Taian Areru 88 - Te B'aib'ara

Tangiran te Kani Buokaki

(Aia Areru ma aia anene natin Kora; ana b'ai aia Mataniwi taan anene; n te b'ana ae Mahalath Leannoth. Maschil ae ana b'ai Eman ae tibun Etera)

¹ Te UEA ae te Atua, ae au tia kamaiu, I tang nakoim ni ngaina ao ni bong.

² Ko na ongo au tataro; ongora n tangiu ni kani buokaki!

³ A taonai taian rawaawata aika bati n te aro ae I a kaani mate iai.

⁴ Ti te bo ngai ma aomata nako aika a kaani mate; Ai akea korakorau.

⁵ I tiku n aki tabeakinaki i buakoia maate; Ai aroia akana kamateaki ngai ni wene i nanon ruanimateia, Ake te koraki ake akea uringaia naba teutana iroum, Ake akea buokaia n reke mairoum.

⁶ Ko katukai n te tabo ae nano i nanon te ruanimate, n te tabo ae rotongitong ae e rangi n nano.

⁷ E b'aka n rawaawata unim i aou, kanga ai aron naao aika b'aroai ni kamanatuaai.

⁸ Ko kararoaia raou mairou; Ko karaoa ae N na bati n ribaki irouia. I kainaki ao I aki kona n oti nako;

⁹ A mamara matau n taratara i bukin rawaawatau. Te UEA, I weteiko ni katoa bong ao I tabeki rake baiu n tataro nako Im.

¹⁰ Ko karaoi baika kamimii i bukiia maate? A teirake maate n neboiko?

¹¹ E tataekinaki am Nanoanga i nanon te ruanimate? Ke am Kakaonimaki i Abaton

¹² A noraki am M'akuri aika Kamimii n te tabo are roo, Ke am Raoiroi n te aba are a m'am'anuokaki b'aai iai?

¹³ Te UEA, I weteiko i bukini buokau; I tataro nakoim ni katoa ingabong.

¹⁴ Te UEA, bukin tera ngkai Ko ribaai? Bukin tera ngkai Ko tan nako mairou?

¹⁵ I titiku ma te rawaawata ae e kaan ae N na mate iai ma ngke te teei ngai; I taonaki n rawawatani baika kamaamate aika nako mairoum, ao I a aki konai moaia.

¹⁶ I rawata n unim ae korakora; I mate n am B'ai ni kakamaaku.

¹⁷ A otab'aniniai n taai nako kanga ai aron ranin te ieka; Ao I a katobibiaki irouia.

¹⁸ Ko kararoaia mairou raoraou aika I rangi n tena ma ngaiia, Ao ai ti ngai n tiku n te roo.