Taian Areru 80 - Te B'aib'ara

Te Tataro I Bukini Kamaiuan Iteraera

(Ana b'ai aia Mataniwi taan anene; n te b'ana ae Kiebun te Boraraoi; ana Areru Ataba)

¹ Katanimaia taningam, Ngkoe ae te tia kawakinia Iteraera b'a kanga tiibu ngaiia; Ko na ongo iroura, Ngkoe ae te tia kaiririia am nanai n tiibu. Ngkoe ae Ko tekateka i aon am Kaintokanuea are i aoia kerubim,

² kaotiko nakon te baronga ae Eberaim ma te baronga ae Beniamin ma te baronga ae Manate; Kaota korakoram nakoira; nako mai ao kamaiura!

³ Te Atua, Ko na kaoka kab'aiara nakoira! Kaota am Nanoanga nakoira, ao ti na kamaiuaki iai.

⁴ Te UEA ae Te Atua are Moan te M'aaka, e na toki ningai unim n aia tataro am aomata?

⁵ Ko anganira te nanokawaki b'a ti na kanna, ao te boora ae kakanoa n te rannimata b'a ti na moi iai.

⁶ Ko kariaia baronga aika i rarikira b'a a na buaka i marenaia i bukin uneakinan tauan aon te aba; A b'ainingareira ara kairiribai.

⁷ Te Atua are Moan te M'aaka, Ko na kaoka kab'aiara nakoira; Kaota nakoira am Nanoanga, ao ti na kamaiuaki iai!

⁸ Ko uota te kai ae te kureebe ni kaotinakoia mai Aikubita; Ko kakioia nako botannaomata tabeua ao ko unikia iai b'a ana abanna.

⁹ I mwini kakioakinakoaia iroum, ao ti kanenei wakaara iai; Ao e buta aon te aba irouia.

¹⁰ A taua aon te aba ni kabane b'a abaia, mai maiaki nako i aang nakoni maungan Reb'anon.

¹¹ A karakaa nako tian te aba man Taari are te Mereterenian ni karokoa te karaanga are te Iuberetiti.

¹² Ko aera ngkai Ko kab'aka ooia are katobibiaki? Ae a roko iai aomata aika Ianena n iraei kaub'aina;

¹³ A toubekai aoia n ai aroia beeki ngkana a toubekai b'aai, Ao a urubekei n ai aroia maan aika aki manana ngkana a uru-b'ai.

¹⁴ Te Atua are Moan te M'aaka, Ko na rairaki n okirira! Ko na taraira mai karawa; nako mai ao buokiia am Botannaomata!

¹⁵ Nako mai ao buokiia am aomata aika Ko a tia ni kamaekaia ikai ma ni karikirakeia b'a te botannaomata ae korakora!

¹⁶ A tia aiaia ni buakaniia ao a kamaunaia; Ko na taraia ma te mata n un ao kamaunaia!

¹⁷ Kawakina te botannaomata are Ko a tia n rineia ma ni karikirakea b'a e na korakora, ao kamanoa.

¹⁸ Ao ti na aki tan nako iai mairoum; Kamaiura, ao ti na neboiko.

¹⁹ Te Atua are Moan te M'aaka, Ko na kaoka kab'aiara nakoira. Kaota am Nanoanga nakoira, ao ti na kamaiuaki iai.