Taian Areru 77 - Te B'aib'ara

E mena te Atua irouia ana Aomata n tain te kanganga

(Ana b'ai aia Mataniwi taan anene; i bukin Ierutun; ana Areru Ataba)

¹ I kanenea b'anaau ni wetea te Atua; I tang n takaarua, ao E ongo irou.

² I tataro nakon te UEA n tain te kaangaanga; I tabeki baiu n tataro n te tairiki koraki, ma e aki reke kabebeteau.

³ Ngke I iangoa te Atua, ao I rawaawata ma ni b'ara nanou;

⁴ E kamatu tarataraai n te tairiki ni karokoa e ngaina; I rangi n raraoma n te aro are I aki kona n taetae iai.

⁵ I iangoi boong ake a b'aka nako, Ao I uring ririki ake ngkoa.

⁶ I kabanea aoan te tairiki n iaiango Ngke I iaiango, ao aio te titiraki ae rio i nanou:

⁷ E na teimatoa n ribaira te Uea ke E na aki? E nang aki manga kukurei iroura?

⁸ E a toki tangirara i rouna? E na kakoro bukin ana taeka n akoi nakoira ke E na aki?

⁹ E m'anuoka arona n akoi te Atua ke E aki? E toki n nanoanga ngkana E un ke E aki?

¹⁰ Ao I taku, “Aio te b'ai ae e rawaawata nanou iai b'a E a toki ana kona te Atua are Moan te M'aaka ni buokira.”

¹¹ Te UEA, N na aki m'aninga taekani baike Ko a tia ni karaoi; N na ururing baike a kamimii ake Ko karaoi ngkoa.

¹² N na iaiangoi baike Ko a tia ni karaoi, ake am M'akuri ake a kamimii ni kabane.

¹³ Te Atua, a bane b'aai aika Ko raoi n raoiroi. Akea te atua ae kakannato n ai arom.

¹⁴ Bon te Atua Ngkoe ae Ko kakaraoi b'aai ni kamimii; Ko kaota korakoram i buakoia botannaomata.

¹⁵ Ko kamaiua am Botannaomata ni m'aakam, ake kanoan Iakob'a ma Ioteb'a.

¹⁶ Te Atua, ngke a noriko taian ran, ao a maaku; Ao a ruru nanoni marawa, kanga ai aron te aomata ae maaku.

¹⁷ A nurakina te karau naang; E rebwe te baa mai karawa, Ao e itiiti n taabo nako.

¹⁸ E ongo te aba rebwen am Baa n te ukeukenanti; Ao e kaota aonnaba ootan te iti; E ruru aon te aba ao e m'aeiei.

¹⁹ Ko nakonako ri buakon naao; Ko ri nuukani kabini marawa, Ao a aki noraki m'anekam.

²⁰ Ko kairiia am Botannaomata irouni Moote ma Aaron, kanga ai aron te tia kawakin-tiibu ngkana e kaira te nanai n tiibu.