Taian Areru 83 - Te B'aib'ara

Te Tataro B'a A Na Tae Aia Kai Aiaia Iteraera

(Te Anene ao Ana Areru Ataba.)

¹ Te Atua, Ko na tai kainab'aabu, ao Ko aoriko n akea te b'ai ae Ko karaoia!

² Taraia am Kairiribai! a kiriwe; ao a rawa ni kan aantaeka iroum akana ribaiko.

³ A kario iango ni karaba aika a na ekianako nako iai am Botannaomata; A kario iango n ribuaka aika a na kabuanib'ai iai am Aomata ake Ko kakawakiniia.

⁴ A taku, Nako mai; ti na urua aroia ni botannaomata, b'a e aonga n aki manga uringaki taekan Iteraera.

⁵ A bo nanoia n aia iango ao a botiia aia aomata b'a a na ekiko nako:

⁶ kaain Etom ma kaain ana utu Itimaera; Kaain Moaaba ma taian Akeraite

⁷ ma kaaini Keeb'ara, ma kaain Ammon, ma taian Amareka, ma kaain Biritia, ma kaain Turo.

⁸ A raonaki naba irouia kaain Aturia, are te botannaomata ae matoatoa ae raoraoia I-Ammon ma I-Moaaba, ake a riki mairoun Roota.

⁹ Karaoa nakoia te baere Ko karaoia nakoia I-Mirian, ma nakon Titera ma Iabin, n te karaanga are Kiton.

¹⁰ Ko katae aia kai i Entora, Ao a wene ni mka rab'ataia i aontano.

¹¹ Karaoa nakoia aia toka te baere Ko karaoia nakon Orebi ma Teebi; Katae aia kai aia uea n aron are Ko karaoia nakon Teba ma Taremunna,

¹² ake a kaangai, “Ti na taua b'a ara b'ai te aba are ana b'ai te Atua.”

¹³ Atuau, kauamaaeia kanga ai aroni bubun aontano, ke te maange ae ukaki nako n te ang.

¹⁴ Aron te ai ni kabuoka te buakonikai ao ni kaurarakei aoni maunga,

¹⁵ Ao ai bon arom naba ni kakioia nako n am Ukeukenanti, ao ni kakamakuia iai.

¹⁶ Te UEA, Ko na karaoa ae a na rangi ni mamaa iai, B'a a aonga n rairaki nakoim.

¹⁷ A na oreaki aia kainikatonga ma ni kakamaakaki n aki toki; A na mate ma te b'ainrang ae bati.

¹⁸ A na ataiko b'a Ngkoe ae te UEA, bon ti Ngkoe ae Moan te Rietaata i aonnaba ni kabane!