹ A iraeaki ana b'ai irouia akana rikekei; A ngareakinna aomata ni kabaneia akana maeka i rarikina.

⁴² Ko anga te tokanikai nakoia ana kairiribai; Ao Ko kakukureia ni kabaneia.

⁴³ Ko kakeai bonganan ana b'ai ni buaka, Ao Ko aki katokanikaia n te buaka.

⁴⁴ Ko anaa m'akana n uea mai rouna, Ao Ko kab'aka man nakoana n uea.

⁴⁵ Ko karaoa ae e na moantaai ni kara iai, ao e taonaki n te mamaa ae bati.

Te Tataro I Bukin Te Kani Kamaiuaki

⁴⁶ Te UEA, Ko na karabako n aki toki? Maanraa ana tai n ura unim n ai aron te ai?

⁴⁷ Uringa ae e kimototo maiu; uringa ae Ko karikira ni kabaneira b'a aomata aika iriani maiuia te mate.

⁴⁸ Akea te aomata ae kona n inaomata man te mate ke te ruanimate.

⁴⁹ Te Uea, tera ae Ko kona ni karaoia b'a kaotan ae Ko tangirira n ai aron are Ko tataneiai iai, Ao kaotan ae Ko kakawakin am Taeka n akoi ake a tia ni b'aka nakon Tawita?

⁵⁰ Tai m'aninga arou, ngai ae am Toro, ngke I b'ainingareaki, Ao ngke I taotaona nanou nakon taeka n iowawa mairouia botannaomata ake akea karineam irouia.

⁵¹ Te UEA, a taetae n iowawa am Kairiribai nakon te uea are Ko rineia! A taetae nakoina n te aro anne ike e nako iai.

⁵² Kam na neboa te UEA n aki toki! Amen! Amen!