Taian Areru 76 - Te B'aib'ara

Te Atua ae Tokanikai

(Ana b'ai aia Mataniwi taan anene; ma b'ai ni katangitang aika iai karaiia; Ana Areru Ataba; te Anene)

¹ E ataaki te Atua irouia Iuta; E karineaki arana irouia Iteraera.

² E mena mwengana i Ierutarem; E maeka i aon te maunga are Tion.

³ E otoi kanoani aia kainikatebe kairiribai; Ao E uru naba otangaia ma aia kabaang ma aia b'ai ni buaka ni kabane.

⁴ Te Atua, ai mimitong ra Ngkoe! Ai kantara Ngkoe ngkai Ko oki man te maunga are Ko kataenikaia iai taan ribaiko.

⁵ A kurib'aiaki aia tautia ake a ninikoria, ao a mate; A aikoa konai ni kabonganai aia b'ai ni buaka.

⁶ Atuan Iakob'a, ngke Ko b'anaa n un ao a b'aka ni mate aoti ma ake a toka i aoia.

⁷ Ma Ngkoe, te Atua, Ko makaki irouia aomata ni kabaneia. Akea temanna ae kona n tei i matam ngkana Ko un.

⁸ Ko karaoi am Moti mai karawa; A bane ni maaku aomata ao a kainab'aabu,

⁹ Ngke Ko teirake n anga am Moti, i bukini kamaiuaia aomata ake a karawawataaki ni kabaneia i aon te aba.

¹⁰ Ko karikiia aomata aika unun b'a a na kabatia riki kamoamoaam; ao naake a kamaiuaki n te buaka ana kateimatoa am toa.

¹¹ Kakoro bukin ami taeka ake kam a tia ni kab'akai nakon te UEA ae te Atua; Ngkami aika botannaomata aika kam ua-kaan, kam na uoti b'aai n tituaraoi nakon te Atua are riai ni makaki.

¹² E kamangoria taan tautaeka aika kainikatonga, Ao E makaki irouia uean aonnaba.