Taian Areru 78 - Te B'aib'ara

Te Atua Ma Ana Botannaomata

(Ana Otooto Ataba)

¹ Au botannaomata, kam na ongora n au taeka n reirei, Ao katanimai taningami nakon te bae N na taekinna.

² N na kabonganai taian taeka n rabakau, Ao N na kab'arab'arai nanoni baike a raba ake b'ai nikawai,

³ ake baike ti a tia n ongo ma n atai, ake ti a tia n tuangaki taekaia irouia ara bakatibu.

⁴ Ti na aki karabai mairouia ara ataei; Ti na tuangiia kaain te roro ae i mwira taekani m'akan te UEA ma m'akuri aika ab'ab'aki ma ni kamimii ake E a tia ni karaoi.

⁵ E anga taian tua nakon te botannaomata are Iteraera ake kanoan Iakob'a. E anga ana taeka nakoia ara bakatibu b'a a na reireiniia natiia taekan ana tua,

⁶ B'a e aonga n rabakau iai te roro ae na roko rimwi, Ao a na manga kona n tuangiia natiia.

⁷ Ao aei aroia are a na kona iai natiia ni manga onimakina te Atua, Ao n aki m'anuokini baike E a tia ni karaoi, Ma a na ongeaba n taai nako nakon ana tua.

⁸ A na aki katotongiia aia bakatibu, ake te roro n aki ongotaeka ma n rawa ni kan aan-taeka, Ake a tuai man nene onimakinan te Atua irouia, Ao a tuai naba n teimatoa ni kakaonimaki nakoina.

⁹ A biri nako tautian Eberaim ake a ua kai ma kainikatebe n te bongi ni buaka.

¹⁰ A aki kawakina aia boraraoi ma te Atua; A rawa n ongeaba nakon ana tua.

¹¹ A m'anuokin taekani baike E a tia ni karaoi, Ake kakai ake a noori ngke E karaoi.

¹² E karaoi kakai i mataia aia bakatibu n te tabo ae e aoraoi i Toan n te aba are Aikubita.

¹³ E bwenaua taari, ao E kairiia ri nanona; E katei ranin taari n ai aron te o.

¹⁴ E kairiia n te nang ni ngaina, Ao n otan te ai ni bong ni karokoa e ngaina.

¹⁵ E bwenauai b'aa n te rereua Ao E anganiia te ran man te tabo ae nano.

¹⁶ E katinakoi karaanga n ran man te b'aa, Ao E karaangai raan n ai aroni karaanga aika ab'ab'aki.

¹⁷ Ma a aki toki ni bubure nakon te Atua are Moan te M'aaka, Ao a rawa ni kan aan-taeka i rouna n te rereua.

¹⁸ A aki manrerei ngke a kataa te Atua ngke a tua b'a e na karekeaki kanaia are a tangiria.

¹⁹ A taetae n eekaanako te Atua ao a kaangai, “E kona n reke te am'arake iroun te Atua n te rereua?

²⁰ E koaua b'a E orea te b'a, ao e raanga nako te ran ae korakora b'arona; Ma E kona naba ni karekea te am'arake i bukira? E kona ni karekea te iriko-maiu nakoia ana botannaomata?”

²¹ Ngke E ongo te UEA aia taeka aikai ao E un; E ekinakoaia nakoia ana botannaomata n te ai, ao e rikirake unna nakoia,

²² i bukina b'a a aki onimakinna, ao a aki kakoauaa ae E na kamaiuia.

²³ Ma E taetae nakon taian nang, Ao E tua b'a a na uki mataroani karawa;

²⁴ E kab'aka te maana b'a kanaia; E anganiia am'arakeni karawa.

²⁵ A kang kanaia anera, A anganaki iroun te Atua b'aai ni bane ake a tangiri.

²⁶ E kawaia naba te angi mainiku b'a e na kare ri eta; Ao E kauekea te angi maiaki ni m'akana.

²⁷ E kab'aka te iriko i aoia n ai aroni bubun te tano, Ma maan aika kibakiba n ai aron tanon aon te bike.

²⁸ A b'aka ni neia ni maeka, i rarikin nako um'aia n rianna.

²⁹ Ma ngaia are a am'arake aomata ao a bati n rauaki, B'a E karekea nakoia te baere a tangiria.

³⁰ Ma i m'ain ae a rauaki, ngke a bon tabe naba n am'arake,

³¹ Ao e roko unin te Atua ao E ekianako nako. E kamateia ake a rangi ni marurung i buakoia, Ake kabanea n tamaroa n rorobuaka i buakoia Iteraera.

³² A boni ngae n riki baikai, ma a bon teimatoa naba aomata ni bubure; E ngae ni karaoi ana kakai, ma a aki kakoauaa naba.

³³ Ma ngaia are E katoki aia bong ni maiu, kanga ai aron tokin te ike; Ao E motiki maiuia n te kabuanib'ai ae karina rokona.

³⁴ N taai ake E kamateia iai tem'angina i buakoia, Ao a rairaki ngkanne ake nikiraia nakoina; A raraoma ao a tataro ma nanoia ni koaua nakoina.

³⁵ A uringa ae te Atua are Moan te M'aaka bon te tia kamanoia, Ao E a tia ni buokiia.

³⁶ Ma bon taiani kewe aia taeka nako; Akea te koaua ni baike a taekin.

³⁷ Akea nanoia nakoina; A aki kakaonimaki nakon aia boraraoi ma Ngaia.

³⁸ Ma E nanoangaia ana Aomata te Atua. E kab'arai aia bure ao E aki kamateia. A bati ana tai n taotaona unna, n aki karokoa nanona.

³⁹ E uringnga ae bon ti aomata ngaiia, ae kanga ai aroni karen te ang ae roko ao n nako.

⁴⁰ Ai batiraa aia tai n rarawa ni kan aan-taeka i rouna n te rereua! Ao m'aiti ra te tai ae a kananokawakia iai!

⁴¹ A okioki aia m'akuri ni kataa te Atua, Ao a kamaraka te Atua ae Tabu ae Atuaia Iteraera.

⁴² A aki ururinga m'akana ma te bong are E kamaiuia iai mairouia aiaia

⁴³ Ao E karaoi ana m'akuri ake ab'ab'aki ma kakai n te tabo are aoraoi i Toan n te aba are Aikubita.

⁴⁴ E onea ranin aia karaanga nakon te raraa; A aki kona ni moi I-Aikubita b'a akea te ran.

⁴⁵ E karokoia naango aika m'aiti kurikuri buakoia, ake a bora iai, Ma biraoki ake a uru aon abaia.

⁴⁶ E kanakoia rookati b'a a na kang arokaia ao a na uru aia tabo n ununiki.

⁴⁷ E kamate aia kureebe n aiti aika buubura aika b'aka ni karau, Ao aia biku n te aiti.

⁴⁸ E kamate aia kao ni b'akan aiti aika buubura aika b'aka ni karau i aoia, Ao aia nanai n tiibu ni koron te baa.

⁴⁹ E kariki rawawataia ae bati ngke E kaota nakoia unna ma bonon nanona ae moan te korakora; Ao a atongaki arona aikai ngkana a roko b'a ai aroia taan ua-rongorongo aika roko b'a a na tiritiri.

⁵⁰ E aki tautaua unna ke E katibanakoia man te mate, Ma E kamateia n te aoraki ae kamaamate.

⁵¹ E kabaneia ni kamateia naati m'aane ake karimoa man utu nako i Aikubita.

⁵² Ao E kairiia ni kaotinakoia ana botannaomata n ai aron te tia kawakin-tiibu ngkana e kairiia ana nanai, Ao E kaiririia ri nanon te rereua.

⁵³ E kairiia raoi, ao a aki maaku; Ma a b'ab'a aia kairiribai i taari.

⁵⁴ E kairiia nakon abana are tabu, nakon te maunga are reke i rouna ni korakorana.

⁵⁵ E kakioia nako kaain te aba mai m'aaia; E tib'ai abaia nakoia barongan nako Iteraera, Ao E anga mwengaia b'a a na maeka iai ana Aomata.

⁵⁶ A kataa naba te Atua are Moan te Rietaata, Ao a rawa ni kan aan-taeka i rouna; A aki ongeaba nakon ana tua,

⁵⁷ A rawa ni kan aan-taeka ao a aki kakaonimaki n ai aroia aia bakatibu. Akea onimakinaia.

⁵⁸ A rangi ni kauna te Atua i bukin ae a nako ni bangota ao a taromauri bouananti ake iai.

⁵⁹ E un te Atua ngke E noriia, Ma ngaia are E rangi n ribaia.

⁶⁰ E kitana ana Tembora are i Tiro, are nena ni maeka i buakora.

⁶¹ E kariaia aiara b'a a na taua te Atiniberita, are kanikinaeani m'akana ma mimitongina.

⁶² E rangi n un irouia ana botannaomata, ao E anga ngaiia b'a a na kamateaki irouia aiaia.

⁶³ A mate aia rorobuaka n te buaka, Ao akea ae a na mare ma aia ateiaine.

⁶⁴ A mate aia ibonga n te kabaang, Ao a aki kariaiakaki aine ake a mate buia b'a a na tang n nanokawaki.

⁶⁵ Ao E uti te Uea n ai aron temanna ae uti ni matu; Ai aron te aomata ae aintoa ae aki rau arona ngkana e manging.

⁶⁶ E katotoro rikakiia aiana ni kataenikaiia n te aro are a mamaa iai n aki toki.

⁶⁷ Ao E rawa nakoia kanoan Ioteb'a; E aki rinea te baronga are Eberaim.

⁶⁸ Ma E rinea te baronga are Iuta ao te Maunga are Tion, are E rangi n tangiria.

⁶⁹ E katea ana Tembora ikekei n ai aroni mwengana i Karawa; E kamatoatoaa n ai aron aonnaba are E karaoia b'a e na nene ni matoatoa n aki toki.

⁷⁰ E rinea Tawita are ana tabonibai b'a te uea i aoia Iteraera. E anaa Tawita man te aba are a am'am'arake iai ana nanai n tiibu,

⁷¹ ike e tararuaia iai, Ao E karikia b'a te uea i aon Iteraera, n ai aron te tia kawakin-tiibu i bukiia ana aomata te Atua.

⁷² E tararuaia raoi Tawita n aki nanonano, Ao e rabakau ni kaiririia.